Amérika dölet mejlisi ezasi kris smis "Yer shari alaqe tori erkinliki qanun layihesi"ni otturigha qoydi

Amérika dölet mejlisining xitay komitéti bashliqi, jumhuriyetchi smis ependining amérika dölet mejlisige "Yer shari alaqe tori erkinliki heqqidiki qanun layihesi"ni sundi.
Muxbirimiz weli
2011-12-09
Share
chris-smith-gofa-305.png Sürette kirs smis ependi söz üstide
house.gov

Fransiye xelq'ara radi'o istansisi, gérmaniye awazi radi'o istansisi, yer shari tor géziti qatarliq uchur wastiliri bügün, amérika dölet mejlisi ezasi, amérika dölet mejlisining xitay komitéti bashliqi, jumhuriyetchi smis ependining amérika dölet mejlisige "Yer shari alaqe tori erkinliki heqqidiki qanun layihesi"ni sun'ghanliqi heqqide xewer élan qildi.

Fransiye xelq'ara radi'o istansisining bügünki xewiride bayan qilinishiche, amérika dölet mejlisi ezasi, amérika dölet mejlisi xitay komitétining bashliqi jumhuriyetchi kris smis amérika dölet mejlisige "Yer shari alaqe tori erkinliki qanun layihesi"ni otturigha qoydi. Bu qanun layihesi amérika pay bazirida tijaret bashlighan her qandaq intérnét tor - alaqe shirkitidin, mustebit hökümetlerning xelqning intérnét tor - alaqisini cheklishige, bolupmu shexsiylerning tor - alaqe uchurlirini iz - qoghlap biliwélishigha we ularni qoghlap tutushigha yardemleshken yaki yardemleshmigenlikini ochuq jakarlashni telep qilghan. Shundaqla yene, yershari intérnét tor - alaqisi yolgha qoyuwatqan shirketlerge, ilghar téxnika we mehsulatlirini démokratiyini chekleydighan, xelqning pikir erkinlikini basturidighan döletlerge ikisport qilish we bundaq döletlerning téxnika xadimlirini terbiyilep bérish jehette qattiq cheklime qoyulghan.

Xewerde éytilishiche, yillardin buyan xelq'aradiki kishilik hoquq mesililirige köngül bölüp kéliwatqan amérika dölet mejlisi ezasi kris smis ependi, amérika dölet mejlisige bu qanun layiheni otturigha qoyghanda, xitayning amérikida tijaret qiliwatqan "Beydu", "Siké" dégen shirketlirining, démokratiyini basturush jehette hökümetke yardemlishidighan kesplirini we yardemlishiwatqan xadimlirini amérika pay tijariti komitétigha melum qilishi lazimliqini körsetken.

Gérmaniye awazi radi'o istansisining bayan qilishiche, amérika dölet mejlisi ezasi, pishqedem jumhuriyetchi smis ependi amérika dölet mejlisige "Yer shari alaqe tori erkinliki qanun layihesi"ni otturigha qoyushtin burun, bu yil 4 - aydimu, amérika dölet mejlisige yer shari alaqe tori erkinlikini qoghdash toghrisida teklip otturigha qoyghan. U eyni waqitta, amérika shirketlirining intérnét alaqe uchurlirini süzgüktin ötküzidighan herxil téxnika we mehsulatlarni xitaygha sétip bermeslikni, amérika hökümitige intérnét alaqe erkinliki mesililirini bir terep qilidighan mexsus organ tesis qilishni teshebbus qilghan idi. U, emdi bu qétim yene, amérikida tijaret qiliwatqan "Beydu" ni öz ichige alghan 17 xitay shirkitining hökümetke yardemlishidighan kesipliri we xadimlirini melum qilishi lazimliqini mu'eyyen otturigha qoydi.

Xewerde éytilishiche, amérika dölet mejlisi tünügün achqan kishilik hoquq buyiche ispat bérish yighinining xatirisidin qarighanda, amérika dölet mejlisi xitay komitétining bashliqi, pishqedem jumhuriyetchi kris smis ependi nahayiti semimiy we temkin teleppuz bilen, bezi amérika shirketliri intérnét alaqe torini kontrol qilish éqtidari bar téxnika mehsulatlirini xitaygha sétip bergen. Hazir pütün yer sharida intérnét alaqe tori nahayiti téz tereqqi qiliwatidu. Intérnét tereqqi qilghanséri, xitay xelqning pikir we saylam erkinlikidin shunche bek qorqiwatidu. Hazir amérika shirketlirining kishilik hoquqni depsende qilidighan mustebitlerge yantayaq bolush yaki bolmasliqini tallaydighan waqit, dep körsetken shundaqla yene, amérika shirketliri emdi, xelqning kilishilik hoquqini qoghdishigha yardemlishidighan, intérnétni kontrol qilmaqchi bolghanlarni meghlub qilidighan téxnika mehsulatliri bilen teminlishi kérek dep körsetken.

Bügün xitaydiki "Tyenya" tor géziti amérika dölet mejlisi ezasi kris smis ependining "Yer shari alaqe tori erkinliki qanun layihesi"ni otturigha qoyghanliqi heqqidiki xewerlerni köchürüp bashqandin kéyin, bu gézitte jiddiy munazire boldi. Uningdiki bir obzorda, amérikining ilghar intérnét téxnikilirining hemmisi hazir xitayning qolida, xitay bu qoral bilen dunyada allqachan "Ikkinchi chong" boluwaldi. Hazir her qandaq dölet xitayni aghduralmaydu, dése, yene bir obzorda, simis ependi otturigha qoyghan layihe emdi xitayning edipini béridu, dégen. Yene bir obzorda, mesile, xitayning xelqni basturidighan qatillirigha amérikigha erkin bérip kélish, téxnika oghrilash pursiti yaritip bériwatqan amérika köchmenler idarisida, dégen.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet