Enqerede barin inqilabining 20 - yilliqi munasiwiti bilen namayish
Muxbirimiz erkin tarim
2010.04.05
2010.04.05

RFA Photo / Erkin Tarim
Namayishchilar qolida ay yultuzluq kök bayraq bilen türkiye bayriqini lozunkilarni kötürgen halda "térrorist qizil xitay sherqiy türkistandin chiqip ket! ya allah bismilla allahu ekber! shinjang emes sherqiy türkistan!" dégendek, sho'arlarni towliship xitaylarni eyiblidi.
Namayishqa qatnashqan yashlar hemme birdek sherqiy türkistan dawasi üchün küresh qilidighanliqigha qesem ichishti.
Namayishchilar qesem ichip bolghandin kéyin hayrullah efendigil ependi muxbirlargha bayanat berdi. U bayanatida xitaylarning barin weqeside nurghun bigunah yashlarni öltürüwetkenlikini, weqedin kéyinki 20 yil jeryanida bu qirghinchiliqning dawam qiliwatqanliqini, 5 - iyul ürümchi weqesining buning bir pakiti ikenlikini éytti.

Hayrullah efendigil ependi bayanatida yene, dunya döletlirini, bolupmu türk hökümitini xitaygha bésim ishlitishke chaqirdi. U sözining axirida dem élish küni démestin uzaq yerlerdin kélip bu namayishqa qatnashqan türklerge shundaqla muxbirlargha rexmet éytti. Namayish xitayning enqerede turushluq elchixanisining ishikige qara gülchembirek qoyush bilen axirlashti.
Türkiyide qara gül chembirek insaniyetke qarshi jinayet qilghanlarni eyiblesh üchün quyilidu.
Biz namayish jeryanida namayishchilarghimu mikrafonimizni uzattuq. Ali jan isimlik bir namayishchi mundaq dédi: "men xitaylarning qilmishlirini eyibleymen. Xitaylarning Uyghurlargha élip bériwatqan siyasetliridin derhal waz kéchishini telep qilimen. Bolupmu türk dunyasi bu mesilige köngül bölüshi kérek. Men bir ammiwi teshkilatning mes'uli bolush süpitim bilen her da'im Uyghurlarni qollap quwwetleydighanliqimni yene bir qétim tekitleymen."
Namayishqa qatnashqan Uyghurlarmu xitaygha bolghan ghezep nepretlirini ipadileshti.
Bu namayish d u q ning bir tutash orunlashturushi bilen sherqiy türkistan medeniyet we hemkarliq jem'iyiti enqere shöbisi mes'uli hayrullah efendigilning tirishchanliqi bilen uyushturulghan.
Yuqiridiki awaz ulinishidin, bu heqtiki melumatimizning tepsilatini anglaysiler.