Әрәб дөләтлири иттипақиниң җиддий йиғини

Сүрийә вәзийити күндин-күнгә яманлишип кетиватқан болуп, кейинки вақитларда әсәд һакимийити өз хәлқини қиришта техиму бир пәллә илгириләп кәткән.
Ихтиярий мухбиримиз өмәрҗан
2011.12.13
Islam-elliri-ittipaqining-jiddiy-yighini-305.jpg 2011-Йили 23-июл билән 25-июл арисида ечилған сәуди әрәбистаниниң мәккә мукәррәмә шәһиридә ислам әллири иттипақиниң җиддий йиғини.
RFA/Omerjan

Мундин илгири әрәб дөләтлири иттипақи сүрийини хәлқни қиришниң яман ақивитидин агаһландурған вә ахирида сүрийигә җаза қолланған иди. Әмма әрәб дөләтлириниң сүрийигә җаза қоллиниши әсәд һакимийитини пәйлидин яндуралмиди. Йәнә охшашла хәлқни қиришқа давам қилди. Бу сәвәбтин әрәб дөләтлири иттипақи сүрийә һакимийитиниң мәвқәсигә қарши чарә қоллиниш вә әрәб дөләтлири иттипақи тәрипидин сүрийигә тәкшүрүш гурупписи әвәтиш мәсилини сөзлишиш үчүн чоң йиғин чақиришни қарар қилған.

Сәуди әрәбистанида чиқидиған “әл вәтән” гезитиниң 2011-йили13-декабир санида “әрәб дөләтлири иттипақиниң чақирилмақчи болған җиддий йиғини вә сүрийиниң инкаси” дегән темида мисирлиқ салаһ җүмә тәрипидин бир мақалә елан қилинған. Мақалидә мундақ дәп йезилған: “әрәб дөләтлири иттипақи қатар дөлитиниң риясәтчиликидә алдимиздики шәнбә 17-декабир күни әрәб дөләтлири иттипақиниң қаһирә шәһиридики мәркизидә җиддий йиғин чақиришни қарар қилди. Йиғинниң биринчи мәқсити сүрийә вәзийити һәққидә издиниш болса, иккинчи мәқсити сүрийигә әрәб дөләтлири иттипақи тәрипидин тәкшүрүш гурупписи әвәтиш мәсилини вә сүрийиниң бу мәсилә һәққидә қойған шәртлирини сөзлишиштур. Әслидә сүрийә һакимийити сүрийигә әрәб дөләтлири иттипақи тәрипидин мәхсус тәкшүрүш гурупписиниң беришиға қошулған болсиму, униңға бәзи шәртләрни қойған. Мундин илгири сүрийә һакимийити әрәб дөләтлири иттипақиниң бу тәлипигә қулақ салмиған болсиму, ахирқи күнләрдә сүрийә ташқи ишлар министири вәлид муәллимниң тили билән қоллайдиғанлиқини билдүргән. Әмма тәкшүрүш гурупписи үчүн бәзи шәртләрни қойған. Нөвәттики җиддий йиғинда сүрийиниң бу шәртлири тартишилидиғанлиқи ениқ.”

Сүрийә мәсилиси асан һәл болидиғандәк әмәс

Мақалидә йәнә мундақ дәп йезилған: “тәһлилчиләргә көрә, нөвәттики сүрийә кризисини оңлаш анчә асан әмәс икән. Чүнки әрәб дөләтлири иттипақи бу кризисни һәл қилиш үчүн тиришип кәлгән билән, сүрийидики әсәд һакимийитиниң кризисни һәл қилишқа йеқинлашмаслиқи вә әрәб дөләтлири иттипақи билән маслашмаслиқи, униңдин башқа сүрийидики намайишчи хәлқ ичидики бөлүнүшләр, һәтта әрәб дөләтлири иттипақиға әза дөләтләр оттурисидики бөлүнүшләр вә бир-биригә қарши пикирләр, хитай билән русийиниң сүрийә һакимийитини қоллап турувелиши қатарлиқ сәвәбләр сүрийә мәсилисини арқиға созувәткән. Шу сәвәбтин намайиш чиққан9 айдин бири сүрийә вәзийитидә чоң илгириләш болмиған. Әмма явропа дөләтлири америка қошма штатлири мәсилини бирләшкән дөләтләр тәшкилатиға мураҗиәт қилиш яки сүрийидики намайишчиларниң қоли билән әсәд һакимийитини ағдуруш арқилиқ һәл қилиш тәрәпдари болмақта. Бу пикирни әрәб дөләтлириму бирдәк қоллайду. Ахирида һәммә бу пикиргә келидиғанлиқи ениқтәк көрүниду.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.