Әнглийә пуқраси һейвутниң чуңчиңдики өлүми бо шиләйгә четилидиған вәқә икәнлики һәққидики учурлар

Түнүгүн әнглийидә чиқидиған “TV хәвәрлири гезити” дә “бир әнгилийиликниң гуманлиқ өлүми-бо шиләйгә четилидиған вәқә” сәрләвһилик мақалә бесилған иди. Бүгүн “телеграф гезити”дә, әнглийә һөкүмити хитайдин, бо шиләйниң чуңчиң шәһиридә йүз бәргән әнглийә пуқраси һейвутниң өлүм вәқәсини тәкшүрүшни тәләп қилғанлиқи һәққидә бир хәвәр елан қилинди. Америкида чиқидиған “вол стрит журнили”, “лос анҗилис вақит гезити” диму, “тәйвән хәвәрлири гезити”, “ройтрс хәвәрлири” қатарлиқ кәң тарқилидиған чоң учур васитилиридиму бүгүн һейвутниң гуманлиқ өлүмигә мунасивәтлик тәпсилатлар елан қилинди.

Әнглийидә чиқидиған “малийә вақит гезити” бүгүн елан қилған “әнглийә пуқраси һейвутниң өлүми һәққидики тәпсилатлар барғансери ениқ болмақта” сәрләвһилик мақалидә баян қилинишичә, “ваң лиҗүн вәқәси” хитайниң сиясий сәһнисидә пәйда қилған шиддәтлик “йәр тәврәш” ниң тәпсилати һазир барғансери ениқ болуватиду. Учур васитилири дәсләптә хитайниң юқири қатлимидин кәлгән учурларға асасән, ваң лиҗүн бо шиләйниң аилисигә четилидиған делони беҗирип, бо шиләйни ғәзәпләндүрүп қойғандин кейин, у бихәтәрлики тәһдиткә учрап америка консулханисиға барған, дәп баян қилған иди. Йеқинда учур васитилири йәнә, бир әнгилийиликниң гуманлиқ өлүми бо шиләйгә четилидиғанлиқини ашкарилиди.

Хәвәрдә ейтилишичә, йиллардин буян бо шиләй аилиси билән йеқин мунасивәттә болуп келиватқан әнглийилик содигәр нейил һейвут бултур 11‏-айда чуңчиңдики бир меһманханида уштумтут өлүп кәткән, хитай даирилири униңға һарақни көп ичип өлгән дәп һөкүм чиқирип, җәсәтни дәрһал көйдүрүвәткән. Хитай һөкүмити һазир бу делони тәкшүрүшкә вәдә бәрди.

Б б с ниң баян қилишичә, чуңчиң шәһириниң сақчи башлиқи ваң лиҗүнниң разведчиклири бо шиләйниң хотуни гу кәйләйгә четилидиған делони беҗириштә қийналғанда, ваң лиҗүн бо делони бо шиләйгә доклат қилип йолйоруқ алған. Инглизчә чиқидиған “малийә вақит гезити” ниң чоң қуруқлуқтики мухбири яң хәйпең сина торида елан қилған хәвиридә ейтишичә, ваң лиҗүн беҗиргән делоларниң ичидә бо шиләй аилисигә четилидиған йип учи болғанлиқи үчүн, ваң лиҗүн нервиси чарчап кәтти, арам алиду дегән нам билән вәзипидин қалдурулған.

Хитайда инглизчә чиқидиған “шаңхәйликләр гезити” бүгүн “чуңчиңда өлгән әнглийилик содигәр җасусмиди?” сәрләвһилик бир мақалә елан қилди. Униңда баян қилинишичә, чуңчиңда мустәқил содигәр, тиҗарәт мәслиһәтчиси дегән кимлик билән туруватқили хели йиллар болуп қалған, хитайчини яхши сөзләйдиған һейвут әпәнди бо шиләйниң оғли бо гуагуаниң дости. У 2001‏-йили далйәндә турғандила, шәһәр башлиқи бо шиләй билән йеқин мунасивәт орнатқан. Бо шиләйниң оғли әнглийидә оқуш хираҗити юқири шәхсий мәктәпләрдә оқуған болсиму, әмма нәтиҗиси төвән болғачқа, америкиға берип харвард университетида оқуш үчүн бундақ әрбабларниң алаһидә ярдимигә моһтаҗ болған.

Б б с ниң баян қилишичә, бүгүн хитайниң “азадлиқ армийә гезити” һәрбий қисимлар коммунист партийигә шәртсиз бойсунуши керәк, дегән җиддий буйруқни йәткүзди. Бу, “ваң лиҗүн вәқәси” дин кейин хитай мәркизи комитетида партлиған һоқуқ уруши җиддийлишиватқанлиқи вә хитай һазир көп йиллардин буян көрүлүп бақмиған чоң идийиви қалаймиқанчилиққа дуч кәлгәнликиниң инкаси.