Shangxey dunya soda yermenkisi mes'ullirining chet'el bankiliridiki hésabati ashkarilanmaqta

Bu ehwal shangxey sheherlik dölet bixeterlik idarisi teripidin metbu'atlargha ashkarilan'ghan.

Shangxey dunya soda yermenkisi ayaghlashqan turuqluq, yermenke üchün ishlitilgen chiqim heqqide hazirghiche éniq melumat yoq iken, mutexessislerning mölcherleshlirige qarighanda yermenke üchün 55 milyard amérika dolliri serp qilin'ghan. Bu béjing olimpik tenterbiye murasimi üchün ishlitilgen puldin bir hesse köp iken.

Shangxey sheherlik dölet bixeterlik idarisining amérikida turushluq mes'uli, boshun axbarat torining muxbirigha, shangxeydiki dunya soda yermenkisining her qaysi tarmaq we bölümliride wezipe ötüwatqanlar sanining 125 tin ashidighanliqini, del yermenke ötküzülüwatqan mezgilde bularning ichide 30 nechchisining bala - chaqisi yaki a'ilisining chet'elge oqushqa yaki olturaqlishish üchün shangxeydin ayrilghanliqini bildürüp, shangxey dunya soda yermenkisidikiler bilen munasiwetlik, chet'elde turushluq 60 kishining banka hésabatidiki kirim menbesining éniq emeslikini ashkarilighan.

11-Séntebirdin kéyin, xitay bilen amérika ikki dölet, uchur alaqe, bixeterlik sistémisi, zeherlik chékimlik etkeschiliki shundaqla pul yuyush qatarliq mesililerde ortaq hemkarliq ornatqandin sirt, ikki terep yene banka hésabatlirini öz-ara közitish, buningda banka hésabatigha 100 ming dollardin artuq neq pul yatquzulsa en'ge turghuzush we tekshürüsh élip bérish békitilgen.

Shangxey dunya soda yermenkisi ötküzülgen mezgil we ikki aydin kéyinki qisqighina waqit mabeynide, shangxeydin amérikigha oqushqa kelgen oqughuchilar bilen köchmenlerning banka hésabatida pul qoyush we yötkesh ishliri amérika terepning diqqitini chekken bolup, shangxey bixeterlik idarisining amérikidiki mes'uli, amérika terepning banka hésabatida yüz bergen bu özgirishlerning hemmisini, xitay bixeterlik ministirliqining, térrorchiliqqa zerbe bérish tarmiqigha yollap bergen.

Amérika tereptin uchurgha érishken, xitay bixeterlik ministirliqidiki mutexessisler derhal, banka hésab igiliri üstide tekshürüsh élip bérip, bularning ichide 10gha yéqin kishining, shangxey dunya soda yermenkisi bashliqlirining amérikidiki a'ilisi we perzentliri ikenlikini éniqlap chiqqan.

Xitayda herqandaq bir emeldarning, dölet xezinisige a'it iqtisadni özining qiliwalidighanliqi, chiriklikning ewjige yetkenlikini bildürgen amérikidiki siyasiy pa'aliyetchi élshat hesen ependi: "bu yalghuz shangxey dunya soda yermenkisi bashliqliri sadir qiliwatqan jinayet emes, xitayda kichik bir kent bashliqimu parixorluq we chiriklik jinayitidin xali bolalmaydu." Dédi.