Чошқа зуками һәққидики агаһландуруш дәриҗиси мекискида сәл төвәнлиди әмма дуняда юқири өрлимәктә

Дуня сәһийә тәшкилатниң бүгүн кәч саәт 4 дә баян қилишичә, һазир чошқа зуками һәққидики агаһландуруш дәриҗиси мекискида сәл төвәнлиди, әмма дуняниң башқа җайлирида барғансири юқири өрлимәктә.
Мухбиримиз вәли
2009-05-04
Share
Choshqa-zukami-305 Сүрәт, 26 - апрел, мексикида сайаһәттә болуватқан икки йапонлуқ сайаһәтчи, маска тақиған һалда мексика шәһириниң мәлум кочисида олтурған көрүнүш.
AFP Photo

Һазирға қәдәр чошқа зукам вируси билән юқумланғанлиқи ениқланған бимар сани 1033 кә йәтти. Бухил юқумлуқ кесәл тарқилип киргәнликини мәлум қилған дөләт сани 25 кә йәтти. Һазирға қәдәр юқумлуқ чошқа зуками вируси билән юқумлинип өлгән адәм сани27. Буниң ичидә америкиниң тексас штатида мекискидин келип өлгән бир кичик бала бар.

Франсийә агентлиқиниң баян қилишичә, һазирға қәдәр дуня буйичә чошқа зуками вируси билән юқумланғанлиқи ениқлинип, һөкүмәт тәрипидин мәлум қилинған сан: мекискида 701, америкида 245, канадада 100, әнгилийидә 27, германийидә 6, испанийидә 54, италийидә 4, исраилийидә 3, франсийидә 2, австралийидә 1, қалған җәнубий корийә, йеңи зеландийә, колумбийә, салвадор, һоңкоң қатарлиқ 10 нәччә дөләт яки районда бирдин.

Йәр шари һайванатлар сәһийә оргининиң баш мудири бернард валлатниң ейтишичә, мекискида партлиған юқумлуқ зукам дуняда тунҗи қетим адәмдин чошқиға юқтурулған зукам вирусиниң партлиши болуп һесаблиниду. Әмма, һазир у башқа хилдики юқумлуқ зукам вируслири билән, йәни адәм зуками вируси, қуш зуками вируси вә чошқа зуками вируси билән арилишип кәтти. Бу ениқлашнила әмәс, давалашни қейинлаштурмақта.

Униң әскәртишичә, тарқилиши буниңға охшайдиған шиддәтлик юқумлуқ зукам 20 ‏- әсрдә йүз бәргән 1 ‏- дуня урушида испанийидә 40 милйон адәмни қирип ташлиған иди.

Һәр қайси дөләтләрниң чошқа зукаминиң алдини елиш тәдбирлири охшимайду

Һазир дуняда һәр қайси дөәләтләрниң чошқа зукаминиң алдини елиш, давалаш тәдбирлири охшимайду. Хитай, русийә, һиндонезийә, филипин, җәнобий корийә қатарлиқ бир қисим дөләтләр чошқа гөши импорт қилишни тохтитиш тәдбирини қолланди. явропа бирликидики дөләтләр, японийә, косова қатарлиқ дөләтләр гәрчә чошқа гөши импорт қилиш чәкләнмигән болсиму,әмма чошқа гөшини қоллиништа алаһидә диққәт қилишқа башлиди.

Мисир қатарлиқ дөләтләрдә чошқа гөшини қоллиниш азайтилди. Кантинентол, билуҗет, делта қатарлиқ һава қатниши ширкәтлири юқумлуқ чошқа зуками байқалған районлар ара қатнайдиған айрупилан қетимини азайтти.

Америкида чошқа зуками вируси билән юқумланғанлиқи ениқланған мәктәпләрдә оқуш тохтитип давалаш тәдбири қоллинилишқа башлиди.

Хитайға саяһәткә кәлгән 100 дин артуқ мекискилиқ кәмситишкә учриғандин кейин, мекиска һөкүмити өз поқралирини хитайдин қайтуруп келишни пиланлиди.

Хитай һөкүмити һазирға қәдәр чошқа зукамини чегридин киргүзмәймиз дәп җакарлаватиду, чәтәлликләрниң хитайға саяһәткә келишини чәкләватиду. Уйғур юртлирида болса, хитай коммунист партийиисниң уйғур аптоном район секритари ваң лечуән хитай дөләт қурғанлиқиниң 60 йиллиқини хатириләш үчүн муқимлиқни сақлашни биринчи орунға қоюш керәк дәп җакарлиди.

Чошқа зуками ваксиниси бир һәптидин кейин йетип келиду

Инсанийәт һазир өзини вә әвладлирини юқумлуқ чошқа зукамидин сақлаш үчүн ваксиниға муһтаҗ. Дуня сәһийә тәшкилатниң пешқәдәм әмәлдари мари павле кийниниң баян қилишичә, бирләшкән дөләтләр тәшкилати һазир дора ширкәтлирини ваксина ишләшкә риғбәтләндүрмәктә.

Ройтрс агентлиқиниң җәнвә вә лондондин баян қилишичә, һазир дуняда 20 чоң ширкәт ваксина ишләшкә киришти. Америка сәһийә идариси бәзи ширкәтләргә 5 ‏- айниң оттурилиридин бурун ваксина ишләп чиқишқа мөһләт бәрди. Чошқа зуками ваксиниси аз дегәндә йәнә бир һәптидин кейин йетип келиду.



Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт