Хәлқаралиқ муһакиминиң йәкүни 'уйғурлар террорчи әмәс, хитайниң дөләт террорчилиқиниң бигунаһ қурбанлири'

Һөрмәтлик оқурмәнләр, дуняниң һәр қайси җайлиридин "хитай компартийиси ишғалийитидики шәрқий түркистанниң 60 йили" темисидики америкида уюштурулған хәлқаралиқ илмий муһакимә йиғиниға қатнишиватқан уйғур паалийәтчилири, тәшкилат рәһбәрлири асаслиқ мулаһизә қилған қизиқ нуқта, "хәлқара террорлуққа қарши урушниң уйғурларға көрсәткән тәсирлири," дегән тема болди.
Мухбиримиз гүлчеһрә
2009-05-20
Share
James-McGovern-Qurultay-Duq3-305 Сүрәт, 2009 - йили 21 - май, вашингтондики америка дөвләт мәҗлисидә ечиливатқан дунйа уйғур қурултийиниң 3 ‏ - нөвәтлик вәкилләр қурултийида, тәбрик сөзи қиливатқан америка авам палата әзаси җәмис мекгаврин вә йиғинға риасәтчилик қиливатқан алим сейтоф әпәнди сәһнидә.
RFA Photo / Erkin

Бу һәқтики доклат һәм муназириләрдә йиғин қатнашқучилириниң хуласиси бирдәк " уйғурлар террорчи әмәс, уйғурларни дуняға террорчи көрситишкә урунуватқан хитайниң өзи дөләт террорчилиқи йүргүзмәктә ..." Дегәнләр болди. Шундақла уйғур миллий һәрикити рәһбири рабийә қадир ханим уйғур паалийәтчилириниң бундин бурун, һазир һәм кәлгүсидики паалийитидә йәнила тинчлиқ йолида чиң турудиғанлиқидәк принсипни тәкитлиди.

19 - Май күни вашингитон әтрапиға җайлашқан NOVA али мәктипи мәдәнийәт мәркизидә давам қилған " коммунист хитай ишхалийитидики шәрқий түркистанниң 60 йили" темисидики хәлқаралиқ муһакимә йиғинида йиғин әһлиниң ортақ қизиқишини қозғиған асаслиқ муназирә темиси "хәлқаралиқ террорчилиққа қарши урушниң уйғурларға көрсәткән тәсири" дегән темини мәркәз қилди.

Мәзкур темини ядро қилип дуняниң һәр қайси җайлиридики уйғур тәшкилатиниң йиғинға қатнашқан асаслиқ рәһбәр вәкиллири, террорчилиққа қарши урушниң өзлири турушлуқ дөләтләрниң уйғурларға тутқан сиясәтлиригә көрсәткән сәлбий һәм иҗабий тәсири шундақла уларниң паалийитигә көрсәткән тәсирлири һәққидә доклатлар бәрди. Доклаттин кейин йәнә, гуруппилар бойичә кәң даиридә муназириләр бир нәччә саәт давамлашти.

Вақит мунасивити билән бир қанчә вәкилниң йиғинда бәргән доклатлиридин узундиләр аңлатмақчимиз.
Duq-NED-yighin-2nchi-kun-305
Сүрәт, бүгүн, 2009 - йили 19 - май, вашингтонда ечиливатқан "хитай коммунистлириниң ишғалийити астидики шәрқий түркистан" дегән темидики хәлқара муһакимә йиғининиң иккинчи күнидики йиғин ралидин бир көрүнүш.
RFA Photo

Хәлқаралиқ террорлуққа қарши урушниң оттура асия җүмлидин қирғизистанниң уйғурларға тутқан сиясәтлиригә көрсәткән сәлбий тәсирлири һәққидә доклат бәргән қирғизистан демократийә кишилик һоқуқ җәмийити рәиси турсун ислам әпәнди, ахирида сөзини "уйғурлар террорчи әмәс, әмәлийәттә хитай һәм униң шаңхәй һәмкарлиқ тәшкилатиға әза дөләтләр уйғурларға қарита дөләт террорчилиқи йүргүзмәктә" дегән җүмлигә йиғинчақлиди.

Түркийиниң истанбул шәһиридә паалийәт елип бериватқан шәрқий түркистан вәхпи баш секретари һамутхан көктүрк әпәнди, хитайниң түркийидә уйғур паалийәтчилирини террорчи көрситишкә урунуш һәрикәтлириниң хитайниң арзусидикидәк әмәс, бәлки әксичә тәсир бәргәнлирини баян қилип өтти.

Канададики уйғур паалийәтчилири вәкили мәмәт тохти әпәндиниң террорлуққа мунасивәтлик бәзи оқумларни қандақ муәййәнләштүрүш һәққидики баянлири, муһакимә йиғин мәйданидики муназириләрни юқири басқучқа көтүрди.

Норвегийә уйғур җәмийити рәиси сәмәт әпәнди хитайниң хәлқара террорлуққа қарши уруштин пайдилинип, уйғурларниң барлиқ йоллуқ һәрикәтлирини террорлуққа бағлап бастуруватқанлиқини шәрһиләп өтти.

Мәзкур муһакимә йиғинниң хуласиси сүпитидә тәклип билән сөзгә чиққан уйғур миллий һәрикити рәһбири рабийә қадир ханим, мәзкур хәлқаралиқ бүйүк йиғилиштин интайин мәмнун болғанлиқини ипадилиди һәм уйғур миллий һәрикитиниң " тинчлиқ" принсипидин чәтнимәйдиғанлиқини тәкитлиди.

Коммунист хитай һакимийити ишхалийитидики шәрқий түркистанниң 60 йили " темисидики хәлқаралиқ муһакимә йиғини 19 - май вашингитон вақти чүштин кейин 5 тә ғәлибилик тамамланди.

Йиғин қатнашқучилириниң паалийәт күн тәртипи бойичә улар 20 - май пайтәхт вашингитонда бир қатар муһим зиярәт паалийәтлиридә болиду шундақла улар 21 - май күни ечилмақчи болған дуня уйғур қурултейиниң 3 - нөвәтлик вәкилләр қурултейиға қатнишишниң тәйярлиқида.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт