Erzdar emet qasim da'iriler bilen tölem puli heqqide sodilashmaqta

Emet qasim 2000-yili 32 xalta bughdiyini étizdin sheherge epkétiwatqanda, aqsu sheherlik bazar bashqurush xadimliri uni hayankeshlik bilen eyiblep, mehsulati bilen birlikte ijarige alghan yük aptomobilinimu tartiwalghan. Emet qasim mal-mülkining qanunsiz igiliwélin'ghanliqi üstidin sotqa erz qilghan. Dawa sozulup 9 yil ichide jem'iy 7 qétim sot échilghan. Deslepki besh qétimliq sotta, emet qasimning dawasi ret qilin'ghan؛ kéyinki qétimliq sotta, sot emet qasimning dawasini toghra dep höküm chiqirip, aqsu sheherlik bazar bashqurushni 110 ming yüen tölem töleshke buyrughan bolsimu, höküm aqmighan. Buning bilen emet qasim qanun organlirigha dawa qilishtin waz kéchip, memuri organlargha dawa échishqa bashlighan. U béyjinggha 10 qétimgha yéqin barghandin kéyin, béyjingdin 5 qétim tutup kélinip, bu qétim méhmanxanigha qamalghan.

Emet qasimning bildürüshiche, bügün uning aqsudiki seltenet méhmanxanisida tutup turuluwatqinigha 16 kün boldi. Tünügün 10 nechche kishilik bir guruppa uning bilen söhbetliship, 200 ming yüen tölemge razi bolushni éytqan. Emet qasim buni ret qilghan. Chünki u ijarige alghan aptomobil 5 yildin artuq qanunsiz tutup turulghan bolup, u aptomobil igisige tölem bérishi kérek؛ uning bildürüshiche, 200 ming yüen pul bu tölemge boylimaydu. U yene 12 yildin béri dawa ishliri bilen köp miqdarda iqtisadiy ziyan'gha uchrighan. Shunga bu pul bu ziyannimu qaplimaydu.

Emet qasimning bildürüshiche, 2007-yili sotning hawalisi boyiche, aqsu sheherlik mal baha idarisi uning tartqan ziyanlirini hésablap chiqqan, hésabta uningdin tartiwélin'ghan aptomobilning bir yilliq ijare tölem pulila 105 ming yüen qilip békitilgen we sot 2007-yilidiki hökümide emet qasimgha 700 nechche ming yüen tölem bérilishni buyrughan؛ emma bu hökümmu ijra tapalmighan. Emet qasim shu yili bir adwokat bilen kélishken؛ adwokat özining tékestiki bir xitay dewagerge aptomobilini bir yil heqsiz ishlitiwalghan Uyghur jawabkardin bir yilliq ziyini üchün 900 nechche ming yüen tölem élip bergenlikini éytqan we emet qasimghimu shu boyiche tölem élip bérishke wede bérip sotqa kirgen. Sotta adwokat melum kishiler teripidin chetke tartilip quliqigha pichirlan'ghandin kéyin, u özining bu ishqa arilashmaydighanliqini bildürüp, adwokatliqtin waz kechken. Shunga emet qasim bügün qanunning aldida hemme kishi, hemme milletning barawer bolalmaywatqanliqini erz mezmunining muhim qismigha kirgüzgen.

Emet qasim tutup turuluwatqan méhmanxana, aqsu sheher igerchi baziridiki seltenet méhmanxanisi, melum bolushiche, u bu méhmanxanida, mesilisi hel bolghuche yeni yene 15-20 kün etrapida tutup turulmaqchi. Eger ikki terep kélishelmise, emet qasim qamaqxanigha apirilamdu yaki a'ilisige qoyuwétilemdu؛ eger u dawamliq béyjinggha erz üchün méngip qalsa teqdiri qandaq bolidu? mana bu, emet qasimning dawa hayatining buningdin kéyinki jiddiy we sezgür qisimliri.