Рәҗәб таййиб әрдуған падишаһ фәйсәл хәлқаралиқ мукапатиға еришти

7 - Айниң 8 - күни, түркийә баш министири рәҗәп таййип әрдоған үрүмчидики қирғинчилиқни "бу вәһшилик" дәп ейиблигән иди. Сүрәт, әрдоғанниң бүгүнки түрк мәтбуатлириға қилған байанатида, д у қ рәиси рабийә қадир ханимниң түркийигә келиши үчүн виза беридиғанлиқини ейтиватқан көрүнүш.

Лондонда чиқидиған "оттура шәрқ" гезитиниң 2010 - йили12 - январ санида, "әрдуған исламға хизмәт қилиш саһәсидә падишаһ фәйсәл хәлқаралиқ мукапатиға еришти" дегән мавзуда бир мақалә елан қилинған болуп, мақалидә мундақ дәп йезилған: "сәуди әрәбистанидики "падишаһ фәйсәл хәлқаралиқ мукапати" ға намзат көрситиш вә баһалаш комитети түркийә баш министири рәҗәб таййиб әрдуғанни "ислам дунясидики әң һушяр вә әң адаләтлик һакимийәт тутуш үлгиси" дәп баһалап, униңға 2010 - йиллиқ падишаһ фәйсәл хәлқаралиқ мукапатини беришни қарар қилди. Баһалаш комитети әрдуғанни ислам дунясидики әң һушяр рәһбәр, түрк хәлқиниң ишәнчисигә вә ислам дунясиниң тәқдиригә сазавәр болған үлгилик шәхс, мусулманларниң ишлириға йүрәктин көңүл бөлүши, хусусән пәләстин хәлқиниң һоқуқини тәләп қилишта алаһидә хизмәт көрсәткән һөкүмдар, мусулманлар ичидә ечиветиш вә мәсилиләрни диалог йоли билән һәл қилиш, дуня дөләтлири арисида өз ‏ -  ара һәмкарлиқни йолға қоюш җәһәтләрдә алдинқи қатарда туридиған сиясәтчи дәп тәриплигән."

Падишаһ фәйсәл хәлқаралиқ мукапатиниң тәсис қилиниши

Падишаһ фәйсәл хәлқаралиқ мукапати сәуди әрәбистаниниң сабиқ падишаһи мәрһум фәйсәл ибни абдуләзиз тәрипидин 1977 - йили тәсис қилинған болуп, исламға хизмәт көрсәткән, әрәб әдәбияти, медитсина вә һәр қандақ бир илим - пән саһәсидә утуқ қазанған кишиләрни мукапатлашни мәқсәт қилиду. Падишаһ фәйсәл хәлқаралиқ мукапати қурулған вақтидин та һазирғичә мусулманлар үчүн хизмәт қилған, ислам үчүн төһпә қошқан, һәр қайси илм - пән саһәлиридә отуқ қазинип инсанийәт үчүн мәнпәәтлик ишларни қолға кәлтүргән шәхсләрни мукапатлаш ишини һәр йили елип бармақта. Мәлумки, падишаһ фәйсәл хәлқаралиқ мукапатиға исламға хизмәт көрситиш саһәсидә намзат болуп мукапатқа еришкәнләр һазирғичә асасән ислам дөләтлириниң муптилири, рәис җумһурлири вә дуня етирап қилған катта өлималардин таллинип кәлгән чоң имтияздур.

Нөвәттә түркийә җумһурийитиниң баш министири рәҗәб таййиб әрдуғанниң бу шәрәпкә наил болғанлиқи дуня мусулманлирини, хусусән түркий хәлқләрни бәкрәк сөйүндүргән болушида шәк йоқ.

Мукапат миқдари

Падишаһ фәйсәл хәлқаралиқ мукапати мукапатқа еришкән кишиниң үлгилик иш - паалийәтлири вә униң бу мукапатқа наил болушиға түрткә болған чоң хизмити йезилған тәқдирнамә, еғирлиқи 200 грам келидиған сап алтундин ясалған мидал, 200 миң америка доллири қатарлиқлардур.

Юқиридики аваз улинишидин, бу һәқтики мәлуматимизниң тәпсилатини аңлайсиләр.