Pütün insaniyet choshqa zukamidin mudapi'e körmekte

Mékiskida 4 ‏ - ayning 25 ‏ - küni choshqa zukami bayqalghan idi. Bundaq jiddiy xaraktérlik yuqumluq késel tarqalghan haman, dunya sehiye teshkilati insaniyet hazir jiddiy yuqumluq késelikke duch kelgenlikini jakarlidi we pütün dunyagha ammiwiy taziliq agahlandurushi chiqardi.
Muxbirimiz weli
2009-04-27
Share
Choshqa-zukami-305 Süret, 26 - aprél, méksikida sayahette boluwatqan ikki yaponluq sayahetchi, maska taqighan halda méksika shehirining melum kochisida olturghan körünüsh.
AFP Photo

Mékiskida choshqa zukami bilen ölgen adem sani 149 gha yetti

Mikiska sehiye tarmaqlirining ashkarilishiche, mékiskida 26‏ - chislaghiche 1324 adem choshqa zukami bilen yuqumlinip, uningdin 81 adem ölgen. Bügünki sanliq melumatqa qarighanda, mékiskida choshqa zukami bilen yuqumlan'ghanliqi bayqalghan adem sani téz köpeygen, ölgen adem sani 149 gha yetken.

Amérikida mikiskidin tarqalghan choshqa zukami bilen yuqumlan'ghan bimar sani 40 qa yetti

Amérikining sehiye tarmaqlirining bügün ashkarilishiche, mikiskidin tarqalghan choshqa zukami bilen yuqumlan'ghanliqi bayqalghan bimar sani kaliforniye shitatida 7, kansasta 2, nyuyork shehiride 28, oxayoda 1, téksasta 2, jem'i 40.

Yéngi zéllandiye, kanada, ispaniyilerdimu choshqa zukami bimarliri bayqaldi

Roytrs agéntliqining bayan qilishiche, yéngi zéllandiyide, mékiskidin qaytip kelgen 11 neper oqughuchining alliqachan yuqumlan'ghanliqi bayqalghan. Kanadadimu, ispaniyidimu choshqa zukami bimarliri bayqalghan.

Pütün dunya hazir choshqa zukamidin saqlinish üchün tedbir qollanmaqta

Uchurlardin melum bolushiche, choshqa zukami bilen yuqumlan'ghan kishilerde, deslepte zukam bolghandikidek issitma, yütel, harghinliq, ishtey tutulush alametliri peyda bolidiken. Kisel kishiler ara beden arqiliq yaki hawa arqiliq yuqidiken. Énqlan'ghan ehwaldin qarighanda, bu qétim tarqalghan choshqa zukamida asasen 25 tin 45 kiche bolghan kishiler ölüp ketken. Bimarlar eger bayqalghan haman dawalansa dora ünüm béridiken.

Bundaq jiddiy yuqumluq choshqa zukami mékiskida tarqalghandin kéyin, hazir amérika, kanada, yéngi zillandiye qatarliq döletler choshqa zukamidin saqlinish üchün ammiwiy taziliq buyiche jiddiy haletke ötti. Yawropa, okyaniye, ottura sherq we ottura asiya döletliri choshqa zukamidin saqlinish üchün tekshürüsh élip bérishqa we öz xelqini bu apettin saqlash üchün jiddiy tedbir qollini'ishqa bashlidi. Dunyaning her qaysi jayiliridiki ayrodromlarda yuqumluq késelliktin saqlinish tekshürüshi yolgha qoyulushqa bashlidi.

Xitay, koriye, sin'gapor, wéytnam, filipin, malayshiya qatarliq asiya döletliri bu qétim mikiskida yüz bergen choshqa zukamini, buningdin burun xitayda yüz bergen saris késelliki we qush zukamidin shiddetlik yuqumluq zukam dep qarap, bügündin bashlap sayahet qilishni kontrol qilishqa bashlighan.

1919 ‏ - Yili 40 milyon adem yuqumluq zukamda qirilip ketken idi

Washin'gton post géziti bügün choshqa zukami heqqide élan qilghan maqaliside, insaniyetke 1918‏ - 1919 ‏ - yilliri keng kölemlik yuqumluq zukam tarqalghanda 40 milyon adem qirilip ketkenlikini, mushu esrdimu, sars késelliki we her xil tiptiki yuqumluq qush zukami yüz bergenlikini, uning hazirgha qeder tekrarlinip turuwatqanliqini eslitip, bu qétim yene uningdinmu dehshetlik bolghan choshqa zukami tarqalghanliqigha jiddiy mu'amile qilish lazimliqini körsetti.

Shinjang géziti bügün 'choshqa zukami choshqigha yéqinlashmighan kishilerge yuqmaydu' dep teshwiq qildi

Xitayning 'shinjang géziti' bügün choshqa zukami heqqide élan qilghan xewiride 'choshqa zukami choshqigha yéqinlashmighan kishilerge yuqmaydu. Ademdin ademge yuqmaydu' dep jakarlidi.

Emma roytrs agéntliqining bayan qilishiche, isra'iliyide, bir oqughuchi mékiskidin qaytip kelgen haman doxtorxanigha kélip tekshürtkende, alliqachan yuqumlan'ghanliqi bayqalghan. Buningdin melumki, mikiskida tarqalghan choshqa zukami choshqa mehsulatlirini istimal qilmaydighan insanlarnimu yuqumlandurghan.

Xitay hökümiti basturush herikiti élip bérishni pilanlidi

Dowéy agéntliqining bayan qilishiche, choshqa zukami xitayda jiddiy ensizlik we dawalghush peyda qildi. Kommunist xitay hökümiti jem'iyette kélip chiqiwatqan bundaq turaqsizliqqa taqabil turush üchün, mékiskidin we amérikidiki choshqa zukami körülgen shitatlardin choshqa göshi import qilmaydighanliqni jakarlidi.

Shuning bilen bir waqitta yene, 5 ‏ - aydin 10 ‏ - ayghiche jem'iyette turaqliqni saqlash üchün, ' qara gurohlargha zerbe bérish', 'chong délolarni bir terep qilish' dégen nam astida basurush herikiti élip bérishni pilanlidi.

Bashqa döletlerning choshqa zukamidin saqlinish tedbirliri xitayningkige oxshimaydu

Dunyada nurghun döletlerning choshqa zukamidin saqlinish tedbirliri xitayningkige oxshimaydu. B b s ning bayan qilishiche, mékiska da'iriliri hazir mikiska shehirige yéqin bolghan aliy, ottura, bashlan'ghuch mekteplerni, muziyi, qawaq qatarliq chong ammiwiy sorunlarni 5 ‏ - ayning axirighiche taqashni jakarlidi. Kishilerni körüshkende öz - ara qol élishish, söyüshüsh we hemtamaq bolushtin saqlinishqa chaqirdi. Mikiskida we késellik tarqalghan jaylarda, qatnash tügünliride kishilerge aghzigha taqaydighan maska tarqitilishqa bashlidi.

Amérika hökümiti choshqa zukamigha qarita jidiy tedbir qollini'ishni, emma xelqte ensizlik peyda qilmasliqni jakarlidi we jiddiy dawalash tedbirlirini qollinishqa bashlidi. En'giliye, shiwétsariyilermu choshqa zukami bayqalghan haman dawalansa, tamiflu Tamiflu qatarliq dorilar ünüm béridighanliqini élan qildi. Shundaqla, en'giliye, fransiyiler insaniyetni bundaq apettin menggu saqlash üchün, choshqa zukamigha qarshi waksina ishleshke kirishti.



Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet