D u q ijra'iye re'isi dolqun eysa amérikidiki pa'aliyetliri heqqide toxtaldi

Dunya Uyghur qurultiyining ijra'iye komitéti re'isi dolqun eysa ependi tonulghan Uyghur kishilik hoquq pa'aliyetchilirining biri. 9-Noyabir amérikining paytexti washin'gton shehirige yétip kelgen dolqun eysa ependi 15-noyabir küni radi'omiz Uyghur bölümining mexsus ziyaritini qobul qilip, xitay uni térrorchi dep élan qilghan 10 yildin buyan tunji qétim amérikida ziyarette bolushining, özi hem dunya Uyghur qurultiyi qatarliq chet'ellerdiki xitay hökümitige qarshi pa'aliyet élip bériwatqan Uyghur teshkilatlirining bundin kéyinki pa'aliyetliride muhim ehmiyetke ige ikenlikini bildürdi.

U özining bu qétim amérikida kishilik hoquq teshkilatliri we amérikining hökümet xadimliri bilenmu muhim uchrishishlarda bolghanliqini bildürdi we amérikigha kirish yolining échiwétilishi, dunya Uyghur qurultiyining bundin kéyinki yighin pa'aliyetlirining ötküzülüshi we bezi qararlarning élinishigha téximu qulay purset tughdurghanliqini bildürüp, amérika hökümitining Uyghurlarning pa'aliyitini qollighanliqigha alahide rehmet éytti.

Dolqun eysa ependi yene, özining bu qétimqi amérika ziyaritidiki tesiratliri heqqidimu toxtilip, amérika Uyghur birleshmisining 10-noyabir ötküzülgen saylam pa'aliyitige qatnashqanliqini hem jumhuriyet bayrimidin kéyin amérikidiki Uyghurlar bilen pikir almashturush, söhbetlishish pa'aliyetliride bolghanliqini bayan qildi shuningdek erkin asiya radi'osini ziyaret qilip, Libby Liu we Daniel Southerland qatarliq rehberler hemde Uyghur bölümining dolqun qembiri qatarliq barliq xadimliri bilen körüshüp, ularning xizmitige yüksek baha bergenliki toghrisida toxtaldi.

Söhbitimiz axirida dolqun eysa ependi yene, eyni chaghda özi bilen birlikte xitayning térrorchi tizimlikige kirgüzülgen bashqa Uyghur pa'aliyetchilirining ehwali heqqidimu toxtilip, özige yol échilghanliqi, ularningmu xelq'arada erkin pa'aliyet élip bérishigha ümid bérishi mumkinlikini ilgiri sürdi.