'Дин вә һаят ' намлиқ китаб нәширдин чиқти

Сүрәт, 'дин вә һайат (1600 соалға җаваб)' намлиқ китабниң мақава көрүнүши.

Бу әсәр тил җәһәттин аммибаб, чүшинишлик һәм ихчам қилип һазирланған болуп, җәмий 7 бөлүмдин тәркип тапқан. Улар  төвәндикичә:

Биринчи бөлүм : етиқад вә униңға мунасивәтлик мәсилиләр
Иккинчи бөлүм: ибадәт вә униң түрлири һәм әһкамлири
Үчинчи бөлүм: әхлақ вә униң әһмийити
Төтинчи бөлүм: муһәммәд әләйһиссаламниң тәрҗимиһали
Бәшинчи бөлүм: муамилә вә униң әһкамлири
Алтинчи бөлүм: һарам вә чәкләнгән ишлар
Йәттинчи бөлүм: исламий билимләрдин қисқичә мәлумат

Әсәрниң биринчи, иккинчи , үчинчи вә төтинчи бөлүмлири асасән яш - өсмүрләргә тәрбийә бериш нуқтисидин һазирланғанлиқтин, соалларниң җаваблири ихчам болуп, ихтилапсиз мәсилиләр таллап елинған. Әмма униң бәшинчи, алтинчи вә йәттинчи бөлүмлири омумән чоңларға мунасипрақ  болғанлиқтин, җаваблар бир аз кеңәйтип берилгән вә мәсилиләрниң мәнбәлири имкан қәдәр толуқ көрситилгән.

Китабниң омумий бәт сани 925 бәт болуп, чоң һәҗимлик вә қаттиқ муқавилиқ қилип бесилған.

Аптор мәзкур әсәрниң муқәддимисидә, бу әсәрни тонуштуруп мундақ дәп язған: "бу әсәрни һазирлаш иши узун муддәтлик қийин вә җапалиқ әмгәк болди. Бу әсәрниң омумға мәнпәәтлик, чүшинишлик вә толуқ бир әсәр болуп чиқиши үчүн иқтидаримниң йетишичә тириштим, китабимни әң илғар вә омумий мусулманлар арисида бирликкә келингән, ихтилапсиз пикирләр билән бейиттим. Достлиримниң, кәсибдашлиримниң пикирлирини алдим вә ахирқи нусхини улар көрүп чиққандин кейин муқимлаштурдум. Бу китабни көздин кәчүрүп чиқип бекитиш ишини сәуди әрәбистанниң һәр қайси алий билим юртлирида, пакистан ислам университетлирида, шундақла мисир әзһәр алий билим юртида илим тәһсил қилип, юқириси доктурлуқтин башлап төвини баклавирлиқ унванлирини алған яш алимлар үстигә алған иди. Бу әсәрниң һәр бир уйғур аилисидә бир нусхидин болушини үмид қилимән."

Биз бу әсәр һәққидә  ислам дини илим әһлилиридин җелил туран вә көп санда диний әсәрни тәрҗимә қилған журналист азат буғра әпәндиләр өз көз қарашлирини баян қилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.