Әсәд һакимийитиниң вәһшийлики сүрийини қанға бойимақта

Әсәд һакимийитигә дуня хәлқиниң ғәзипи йеғиватқан бу күнләрдә, бу һакимийәт қан төкүшни техиму тизлитивәткән. Һәтта кичик бала, аял вә қери-яш дәп айримастин алдиға кәлгәнни оққа тутқан.

Сәуди әрәбистанида чиқидиған“әл мәдинә” гезитиниң2011-йили 22-декабир санида, “америка сүрийини агаһландуруватиду, сүрийә қан төкүватиду” дегән темида мундақ бир мақалә елан қилинған: “америка қошма штатлири 21-декабир чаршәнбә күни сүрийә һакимийити әгәр қан төкүштин тохтимиса, униңға хәлқаралиқ йеңи җазаларни қоллинидиғанлиқини очуқ җакарлиған болсиму, сүрийидә қан төкүш тохтимиди. Һәтта америка ақсарайниң баянатчиси бәшшар әл әсәдниң сүрийини идарә қилиш салаһийити қалмиғанлиқини җакарлиди. Әсәд һакимийити әрәб дөләтлири иттипақиниң тәклипини имзалиғиниға икки күн өткән болсиму, сүрийидә қан төкүш җинайитиниң күндин-күнгә ешиватқанлиқидин, хусусән сүрийә армийиси сепидин айрилип хәлқ тәрәпкә өткән әскәрләрниң җамаәт шәклидә өлтүрүлгәнликидин америка қошма штатлириниң қаттиқ биарам болуватқанлиқини җакарлиди. Сүрийилик кишилик һоқуқ паалийәтчиси рами абдураһманниң билдүрүшичә, сүрийиниң бирла идлиб шәһиридә сүрийә армийисидин айрилип хәлқ тәрәпкә өткән әскәрләрдин 100гә йеқин адәм оққа тутулған болуп, улардин 80 киши нәқ мәйданда өлгән. Қалғанлири еғир дәриҗидә яриланған. Йәнә сүрийиниң кәфр увәйд шәһиридә сүрийә сақчилири мәсчиткә киривалған 60 адәмни өлтүрүп ташлиған вә мәсчитниң имаминиң җәситини мәсчитниң ишикигә есип қойған.”

Сүрийилик намайишчилар истиқлал байриқини қадиди

Мақалидә йәнә мундақ дәп йезилған: “сүрийә пайтәхти дәмәшқ шәһиридики намайишчилар сүрийиниң тарихий қәләсиниң үстигә ямишип чиқип, истиқлал байриқини тикләш арқилиқ әсәд һакимийитигә өзлириниң қәтий тәслим болмайдиғанлиқини вә чоқум ғәлибә қилидиғанлиқини билдүрүп қойған болди. Әмма, башқа шәһәрләрдики намайишчилар бунчилик тәләйлик болалмиған. Улар сүрийә сақчилири тәрипидин өлтүрүлгән қурбанлириниң намазлирини чүшүрүшкиму күчи йәтмигән. Бәзи районларда мейит намизиға һазир болғанларму оққа тутулған.”