Әнәнигә варислиқ қилиш билән үлгилик ролниң бирлики

Әнәнигә варислиқ қилиш дегәнлик һәргизму еғиз арқилиқ сөзләп қоюп әмәлийәттә көрсәтмәстин, қуруқ варислиқ қилишни көрсәтмәйду. Чүнки бир нәрсигә варислиқ қилиш уни җарий қилдуруш вә яшитишни тәқәзза қилиду.
Мухбиримиз өмәрҗан тохти
2009-03-30
Share

Ана вәтәнниң охшаш болмиған билимгаһлирида оқушини пүттүргәндин кейин, мәккә мукәррәмә шәһиридә илмий хизмәтләр билән шуғуллиниватқан абдулла һаҗим иман вә униң җәмийәттики роли һәққидики сөһбитимизни қобул қилған иди.

Абдулла һаҗим билән сөһбәт

Абдулла һаҗим мундақ диди:" мусулманларниң дини уларни кәмбәғәлләрни йөләп, хейимхәтәргә учриғанларни қутқузушни, күчлүкләрниң зулумлириға қарши чиқип, аҗизларға тәрәпдар болушни, кәң қорсақ, мәрданә болуш, кишиләргә хошаллиқ елип келиш, һесдашлиқ роһиға бай болуштәк әнәниви гүзәл әхлақларға варислиқ қилиш вә җарий қилдурушни, һәқиқәт йолида өзини қурбан қилалайдиған пидакарлиқ роһқа, җапа - мушәққәттин қорқмайдиған пәзиләткә вә иттипақлишип алға илгирләйдиған идийигә болушни тәләб қилиду. Шуңа қуран кәримдә:' силәр яхши ишқа вә тәқвалиққа ярдәмлишиңлар, гунаһқа вә зулумға ярдәмләшмәңлар' дәп көрситилгән".

Чоңлар кичикләргә үлгә яритиши лазим

Абдулла һаҗимниң ейтишичә, мусулманлардин чоңлар әхлақий җәһәттики тәрбийисини кейинки әвладқа мирас қалдуруш, балиларни яхши тәрбийиләп, уларға үлгә болуш мәсулийитигә игә. Пәйғәмбәр әләйһиссалам мундақ дегән:" силәр худди падичиға охшайсиләр, падичи өзиниң падилириға мәсул болғандәк, силәрму илкиңлардикиләргә мәсулсиләр" дәп көрсәткән.

Мусулманлар өзлириниң есил әхлақ қурулуши арқилиқ җәмийәткә, дәвргә маслишишниң зөрүрликини яхши билиду. Шуңа улар бу дунялиққа актип қатнишиш пузитсийисидә туруп, йүксәк әхлақ тәбиити вә сәмимий кәсипчанлиқ роһи билән бу дуняда пүткүл яхши ишлар вә нәрсиләрни яритиш билән мәшғул болуш, инсанлар җәмийитидә инақ, достанә, азадә, бир - бириниң һалиға йетидиған бир үлгилик җәмийәт яритишни нишан вә ғайә қилиду.

Мусулманларниң һәр ишта үлгә болиши тәләб қилиниду

Мусулманларниң әқидисидә кишилик мунасивәт вә ишларни бир тәрәп қилиш җәһәттә сәмимий садиқ болуш, чоңларни һөрмәтләп, кичикләрни асраш, ата - аниға вападар болуш, содида адаләтлик, таразида растчил болуш, һәр ишта пак - диянәтлик болуш қатарлиқ бир қатар принсиплар қаттиқ тәшәббус қилиниду. Бу ишлар ахирида иҗтимаий омумий әхлақ вә мәниви мәдәнийлик болуп гәвдилиниду.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт