D u q amérika döletlik axbarat kulubida bayanat élan qildi

Dunya Uyghur qurultiyi 26 - may küni, amérika paytexti washin'giton'gha jaylashqan amérika döletlik axbarat kulubida, muxbirlarni kütiwélish yighini échip, dunya Uyghur qurultiyining 3 - nöwetlik wekiller qurultiyining muweppeqiyetlik tamamlan'ghanliqi munasiwiti bilen axbarat élan qildi.
Muxbirimiz gülchéhre
2009-05-26
Share
National-Press-Club-Site-305 Amérika döletlik axbarat kulubi tor bétining bash bétidin bir körünüsh.
www.press.org Din élindi.

Mezkur axbarat élan qilish yighinigha amérikidiki bir qisim yerlik hem xelq'araliq axbarat organlirining muxbirliri qatnashti.

18 - Maydin bashlan'ghan dunya Uyghur qurultiyining qurultay hem muhakime, saylam qatarliq pa'aliyetliri 25 - mayghiche amérika paytexti washin'gitonda bir hepte dawam qilghan idi.

Dunya Uyghur qurultiyining barliq pa'aliyetliri muweppeqiyetlik tamamlan'ghanliqi munasiwiti bilen bügün yeni 26 - may, washin'gitondiki döletlik axbarat kulubida dunya Uyghur qurultiyining axbarat élan qilish yighini bolup ötti.

Mezkur axbarat yighinigha dunya Uyghur qurultiyi re'isi rabiye qadirgha wakaliten, dunya Uyghur qurultiyining bayanatchisi alim séyitof ependi qatniship, amérikidiki xelq'araliq téléwiziye, radi'o hemde gézit, zhurnallardin kelgen muxbirlargha dunya Uyghur qurultiyining bayanatini élan qildi we muxbirlarning Uyghurlar heqqide sorighan türlük so'allirigha jawab berdi.

Bayanatchi alim séyitof ependi, dunya Uyghur qurultiyining bu qétim washin'gitonda, 21 dölettin kelgen 112 neper wekilning qatnishishi bilen dawam qilghan bir heptilik pa'aliyetlirining muweppeqiyetlik ötküzgenlikini sherhiligendin kéyin bayanat bérip " dunya Uyghur qurultiyi we uning terkipidiki barliq Uyghur teshkilatliri, qurultay re'isi rabiye qadirning rehberlikide Uyghur dewasini yenila démokratik prinsiplar asasida tinchliq yoli bilen dawamlashturidu" dep jakarlidi.

Mezkur axbarat élan qilish yighinigha yene, güentanamo herbiy türmisidiki 17 neper Uyghurning ichide 6 nepirining adwokatliqini öz üstige alghan suzan bakirmening hemde Uyghur adwokat nuri türkel we yene "ejdiha bilen élishqan ayal" namliq rabiye qadir xanimning bi'ogirafiyisini neshr qilghuchi kénnis kalés ependilermu teklip bilen qatnashti.

Güentanamoda tutup turluwatqan Uyghurlar mesilisining dunya axbarat saheside hemmining diqqitini tartiwatqan bir mesilige aylan'ghanliqi melum. Dunya Uyghur qurultiyining bügünki axbarat élan qilish yighinidimu muxbirlar güentanamodiki 17 neper Uyghurning teqdiri mesilisi heqqide köplep so'allar soridi.

Muxbirlarning güentanamodiki Uyghurlar némishqa hazirgha qeder qoyup bérilmeydu ? ular amérikigha qoyup bérilse amérikigha tehdit peyda qilish éhtimalliqi barmu ‏- yoq dégendek so'allirigha jawab bergen adwokat suzan bakirmening xanim intayin keskin halda " güentanamo türmisidiki bu 17 neper Uyghur térrorchi emes, ular héchqachan térrorchi bolghanmu emes, xuddi sotta aqlan'ghandek, ular xata peytte, xata jayda turup qalghanliqi üchünla, pakistandiki bir qisim kishiler teripidin amérika eskerlirige xata uchur bilen sétip bérilgen. Ular héchqachan amérikigha xeter peyda qilmaydu, ularning hemmisi biz bilgen Uyghurlargha oxshashla intayin tinchliqperwer kishiler, ular alte yil ilgirila qoyup bérilishi kérek idi, epsus ularni qobul qilishqa üchinchi bir dölet chiqmighachqila hazirgha qeder güentanamoda turushqa mejbur bolmaqta," dédi.

We yene amérika hökümitining ularni héchqachan xitaygha qayturmasliq heqqide qararining éniq ikenlikini tekitlidi.

Ziyaritimizni qobul qilghan alim séyitof, dunya Uyghur qurultiyining mezkur axbarat élan qilish yighinini uyushturushtiki meqsiti heqqide toxtaldi. Dunya Uyghur qurultiyi mu'awin re'isi esqerjan ependimu mezkur axbarat élan qilish yighinigha qatnashqan bolup, axbarat élan qilish yighini ayaghlashqandin kéyin esqerjan ependini ziyaret qilduq.

Mezkur axbarat élan qilish yighinida yene, 21 - may küni tarqitilishqa bashlighan rabiye qadir xanimning in'gliz tilida yézilghan bi'ogirafiyisi " ejdiha bilen élishqan ayal " namliq kitabni neshir qilghuchi kénnis kalis ependi, kitabta yézilghan rabiye qadir xanim öz béshidin kechürgen bezi muhim weqeler shundaqla rabiye xanimning bezi eslimilirini qisqiche sözlep ötti hemde mezkur kitabning dunya Uyghur qurultiyining 21 - künidiki échilish murasimigha ölgürüp tarqitilishqa bashlighanliqini, bu kitabning bir qanche tillargha terjime qiliniwatqanliqini tonushturdi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet