11 - ئاينىڭ 12 - كۈنى ئۇيغۇرلار ئۈچۈن تارىخى ئەھمىيەتكە ئىگە بىر كۈن. بۇ كۈن سابىت داموللام باشچىلىقىدىكى رەھبەرلەر 1933 - يىلى قەشقەردە، مەرھۇم ئېلىخان تۆرەم باشچىلىقىدىكى رەھبەرلەر 1944 - يىلى غۇلجىدا شەرقىي تۈركىستان جۇمھۇرىيىتىنى قۇرۇپ چىققان بىر كۈن.
بۇ كۈن ھەر يىلى دۇنيانىڭ ھەرقايسى جايلىرىدىكى ئۇيغۇرلار تەرىپىدىن خاتىرىلەنمەكتە. يىغىنلاردا ئۇيغۇر ياش ئۆسمۈرلىرىگە ئىككى جۇمھۇرىيەتنىڭ ئەھمىيىتى ئاڭلىتىلماقتا.
11 - ئاينىڭ 14 - كۈنى ئەنگىلىيە ئۇيغۇر جەمئىيىتىنىڭ ئۇيۇشتۇرۇشى بىلەن ئەنگىلىيىنىڭ پايتەختى لوندوندا شەرقىي تۈركىستان ئىسلام جۇمھۇرىيىتى بىلەن شەرقىي تۈركىستان جۇمھۇرىيىتىنى خاتىرىلەش شۇنداقلا قۇربان ھېيتنى تەبرىكلەش پائالىيىتى بىرلىكتە ئۆتكۈزۈلگەن.
بۇ يىغىنغا لوندوننىڭ مەركىزى ۋە ئەتراپىدا ئولتۇراقلاشقان ئۇيغۇرلاردىن بولۇپ يۈزگە يېقىن كىشى قاتناشقان. يىغىندا ئىككى جۇمھۇرىيەتنىڭ تارىخى ۋە ئۇيغۇر مىللىي كىملىكى ھەققىدە ئەزىز ئەيسا ئەپەندى دوكلات بەرگەندىن باشقا لوندون ئۇيغۇر ئانسانبىلى ئويۇن قويغان.
بىز بۇ پائالىيەت ھەققىدە تېخىمۇ تەپسىلىي مەلۇمات ئېلىش ئۈچۈن ئەنگىلىيە ئۇيغۇر جەمئىيىتى باشلىقى نىزامىدىن سەمەت ۋە يىغىندا دوكلات بەرگەن ئەزىز ئەيسا ئەپەندىلەر بىلەن سۆھبەت ئېلىپ باردۇق.
يۇقىرىدىكى ئاۋاز ئۇلىنىشىدىن، بۇ ھەقتىكى مەلۇماتىمىزنىڭ تەپسىلاتىنى ئاڭلايسىلەر.