Rabiye qadir xanim: yaponiye hökümitining Uyghurlarning démokratik heriketlirini qollaydighanliqigha ishinimen

Bu yil 5-ayda dunya Uyghur qurultiyining 4-nöwetlik wekiller qurultiyi we shundaqla 6-nöwetlik Uyghur rehberlerni terbiyilesh kursi yaponiyide échilish aldida turmaqta.
Muxbirimiz irade
2012.04.09
rabiye-xanim-aliy-kengesh-305.jpg Uyghur milliy herikiti yétekchisi rabiye qadir xanim. 2011-Yili 3-may
RFA

Bügün xitay tashqi ishlar ministirliqi bu heqte bayanat bérip, dunya Uyghur qurultiyining bölgünchi bir teshkilatliqini ilgiri sürdi we yaponiye hökümitini bu pa'aliyetke yol qoymasliqqa chaqirdi. Uyghur milliy herikitining rehbiri rabiye qadir xanim xitay hökümitining yuqiridiki sözlirige jawab qayturup, Uyghurlarning démokratik ellerdiki tinch shekilde élip bériwatqan pa'aliyetlirige xitay hökümitining hergizmu tosalghu bolalmaydighanliqini bildürdi.

Bügün xitay tashqi ishlar ministirliqining bayanatchisi lyu wéymin yaponiye hökümitini agahlandurup, ularni dunya Uyghur qurultiyining yaponiyide yighin échishigha yol qoymasliqqa chaqirdi. Lyu wéymin sözide dunya Uyghur qurultiyining xitayning birlik we pütünlükige tehdit sélip kelgen teshkilatliqini, ularning xitayni parchilash üchün heriket qiliwatqanliqini ilgiri sürgendin kéyin: “Yapon hökümiti bu teshkilatning yapon zéminida xitayni parchilash heriketlirini élip bérishigha yol qoymasliqi kérek” dédi.

Uyghur milliy herikiti rehbiri rabiye qadir xanim bu munasiwet bizning ziyaritimizni qobul qilip, xitay da'irilirining yuqiridiki sözlirige reddiye berdi. U sözide aldi bilen dunya Uyghur qurultiyining Uyghur xelqining kishilik hoquqi üchün tinch pa'aliyet élip bériwatqan bir teshkilatliqini eskertti.

Rabiye qadir xanim xitay hökümitining nöwette diplomatiye küchini ishqa sélish arqiliq, özining Uyghurlar üstidin yürgüzüwatqan bisim siyasitini yoshurup qélish üchün heriket qiliwatqanliqini, emma démokratik ellerning prinsipliri xitay hökümitining bu herikitige yol qoymaydighanliqini bildürdi.

Rabiye qadir xanim sözining axirida musteqil we démokratik bir dölet bolghan yaponiye hökümitiningmu Uyghurlarning tinch halda élip bériwatqan kishilik hoquq pa'aliyetlirini qollaydighanliqigha ishinidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.