D u q yaponiyide achidighan yighinining teyyarliq xizmetliri ongushluq dawam qilmaqta

Xitay hökümiti Uyghur mesilisini Uyghurlar köprek olturaqlashqan chet döletler bilen bolghan diplomatik alaqiliridiki muhim mesililerning biri qilip, shu döletlerdin Uyghurlarning pa'aliyetlirini cheklishini telep qilip kelmekte.
Muxbirimiz irade
2012.04.10
ilham-mexmut-yapon-305.jpg Ilham mexmut ependi yaponiyede teshwiqat wereqilirini tarqitip yaponiyiliklerge Uyghur mesilisini tonutti. 2011-Yili 17-awghust
RFA

Tünügün, xitay tashqi ishlar ministirliqining bayanatchisi lyuwéymin xelq'ara metbu'atlarning muxbirlirigha bergen bayanatida, dunya Uyghur qurultiyigha oxshash xitayning birlik we pütünlükige tehdit sélip kelgen bir teshkilatning yaponiye zéminida turup, xitayni parchilashqa heriket qilishigha qet'iy qarshi turidighanliqini bildürüp, yapon hökümitidin bu yighin'gha ruxset qilmasliqni telep qilghan idi. Xitay tashqi ishlar ministirliqining bayanatchisi lyu wéminning bergen bayanatidin xitay hökümitining dunya Uyghur qurultiyi bu qétim yaponiyide achmaqchi bolghan yighinini tosup qélish üchün yapon hökümitige bésim ishlitishni xéli burunla bashlighanliqi melum.

Hazir yaponiye Uyghur jem'iyiti 5-ayning 14-künidin 17-künigiche échilidighan 4-nöwetlik qurultay we 6-nöwetlik Uyghur rehberlerni terbiyilesh kursini ongushluq ötküzüsh üchün jiddiy teyyarliq körüwatqan bir waqitta, xitay hökümitining yuqiridiki chaqiriqliri yighinning échilishigha tosalghu bolalamdu? yaponiyidiki alaqidar shexs we orunlar dunya Uyghur qurultiyining yighinigha qandaq mu'amilide boluwatidu?

Biz bularni bilip béqish üchün aldi bilen yaponiye Uyghur jem'iyitining bashliqi ilham mexmut ependige téléfon qilduq.

Ilham mexmut ependi bu yil 5-ayning 14-künidin 17-künigiche yaponiyide échilmaqchi bolghan dunya Uyghur qurultiyi 4-nöwetlik wekiller qurultiyi we shundaqla 6-nöwetlik Uyghur rehberlerni terbiyilesh kursining teyyarliq xizmetlirining ongushluq halda élip bériliwatqanliqini bildürdi.

Ilham mexmut ependining bildürüshiche, xitay tashqi ishlar ministirliqidin bérilgen bu bayanat yaponiye metbu'atliriningmu alahide diqqitini qozghighan bolup, bu xewerlerde yaponiye tashqi ishlar ministirliqining bu heqtiki köz qarishi neqil keltürülgen.

Ilham mexmut ependi sözining axirida, yaponiye hökümiti we xelqining hazirghiche Uyghurlarning kishilik hoquq dawasini qollap kelgenlikini, emma dunya Uyghur qurultiyining yaponiyide yighin chaqirishining tunji qétimliq bir weqe bolushi we shundaqla yaponiye-xitay munasiwetliri jehettin qarighanda, 5-ayda chaqirilidighan bu yighinning yaponiyining démokratiyisini sinaydighan bir sinaqqa aylan'ghanliqini we herqaysi döletlerningmu yaponiyining bu mesilige qandaq mu'amile qilidighanliqigha alahide qiziqiwatqanliqini eskertti.

Dunya Uyghur qurultiyining bash katipi dolqun eysa ependi yaponiyidiki bu yighinning teyyarliq xizmetlirini közdin kechürüsh, békitip resmiyleshtürüsh üchün téxi yéqinda yaponiyige bérip qaytip keldi. Dolqun eysa ependi bu jeryanda yaponiye Uyghur jem'iyitining bashliqi ilham mexmut ependi bilen birlikte yaponiyidiki Uyghur dawasigha qiziqidighan her sahe erbablar bilen uchrashqan we yaponiyidiki metbu'at, axbarat organlirining ziyaretlirini qobul qilghan. Biz dolqun eysa ependidin yaponiyidiki xizmetlerni közdin kechürüsh jeryanida némilerni hés qilghanliqini soriduq. U özining bu qétimliq yaponiye ziyaritide yaponiyide Uyghur dawasigha bolghan qiziqishning artiwatqanliqini, yaponiyidiki herqaysi sahediki siyasiy erbablarning, axbarat organlirining bu mesilige qiziqishining artqanliqini hés qilghanliqini bildürdi.

Uning bildürüshiche, yaponiyide 4-ayning 14-küni dunya Uyghur qurultiyining pa'aliyetlirini qollash i'ane yighish pa'aliyiti ötküzülidighan bolup, buninggha Uyghur dawasigha qiziqidighan parlamént ezaliri qatnishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.