Канадада диний әркинликни қоғдаш сарийи қурулмақчи

Канада дунядики диний дәпсәндичиликләрни көзитидиған диний әркинлик сарийини қурмақчи. Сайлам риқабитиниң ахирқи һәптисидә, консерватип партийисиниң рәһбири степһен һарпер һакимийәт бешиға кәлгән һаман йеңи бир орган-диний әркинлик сарийиниң канадада рәсмий хизмәт башлайдиғанлиқини билдүрди.

Степһен һарпер бу йеңи органниң ташқи ишлар министирлиқиға қарайдиғанлиқини вә йиллиқ паалийәт расхотиға 5 милйон доллар аҗритидиғанлиқини әскәртип:
‏“хушаллиқ билән шуни җакарлаймәнки, мән баш министирлиқ вәзиписини тапшуруп алғандин кейин, консерватип һөкүмитиниң биринчи болуп қилидиған алаһидә иши диний әркинлик сарийини ечиштур.” деди.

Степһен һарпер сөзидә, бу йеңи органниң диний әркинликлири дәпсәндә қилинған хәлқләрниң дәрдигә дәрман болидиғанлиқини тәкитләп:
‏“диний әркинлик сарийи пүтүн дунядики диний әркинлик вәзийитини көзитиду, диний әркинликни қоллаш вә униңға мәдәт бериш канаданиң асаслиқ ташқи сияситигә айлиниду.” деди.

Буниңдин илгири консерватип һөкүмитиниң көчмәнләр министири җасон кенней диний әркинликлири боғулған хәлқләрни тилға алғанда, уйғурларниму әскәртип өткәниди.

Тәклип билән мәзкур йиғинға қатнашқан канада уйғур җәмийитиниң рәиси руқийә турдуш канадада диний әркинлик сарийиниң тәсис қилинишиниң уйғурлар үчүн алаһидә әһмийәтлик вәқә икәнликини тәкитлиди.

Руқийә турдуш сөзидә диний әркинликләрни қоғдаш канаданиң асаслиқ ташқи сияситигә айлинишиниң йәнә, хитай түрмисидә тутуп турулуватқан канада пуқраси һүсәйин җелил мәсилисигиму иҗабий тәсир көрситидиғанлиқини әскәртти.

Җасон кеннейниң тилға елишичә, бу йеңи органниң вәзиписи америка һөкүмити 10 йил илгири тәсис қилған “диний әркинлик сарийи” ниң хизмәтлири билән охшишидикән.

Ислам диниға етиқад қилидиған уйғурлар дуняда диний әркинликлири әң қаттиқ боғулуватқан хәлқләрниң бири.