Әнқәрәниң хоҗатәпә мәсчити вә хитай әлчиханиси алдида әркинлик мәшилини йәткүзүш намайиши өткүзүлди

Сүрәттә, 6 - айниң - 27 күни әнқәрәдә елип берилған олимпиккә қарши әркинлик мәшилини йәткүзүш намайишидин көрүнүш.

 Мәйдисигә `олимпиккә қарши туримиз` дегән хәт бесилған, дүмбә тәрипигә болса  көк байрақ вә `уйғурларға әркинлик` дегән сөзләр бесилип алаһидә тәйярланған ақ майкиларни кийишкән уйғур яшлири вә нурғунлиған уйғур достлири әнқәрә шундақла түркийиниң әң чоң җамәлиридин бири болған хоҗатәпә җамәсидә олимпик мәшилиниң уйғур дияридин өтүшигә наразилиқ билдүрүш намайиши өткүзди.

Намайишта хитайларниң уйғурларға елип бериватқан зулуми баян қилинған "көрүңлар бу вәһшийликни, шәрқий түркистанда немиләр болуватиду" темисидики тәшвиқ варақлири тарқитилди. Җүмә намизидин кейин уйғур диярида өлтүрүлгән шеһитләрниң намиға атап қуран оқулди. Җамәдин чиққан намайиш әһли кейин әнқәрәниң ғази осман паша мәһәллисигә җайлашқан хитай әлчиханисиниң алдиға йетип кәлди. Бу йәрни нурғунлиған сақчилар қоғдаватқан иди.

Хитай әлчиханиси алдидики бу намайишқа түркийә кадирлар уюшмиси әзалири, түркийиниң әнқәрә, қәйсәри вә истанбул шәһәрлиридин кәлгәнләрдин чоң‏ - кичик болуп 200 әтрапида киши қатнашти. Намайиш әһли бирдәк "шәрқий түркистанға әркинлик, хитайлар шәрқий түркистандин чиқип кәтсун, хитайда олимпик мусабиқиси өткүзүшкә рухсәт қилғанлар хитай қилған җинайәткә ортақ болған һесаблиниду, қатил хитай " дегәнгә охшаш шуарларни товлашти. Намайиш ахирида хитай әлчиханисиниң ишикигә қара гүлчәмбирәк қоюлди. Түркийидә қара гүлчәмбирәк инсанийәткә қарши җинайәт өткүзгәнләрни әйиблаш үчүн қойилиду.

Бу қетимлиқ намайиш дуня уйғур қурултийиниң бир туташ орунлаштурушиға асасән шәрқий түркистан мәдәнийәт вә һәмкарлиқ җәмийити әнқәрә шөбиси мәсули хәйруллаһ әфәндигилниң тиришчанлиқи нәтиҗисидә уюштурулди.

Д у қ муавин рәиси сейит түмтүрк әпәнди болса қәйсәридики намайишчи аммини тәшкилләп 3 аптовуз киши билән бу намайишқа аваз қошуш үчүн әнқәрәгә кәлди. У намайиш җәрянида мухбирларға баянат бәрди.

Юқиридики аваз улинишидин, мухбиримиз әркин таримниң нәқ мәйдандин әвәткән мәлуматиниң тәпсилатини аңлайсиләр.