D u q xitayning Uyghurlarni xelq'aragha térrorchi qilip körsetmekchi boluwatqanliqini eyiblidi

YouTube Din élinghan bu süretler kirishtürmiside, 5 - iyul ürümchi qanliq weqesidin kéyin chetel metbuatlirining xewerliride bérilgen körünüshler, yeni 7 - iyul künidiki uyghur ayallirining namayishi jeryanida ayallar we balililarning uchrighan muamilisi, 13 - iyul küni yüz bergen xitay saqchilirining 2 uyghurni étip öltürgelik weqesi, shundaqla 6 - iyuldin kéyin, ürümchidiki xitay puqralirining qandaq qorallanghanliqi we urümchi kochilirida uyghurlarni "owlap" yürüp, uyghurlarni urup öltürüshliri körsitilgen.

Yéqindin buyan xitay hökümet agéntliqlirining xewerliride Uyghur aptonom rayonining ürümchi, xoten, aqsu, sanji, altay qatarliq sheherliride "yingne sanjish weqesi" yüz bérip, kishilerde qorqunch peyda qilghanliqini, hökümetning bu weqeni "térrorluq qilmishi" dep békitip, jinayet gumandarliridin 75 neperni qolgha élip, buning 3 nepirige höküm élan qilghanliqini xewer qilghan idi.

Shundaqla yene, xitay hökümet agéntliqlirining 16 - séntebir künidiki xewiride, shinjang saqchi nazaritining aqsu wilayiti teweside partlatquch bomba yasaydighan bir guruhni pash qilip 6 neper jinayet gumandarini qolgha alghanliqini élan qilghan idi.

Dunya Uyghur qurultiyining bayanatchisi dilshat rishit ependi b b s agéntliqi we erkin asiya radi'o istansisining Uyghur bölümining ziyaritini qobul qilghinida, inkas qayturup, Uyghurlarning tinchliq bilen özining kishilik heq ‏ - hoquqliri üchün küresh qiliwatqanliqini, xitay hökümiti hazir türlük amal - charilerni ishqa sélip Uyghurlarni xelq'aragha térrorchi qilip körsetmekchi boluwatqanliqini, emeliyette xitay hökümitining özi dölet térrorchiliqi bilen shughullinip Uyghurlar üstidin dölet térrorluq yürgüzüwatqanliqini bayan qildi.

Dilshat rishit ependi xitay hökümitining bügün 16 - séntebir küni Uyghur aptonom rayonining aqsu shehiride, 6 kishidin terkip tapqan bir partlatquch dora yasash guruhining pash qilin'ghanliqi heqqidiki xewiri heqqide toxtilip,  bu xewerning ishenchlik derijisining tolimu töwenlikini, dunya Uyghur qurultiyining aqsudiki jama'et xewpsizlik idarisi qatarliq orunlargha téléfon urup, bundaq bir guruhning pash qilin'ghanliqi heqqide hetta aqsu da'iriliriningmu xewiri yoqluqini bayan qilip, xitay hökümitining öz xelqinila aldap qalmastin, xelq'araghimu yalghan xewer tarqitish arqiliq Uyghurlargha mejburiy halda térrorluq qalpiqi kiydürmekchi bolghanliqini eyiblidi.

Dilshat rishit ependi xitay hökümet da'irilirining bu xil bir tereplimilik xewer tarqitishtiki heqiqiy meqsiti heqqide toxtilip, xitay hökümet da'irilirining "5 - iyul ürümchi weqesi" hem bu yil séntebirde yüz bergen xitay puqralirining namayishigha seweb bolghan "yingne sanjish weqesi"heqqidiki teshwiqatlirida Uyghurlarni térrorluq pa'aliyiti bilen shughullanmaqchi dégen bolsimu, bu teshwiqatigha xelq'ara jama'etchilikila emes, hetta xitay xelqining özinimu ishendürelmigenliki üchün, barliq wastilarni ishqa sélip Uyghurlarni térrorluq pa'aliyiti bilen shughullan'ghan qilip körsitishke urunush arqiliq, xelq'ara jama'etning eyiblishidin qutulmaqchi boluwatqanliqini körsetti.

Dilshat rishit ependi ziyaritimiz axirida, xitay hökümitining uchurlarni kontrol qilip, özining heqiqaniy teleplirini otturigha qoyuwatqan Uyghurlarni qanliq basturuwatqanliqini qanunlashturmaqchi boluwatqan qilmishigha nisbeten, xelq'ara jem'iyetlerning we döletlerning derhal tedbir qollinip, Uyghur élige tekshürüsh guruppisi ewetip, mesilining heqiqiy mahiyitini éniqlap, xitay hökümitining térrorchiliqni bahane qilip, Uyghurlar üstidin élip barmaqchi bolghan téximu zor qanliq basturushining aldini élish kéreklikini tekitlidi.