Әрздар айгүл тохти сақчини бир тәстәк салди, әрзи үчкә көпәйди

Нәччә миңлиған хитай әрздарларниң бейҗиң шәһиридики көврүкләр астида топлишип яшиши хитай һөкүмитини бихәтәрлик нуқтисидин әндишигә салмиған; әмма 20 - 30 нәпәр уйғур әрздарниң бейҗиңниң чәт яқилирида чедир тикип кечини таңға улиши, хитайни дөләт бихәтәрлики вә җамаәт хәвпсизлики нуқтисидин әндишигә салған. Шуңа уйғур әрздарларниң чедири бу йил ичидә 3 қетим бузуветилгән. Ахирқи қетим чедири бузулуватқанда, әрздар айгүл тохти, хитай сақчини бир шапилақ урған. Буниң ақивитидә униң әрзи бирдин үчкә көпәйгән.
Мухбиримиз шөһрәт һошур
2011.12.02
beijing-petitioners-305-2.png Сүрәттә бейҗиңдики әрздарлар вә хитай сақчилири оттирисидики тоқунуштин бир көрүнүш
AFP

Бейҗиңдики уйғур әрздарларниң сани бәзидә 200 әтрапиға берип қалса, бәзидә 20 - 30ға чүшүп қалиду. Сандики төвәнләш һәргиз, сиясәттики өзгириштин яки мәсилилириниң һәл болғанлиқидин әмәс. Хитайниң һәр қетимлиқ дөләт вә миллий байрамлири, хәлқаралиқ тәнһәрикәт мусабиқиси вә көргәзмилири шундақла йәнә хитайниң партийә вә хәлқ қурултайлири, уйғур әрздарларниң бейҗиңдин һәйдилишигә сәвәб болиду. Хитай бултур йил ахиридин башлап, уйғур әрздарлар ичидики йетәкләш вә тәшкилләш иқтидариға игә болған ғоллуқ вә актип әрздарларға қарита нуқтилиқ зәрбә беришни башлиған. Хитай бу йилниң бешида өмәрҗан абла исимлик бир әрздарни әрздарларниң каттивеши дәп қарап қолға алған. Мәлум болушичә нөвәттә йәнә, тонулған әрздарлардин, турсун ғопур, айгүл тохти, халмурат вә гүлҗәннәт қатарлиқларму, хитайниң әрздарлар үчүн һазирлиған қара тизимликигә киргүзүлгән.

Һөрмәтлик радио аңлиғучилар, әслидә айгүл тохтиниң әрзи тартивелинған қора - җай үстидә болуп, алдинқи йили у борталада қанунсиз һалда 10 күн солап қоюлғандин кейин, буниңғиму наразилиқ билдүргән вә әрзи иккигә көпәйгән. Бу қетим у хитай сақчини бир шапилақ уруп, сақчиханиға қамап қоюлған мәзгилдә, чедирдики йүк - тақилири йүтүп кәткән. Буниң йүтүшигә сақчиларниң чедирини бузуветиши сәвәб болған. Буниң билән айгүл тохтиниң әрзи үч көпәйгән. У нөвәттә чедири бузулғанда йүткән йүк - тақиси вә материяллирини қайтурувелиш һәққидиму алақидар орунларға шикайәтлирини сунмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.