Béyjingdiki Uyghur erzdarlarni élip kétish üchün ewetilgen kadir saqchilar bilen erzdarlar otturisida talash - tartish dawamlashmaqta

Béyjing waqti 21 - iyun küni etigen sa'et 11 etrapida radi'omiz ziyaritini qobul qilghan ghazi aka, Uyghur erzdarlarning yenila siyasiy qanun komitéti aldida toplinip naraziliq herikitini dawamlashturuwatqanliqini bildürdi.

Ghazi akining bildürüshiche bügün da'iriler qoralliq saqchilarni ewetmigen. Emma meydanda ularni élip kétish üchün yerliktin ewetilgen on nechche saqchi hem kadir shundaqla puqrache kiyin'gen béyjing saqchiliri bar bolup, ular Uyghur erzdarlirini siyasiy qanun komitéti aldidin kétishke zorlighan.

Igiligen ehwallardin melum bolishiche, nöwette Uyghur erzdarliri bilen ularni qayturup kétish üchün kelgen kadir - saqchilar otturisida kétish sherti heqqide söhbet we talash - tartishlar dawamlashmaqta iken.

Ziyaritimizni qobul qilghan amine xanim qeshqerdin ewetilgen semen yézisining partkom sékrétari sali xudaberdi we yézining nopus ishlirigha mes'ul saqchisi tursun'gül bilen bolghan kétish sherti heqqidiki talash - tartishlarni bayan qildi.

Amine xanimni élip kétish üchün ewetilgenlerdin semen yézisidin kelgen ayal saqchi tursun'gül we özini qeshqerdin kelgen kadir dep tonushturghan abdughéni imin ziyaritimizni qobul qilip, qeshqer da'irilirining aminening erzini hel qilish kélishimini bayan qilip, amine xanimning erzini yerlikte hel qilidighanliqini bildürdi.

Emma amine xanim qeshqer da'irilirining ilgirimu bundaq wedilerni köp bergenlikini bayan qilip, yéza kadirining uning erzini hel qilish heqqidiki wedisige ishenmeydighanliqini bildürdi.

Yéqinqi birnechche yildin buyan erzi yerlik da'iriler teripidin basturup qoyulghan yaki adil bir terep qilinmighanliqi üchün, béyjinggha kelgen Uyghur erzdarlar barghanche köpeymekte. Ular béyjinggha kélip erz qilghandin kéyin, ularning ichide bir qismining erzi qaytidin körüp chiqilip, bezi shertliri hökümet da'iriliri teripidin qobul qilin'ghan. Emma béyjingda erzni dawamlashturuwatqan zor köpchilik Uyghurlarning erz - shikayetliri yenila adilliq bilen bir terep qilinmighan bolup, bu Uyghurlar eksiche her xil tehdit, popoza qilish hetta saqchilar teripidin tayaq yéyishtek qismetlerge duch kelgen. Lékin bu Uyghurlar özlirining heqqaniy telipining qobul qilinishigha bolghan ishenchini yoqatmighan bolup, ular hökümet da'iriliridin adalet telep qilishni dawamlashturmaqta.