Диктаторниң олимпики

 Ундин башқа йәнә, дәм елишқа чиққанлар, оқуғучилар вә аһалиләрдин тәшкилләнгән, 600 миң кишилик "халисанә бихәтәрлик хизмәтчилири" вәзипә атқуриду.

Петер гоодспеед мақалисидә, хитай даирилириниң асаслиқ мусабиқә өткүзилидиған тәнтәрбийә заллириға, йәрдин һаваға қоюп берилидиған башқурулидиған бомбиларни орунлаштурғанлиқини, учқучисиз айропиланларниң һавада олимпикниң бихәтәрликини қоғдайдиғанлиқини, хитай даирилириниң мусабиқә мәйданиға киргүчиләрни интайин қаттиқ бихәтәрлик тәкшүрүшлиридин өткүзидиғанлиқини әскәртиду.

Бейҗиң олимпики пул әң коп хәҗләнгән мусабиқә

Мақалә аптори юқири компютер техникисиниң бу қетимқи олимпик мусабиқисидә кәң қоллинилғанлиқини, көплигән орунларға көзгә көрүнмәс, микрофон иқтидари болған, тиңшиғуч аппаратлириниң орунлаштурулғанлиқини, бу хил аппаратларниң 10 нәччә хил тилдики сөзни хатириләйдиғанлиқини, униңдин башқа, 300 миңдин ошуқ йошурун камираниң, һәр қандақ адәмниң һәрикитини көзитидиғанлиқини язиду.

Мақалидә америкиниң верҗинийә шитатиға җайлашқан, бихәтәрлик санаити орниниң, хитай даирилириниң олимпикниң һарписида, назук көзитиш вә назарәт қилиш әсваблири үчүнла 6 милярд 500 милйон доллар пул хәҗлигәнликини тәхмин қилғанлиқини тилға алиду вә ирақ урушиниң көләңгүси вә 11 - сентәбир террорлуқ һуҗумидин кейин өткүзүлгән, 2004 - йиллиқ афина олимпик мусабиқисиниң бихәтәрлики үчүнму, бир милярд 300 милйон доллар хәҗләнгәнликини алаһидә әскәртиду. Мақалидә йәнә, хитай даирилириниң хитай мәдәнийити вә өзлириниң мувәппәқийәтлирини көз - көз қилиш үчүн нәччә милярд долларни бузуп - чачқанлиқини тәкитләйду.

Ғәрб дөләтлиригә өзини көрситиш

Мақалидә хоңкоңлуқ язғучи, журналист франк чиңниң хитайниң өзиниң қайтидин баш көтүргәнлики, дуняниң сәһнисидики муһимлиқи вә ролини намайән қилишқа һәдәп урунуватқанлиқи, олимпик мусабиқисиниң хитайниң қолиға өтиши билән, әсли мәнисини йоқитип, олимпикниң ташқи җәһәттә, башқа дөләтләр билән үзәңгә соқуштуруш вә ички җәһәттә, өктичи күчләрни бастурушқа йол ачқанлиқи һәққидики сөзлирини нәқил алиду.

Олимпик кишилик һоқуқниң техиму начарлишишиға йол ачти

Канада "дөләт почтиси" гезитниң стон язғучиси петер гоодспеед мақалисидә,олимпик мусабиқисиниң хитай үчүн кишилик һоқуқни дәпсәндә қилишқа баһанә болғанлиқини баян қилип: "хитай даирилири бейҗиң олимпик мусабиқисини өткүзүш һоқуқини илтимас қилғанда, пуқраларниң кишилик һоқуқини яхшилайдиғанлиқи, техиму сиртқа ечиветилгән җәмийәт бәрпа қилидиғанлиқи, чәтәл мухбирлириниң әркин хәвәрчилик билән шуғуллинишиға йол қойидиғанлиқи қатарлиқларни вәдә қилған болсиму, булар ахир қуруқ нәрсә болди вә бу темилар чәтәл мәтбуатлириниң мәсхирә темисиға айланди. Кишилик һоқуқ тәшкилатлири, хитайниң өзгириши үчүн катализаторлуқ рол ойнишини арзу қилған олимпик мусабиқиси, бүгүнгә кәлгәндә, хитайдики кишилик һоқуқниң арқиға чекинишигә вә әркинлик йоллириниң техиму тосулушиға йол ачти," дәп язиду.

Аптор мақалисида, олимпик һарписида, тип - тенч бейҗиң дегән лозунка - шуарлар астида, сақчиларниң көчмән ишчиларни, яймичиларни вә диваниларни тазилаватқанлиқини,кишилик һоқуқ паалийәтчилири,охшимиған сиясий көз қараштики затларни қолға еливатқанлиқини, тутқун қиливатқанлиқини вә уларға тәһдитләрниң йеғиватқанлиқини қисқиси, қорқунучлуқ террор муһитниң яритилғанлиқини баян қилиду.

Уйғурларни террорчи қилип көрситиш олимпикниң "муһим" мәзмунлиридин бири

Аптор мақалисидә, хитай һөкүмитиниң уйғурлар билән тибәтликләрни олимпикниң бихәтәрликигә тәһдит, дәп қараватқанлиқини,чәтәлләрдики уйғур сиясий паалийәтчилири билән тибәтниң сүргүндики даһиси далай ламани, бейҗиң олимпик мусабиқисиниң бихәтәрликигә бузғунчилиқ салмақчи, дәп әйибләватқанлиқини вә булардин қара тизимлик турғузғанлиқини баян қилиду.

Петер гоодспеед мақалисидә, хитай даирилириниң олимпик мунасивити билән дуняниң көзи хитайға мәркәзләшкәнликидин пайдилинип, дуняға уйғурларни террорчи қилип көрситишкә һәдәп урунуватқанлиқи, техи алдинқи һәптидила, хитай көчмәнлиригә қарши җиһат қилмақчи болған, дейилгән 5 нәпәр уйғурни етип ташлиғанлиқи қатарлиқларни алаһидә әскәртип өтиду.

Аптор мақалисидә, хитай һөкүмитиниң олимпик һарписида елип барған, һәддидин артуқ қаттиқ бихәтәрлик тәдбирлири билән, дунядики әң мустәбит дөләт дегән тәсиратни кишиләрниң каллисиға сиңдүргәнликини шундақла бу хил бихәтәрлик тәдбирлирини бундин кейинки йилларда, хитайниң һәммә йеригә омумлаштуруши мумкинчиликини баян қилиду вә бу һәқтики әндишилирини оттуриға қойиду.