Уйғур елидики мусулманлар хитай һөкүмитиниң диний сиясәтлириниң бесимиға учримақта


2006-01-11
Share

mechqit-diniy-erkinlik.jpg
Мәлум бир мәсчитниң темиға чапланған бәлгилимә. Chongaytip körüng

Уйғур райони ахбарат торида йеқиндин буян берилгән хәвәрләргә асасланғанда,уйғур елиниң һәр қайси дәриҗилик партийә, һөкүмәт рәһбәрлири, қурбан һейт һарписида, һәр қайси мәсчитләрниң имамлири, вәтәнпәрвәр диний затларға диний ишларни яхши ишләшни, хитайниң диний сияситини кәң тәшвиқ қилишни күчәйтишни давамлаштурушни вәзипә қилған.

Хитай даирилириниң тәшвиқати

Дүшәнбә күни уйғур ели хәвәр торида елан қилинған буниңға мунасивәтлик бир хәвәрдә көрситилишичә, уйғур аптоном райони парткоминиң даими һәйәт әзаси шәвкәт имин, уйғур һәм туңган чоң молла, имамлардин бир қанчини йоқлап, уларға партийә, һөкүмәтниң йолйоруқлирини йәткүзүп "вәтәнпәрвәр диний затлар узун йилдин бери партийә, һөкүмәткә маслишип, муқимлиқ хизмитиниң яхши елип берилишиға ярдәмдә болди. Буниңдин кейинму мусулман хәлқ аммисиға вәтәнпәрвәрликни, хитай һөкүмитиниң диний сияситини тоғра тәшвиқ қилишни давамлаштуруңлар, қанунсиз диний һәрикәтләргә қәтий қарши туруп, аммиға өз алдиға яки қалаймиқан диний паалийәт елип беришниң зиянлиқлиқини чүшәндүрүңлар , бу уйғур елиниң муқимлиқи һәм тәрәққияти билән зич мунасивәтлик" дегән.

Буниңдин бир нәччә ай илгири ечилған аптоном районлуқ диний ишларни қанун билән башқуруш йиғинидиму, ваң лечуән диний хизмәтләр тоғрисида сөз қилип, " һәр дәриҗилик кадир вә аммиға қарита динсизлиқ тәрбийисини күчәйтиш, диний затларға болған сиясий идийиви тәрбийини чиң тутуп ишләш, уларниң хитай партийә, һөкүмитиниң рәһбәрликини һимайә қилип, сотсиялизмға болған етиқадини чиңитиш, яш өсмүрләргә шинҗаңниң тарихини тоғра тонутуп, хитайниң мәнпәәти һәммидин әла дегән идийини турғузуш керәк дәп көрсәткән иди.

Хәлқниң зари

Хитай һөкүмити юқириқидәк сиясәтләр арқилиқ уйғур районидики ислам дини муритлириниң диний етиқад әркинликини контрол қилмақта. Уйғур елидин игилишимизгә қариғанда, мусулманларниң һейт‏ - байрамлири һарписида, хитай һөкүмитиниң бу хил етиқадни контрол қилиш сиясәтлири техиму күчийидиған болуп, ислам диниға етиқад қилғучи уйғур хәлқи нөвәттә хитай һөкүмитиниң диний җәһәттин бастуруш сияситиниң сарасимидә күн өткүзмәктә икән.

Қәшқәрниң мәлум йезисидин зияритимизни қобул қилған бир деһқан хитай һөкүмитиниң қоллиниватқан диний сиясәтлири һәққидә тохтилип, оқуғучи, партийә әзалири һәтта дадүйҗаңларниң мәсчиткә беришигә болмайдиғанлиқини ейтти.

Хитай һөкүмитиниң уйғур районида қоллиниватқан диний сиясәтлири йәрлик хәлқниңму күчлүк наразилиқини қозғаватқан болсиму, хәлқниң бу һәқтә қарши пикирдә яки идийидә болушиму хитай һөкүмити тәрипидин контрол қилинғанлиқи үчүн, мусулманлар хитай һөкүмитиниң уйғур районида мусулманларға қаратқан натоғра сиясәтлиригиму сүкүт қилмақта икән.

Биз уйғур елидики әң чоң мәсчит болған һейтгаһ җамәсигә телефон қилип мәсчитниң қаидә қанунлири һәққидә мәлумат алдуқ. Мәсчитниң мәсуллиридин бири бу һәқтә өзиниң баянини өзи инкар қилидиған мүҗимәл җавабларни бәрди. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт