D u q wekilining yawrupa birligidiki xizmetliri ünümlük élip bérilmaqta
Muxbirimiz eqide
2010.10.14
2010.10.14

Süretni memet toxti ependi teminligen.
U yawrupa birliki we yawrupa komisyunidiki xitaygha munasiwetlik siyaset belgileydighan shuningdek bu heqte sözlesh heqqi bar yuqiri derijilik xadimlar bilen uchriship, Uyghur xelqining hazirqi muhim weziyitini anglitish bilen birge, Uyghur milliy herikitining rehbiri rabiye qadir xanimning xitay türmisige qamilip, dawalinish heqqige érishelmeywatqan oghli alim abduréhimning weziyitige köngül bölüshini telep qildi.
Yawrupa birliki, yawrupa birlikige eza 27 döletning omumiy gewdisi süpitide qurulghan bolup, yawrupa birliki yene ortaq parlamént we ortaq hökümetke ige, yawrupa komisyuni dep atilidighan yawrupa hökümitidin sirt, yawrupa birlikining aliy soti, yawrupa aliy kéngishi qatarliq xizmet organliri tesis qilin'ghan, bu organlarning hemmisi pütün yawrupa birlikige eza döletlerdin kelgen wekillerning ortaq ishtiraki hemde maqulluqi bilen yawrupa birlikige munasiwetlik halda qararlarni békitish, siyaset yürgüzüsh wezipilirini öteydu. Buning ichide xitay bilen bolghan munasiwetmu yawrupa birlikining muhim siyasetliridin biri hésablinidu.
Shunga dunya Uyghur qurultiyi hem yawrupa parlaméntida hem yawrupa komissiyunida pa'aliyet élip bérishni nöwettiki eng muhim xizmet kün tertipige kirgüzüp, memet toxti ependini mexsus yawrupa birlikide Uyghur dawasini tonushturush pa'aliyiti élip bérishqa belgiligen.
40 Kunlük xizmet pa'aliyiti heqqide melumat bergen memet toxti ependi, yawrupa parlaménti we yawrupa komisyunidiki muhim erbablar bilen körüshüp söhbet élip barghandin bashqa, yawrupa birlikining tashqi siyasetlirige biwaste tesir körsitidighan, muhim istratégiyilerni belgileydighan tetqiqat organliri bilen alaqe ornitip tégishlik xizmetlerni élip bériwatqanliqini bildürdi.
Memet toxti ependi sözide yene, 14 - öktebir küni yawrupa parlaméntidiki asasliq ezalar, bolupmu tashqi ishlar komitéti we insan heqiliri komitétining re'isi we mu'awin re'isi qatarliq kishiler bilen uchriship, yawrupa komisiyunidin, Uyghur mesililiri heqqide konkrét so'allarni sorash toghrisida iltimas sun'ghanliqini bildürdi.
Memet toxti ependining éytishiche, yawrupa birlikining tashqi ishlar komitéti bilen insan heqliri komitétining Uyghurlargha qaratqan yardimini kücheytish üchün bir qatar xizmetler ishlen'gendin sirt, yalghuz yawrupa parlaméntiningla emes, belki yawrupa komisyuniningmu Uyghurlar üchün köngül bölüshini qolgha keltürüsh pilanliri tüzülüwatqanliqini bildürdi.
Dunya Uyghur qurultyining wekili memet toxti ependi, yawrupa birlikide Uyghurlarning siyasiy weziyitini yaxshilash üchün élip bériliwatqan xizmetlerning ünümlük netije béridighanliqidin ümidwar ikenlikini tekitlimekte.
Yuqiridiki awaz ulinishidin, bu heqtiki melumatimizning tepsilatini anglaysiler.