Xeyrulla efendigil : dunya Uyghur qurultiyi 2012 - yili türkiyide 30 qétim pa'aliyet uyushturdi
2012.12.26
U sözide bu pa'aliyetning eng axirqisini bügün qiriqqale uniwérsitétida ötküzgenlikidin özini bextiyar hés qilghanliqini tekitlidi.
25 - Dékabir küni türkiyining ottura qisimigha jaylashqan enqere wilayitige qarashliq qiriqqale shehiride “Sherqiy türkistan we Uyghurlar” témisida doklat bérish yighini ötküzüldi. Doklat bérish yighinining küntertipige asasen aldi bilen türkiyining azadliq urushida shéhit bolghan kishiler bilen Uyghurlarning erkinliki yolida jénini pida qilghan kishilerge éhtiram bildürülgendin kéyin türkiye jumhuriyeti bilen sherqiy türkistanning “Istiqlal” marshi oqup ötüldi. Arqidin yighinni uyushturghan qiriqqale iqtisad fakultéti oqughuchilar uyushmisining re'isi baybarslan ali qazanchi échilish nutiqi söz qilip, yighinning échilish seweblirini chüshendürdi.
Arqidin 4 yashtiki mujahit qeshqiri Uyghur sha'ire nurela göktürk yazghan “Biz kimler biz?” dégen shé'irini déklamatsiye qilip pütün yighin ehlini hayajanlandurdi. Arqidin dunya Uyghur qurultiyi muhajirlar komitéti mudiri xeyrulla ependigil Uyghurlarning tarixi we hazirqi weziyiti heqqide tepsili melumat berdi.
Qiriqqale uniwérsitéti iqtisad fakultéti oqughuchilar uyushmisi uyushturghan bu yighin axirlashqandin kéyin yighin'gha qatnashqan oqutquchi - oqughuchilar arqa - arqidin xeyrulla ependining yénigha kélip Uyghurlar heqqide so'allar soridi.
Dunya Uyghur qurultiyining mu'awin re'isi séyit tumtürk ependi özlirining bu pa'aliyetliri jeryanida türkiye aliy mektep oqughuchiliri arisida sherqiy türkistan gha bolghan chüshenchilerni ashurghanliqini tekitlidi.
Melum bolushiche, 2012 - yili “Xitay medeniyet yili” dep élan qilin'ghandin kéyin bir yil ichide xitay döliti türkiyide chong kichik bolup 400 etrapida pa'aliyet ötküzgen. Dunya Uyghur qurultiyi buninggha qarshi 30 etrapida pa'aliyet élip barghan. Bashqa teshkilatlarning pa'aliyetlirinimu qoshqanda Uyghurlar 2012 - yili ichide türkiyide 50 etrapida pa'aliyet qilghan.
Biz yighin axirida yighinda doklat bergen xeyrulla ependige mikroponimizni uzattuq.