Әрдоғанниң сәуди әрәбистан зияритидин кейинки инкаслар

Түркийә җумһурийитиниң баш министири рәҗәб таййиб әрдоған 2012-йили 12-апрелдин 14-апрелғичә сәуди әрәбистанида рәсмий зиярәттә болған.
Ихтиярий мухбиримиз өмәрҗан
2012.04.16
Share on WhatsApp
Share on WhatsApp
erdoghan-seudida-305.jpg Рәҗәб таййиб әрдоған сәуди әрәбистанниң падишаһи абдулла билән сүрийә мәсилиси һәққидә сөһбәттә. 2012-Йили 13-апрел, сәуди.
AFP

Зиярәт җәрянида сәуди әрәбистанниң падишаһи абдулла билән сүрийә кризиси тоғрилиқ муһим мәсилиләр үстидә сөһбәт өткүзгән вә 14-апрел (шәнбә) әтигән түркийигә қайтқан иди.

Сәуди әрәбистаниниң тәшвиқат васитилири, әрдоғанниң нөвәттики сәуди әрәбистан зияритини зор әһмийәткә игә тарихий зиярәт, дәп тәриплигән вә бу зиярәтниң түркийә җумһурийити билән сәуди әрәбистаниниң сүрийә кризисини һәл қилиш, һәммидин аввал сүрийидә қан төкүлүшниң алдини елиш йолида җиддий һәрикәт қиливатқанлиқиниң бир ипадиси икәнликини сөзлигән иди.

Сәуди әрәбистанида чиқидиған оказ гезити рәҗәб таййиб әрдоғанниң 14-апрел күни сәуди әрәбистанидин айрилиш алдида мухбирларға бәргән баянатини елан қилған болуп, әрдоған баянатида, түркийә һөкүмитиниң сүрийә кризисини һәл қилиш вә сүрийидики чарисиз хәлқни әсәд қәтлиамидин қутқузуш йолида сәуди әрәбистани билән йеқиндин һәмкарлишишни халайдиғанлиқини вә шу сәвәб билән бу зиярәтниң әмәлгә ашқанлиқини, шундақла нөвәттики зиярәтниң түркийә-сәуди әрәбистан икки дөләт оттурисидики һәмкарлиқни вә достлуқни күчәйтидиғанлиқини ейтқан.

Лондонда чиқидиған әл һаят гезитиниң 2012-йили 16-апрел дүшәнбә күнидики санида, “әрдоған билән падишаһ абдулланиң тиришчанлиқи” дегән темида бир мақалә елан қилинған болуп, мақалидә мундақ дәп йезилған:
“әрдоған билән абдулланиң сөһбити сүрийә мәсилисигә мәркәзләшкән болуп, улар сүрийидин қошна дөләтләргә панаһ издәп көчүш қилған сүрийиликләргә ярдәм қилиш, сүрийә һакимийитигә адәм өлтүрүшни тохтитиш һәққидә бесим ишлитиш, бирләшкән дөләтләр тәшкилатиниң вә әрәб дөләтлири иттипақиниң сүрийә һәққидә чиқарған қарарлирини әмәлгә ашуруш йолида күч чиқириш қатарлиқ мәсилиләр һәққидә сөзләшкән. Түркийиниң заман гезитидә ейтилишичә, әрдоған билән падишаһ абдулла иранниң атом кризиси һәққидиму сөзләшкән.”

Әрдоғанниң зиярити истратегийилик зиярәт

Мақалидә йәнә мундақ дәп йезилған:
“әрдоған мундин илгири сәуди әрәбистанида бир қанчә қетим рәсмий зиярәттә болған болсиму, бу қетимқи зиярити һәқиқәтән җиддий вә истратегийә зиярәт иди. Сәуди әрәбистан рәһбәрлириму ишниң әһмийитини билгәнликтин, бу қетим әрдоғанни алаһидә чоң алқишлар билән қарши алди. Падишаһ абдулла әрдоғандин қаттиқ мәмнун болғанлиқини сөз билән ипадилигәндин ташқири, уни рияд шәһиридики тәбиәт мәнзирилирини вә гүзәл бағчиларни саяһәт қилишқа тәклип қилип униң билән биллә болди вә икки рәһбәр наһайити узун-узун сөһбәтләрни өткүзди. Униң үстигә әрдоған сәуди әрәбистанида һөкүмәт вә хәлқ тәрәптин бирдәк сөйүлгән бир катта шәхсийәт. Қисқиси, әрдоғанниң нөвәттики сәуди әрәбистан зиярити истратегийә бир зиярәт болди.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.