D u q teptish hey'itining teshkili prinsiplargha ri'aye qilish chaqiriqi

Dunya Uyghur qurultiyi teptish hey'iti, 5 ‏- iyul ürümchi weqesining bir yilliqi munasiwiti bilen élip baridighan pa'aliyetlerde, dunyaning her qaysi jayliridiki Uyghur teshkilatlirini qanun - nizam we teshkili prinsiplargha emel qilishqa chaqirdi we mexsus bayanat élan qildi.
Muxbirimiz eqide
2010.06.16

Dunya Uyghur qurultiyi teshwiqat merkizi teminligen melumatlargha asasen, 5 ‏- iyul ürümchi weqesi yüz bergenlikining 1 yilliq harpisida, dunya Uyghur qurultiyi teptish hey'itining 7 maddidin terkip tapqan xizmet belgilimisi tüzüp chiqqanliqidin xewerdar bolduq.

Dunya Uyghur qurultiyi teptish hey'iti mezkür belgilimiler arqiliq, d u q rehberlirini, d u q terkibidiki her qaysi teshkilatlarni, barliq Uyghur siyasiy pa'aliyetchilirini we her qaysi döletlerde yashawatqan Uyghurlarni xelq'ara qanun - prinsiplargha, özliri turushluq döletlerning qanunlirigha shuningdek d u q ning teshkili tüzümlirige qattiq emel qilishqa chaqirghan hemde bu heqte mexsus bayanat élan qilghan.

D u q teptish hey'itining 7 türlük belgilimisi ichide, 2 ‏- we 7 ‏- maddilirida, xelq'ara qanun - prinsiplargha we teshkili tüzümlerge ri'aye qilish alahide tekitlen'gen bolup, 2 ‏- maddida eynen mundaq déyilgen: "dunya Uyghur qurultiyi xelq'araliq qanun - prinsiplar asasida qurulghan Uyghur xelqining chet'ellerdiki nopuzluq bir xelq'araliq orgini, shunga qurultay rehberliri qurultayning her qaysi organliri, qurultay wekilliri we qurultay terkibidiki teshkilatlar, qurultay nizamnamiside körsitilgen xelq'araliq qa'ide - prinsiplargha we özliri turuwatqan döletlerning qanunlirigha xilapliq qilip, bashqilarni zorawanliq we radikal heriketler bilen shughullinishqa qutratquchilarni, xelqimiz ichide qurultay nizamnamisige we qurultay rehberlirige qarshi pikir toplighuchilarni del waqtida éniqlap chiqishi kérek."

Dunya Uyghur qurultiyining mu'awin bash teptishi nurmemet rozaxun ependi, 7 türlük madda ichide, nöwettiki weziyette eng muhim dep qaralghan 2 ‏- madda heqqide chüshendürüsh berdi.

D u q teptish hey'itining belgilimiside 5 ‏- iyul ürümchi weqesining 1 ‏- yilliqi munasiwiti bilen élip bérilidighan namayishqa alahide ehmiyet bérish shuningdek namayish élip bérish jeryanida diqqet qilishqa tégishlik muhim nuqtilar otturigha qoyulghan we mundaq déyilgen:

"Dunya Uyghur qurultiyi teripidin élan qilin'ghan axbarat we bayanatlar, doklatlar shuningdek qurultay teripidin uyushturulghan namayishlarda qollinidighan resim, shu'ar we lozunkilar qurultay re'isliki we bash katipliqi teripidin bir tutash élip bérilmaqta, shunga qurultay terkibidiki organ we teshkilatlar bu prinsipqa qattiq emel qilishi, xelq'arada Uyghur milliy herikitining obrazigha ziyan yétidighan sho'arlarni towlashtin, bu xil lozunka we resimlerni kötürüp chiqishtin, namayish meydanlirida qurultayning yétekchi idiyisige xilap bayanatlarni bérishtin qattiq saqlinishi kérek, eger bu jehette mesile körülse, derhal xataliqni tonup, buninggha bashlamchiliq qilghuchilarni éniqlap chiqip, derhal qurultay rehberlik orginigha melum qilishi lazim."

Mu'awin bash teptish nurmemet rozaxun 7 ‏- maddida tilgha élin'ghan nuqtilarning alahide diqqet qilishqa tégishlik nuqtilar ikenlikini tekitlidi.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.