Esed hakimiyitining wehshiyliki süriyini qan'gha boyimaqta

Süriyidiki esed hakimiyiti axirqi nepiside téximu wehshiyliship ketken bolup, ötken ikki kün ichide süriye saqchiliri teripidin öltürülgenlerning sani 250 ke yetken.
Ixtiyariy muxbirimiz ömerjan
2011.12.22
Share on WhatsApp
Share on WhatsApp
suriye-namayish-jeset-305.jpg Süriyidiki namayishchilar hökümet tereptin öltürülgen sepdishining jesitini kötürüp namayish qilmaqta. 2011-Yili 8-may.
AFP

Esed hakimiyitige dunya xelqining ghezipi yéghiwatqan bu künlerde, bu hakimiyet qan töküshni téximu tizlitiwetken. Hetta kichik bala, ayal we qéri-yash dep ayrimastin aldigha kelgenni oqqa tutqan.

Se'udi erebistanida chiqidighan“El medine” gézitining2011-yili 22-dékabir sanida, “Amérika süriyini agahlanduruwatidu, süriye qan töküwatidu” dégen témida mundaq bir maqale élan qilin'ghan: “Amérika qoshma shtatliri 21-dékabir charshenbe küni süriye hakimiyiti eger qan töküshtin toxtimisa, uninggha xelq'araliq yéngi jazalarni qollinidighanliqini ochuq jakarlighan bolsimu, süriyide qan töküsh toxtimidi. Hetta amérika aqsarayning bayanatchisi beshshar el esedning süriyini idare qilish salahiyiti qalmighanliqini jakarlidi. Esed hakimiyiti ereb döletliri ittipaqining teklipini imzalighinigha ikki kün ötken bolsimu, süriyide qan töküsh jinayitining kündin-kün'ge éshiwatqanliqidin, xususen süriye armiyisi sépidin ayrilip xelq terepke ötken eskerlerning jama'et sheklide öltürülgenlikidin amérika qoshma shtatlirining qattiq bi'aram boluwatqanliqini jakarlidi. Süriyilik kishilik hoquq pa'aliyetchisi rami abdurahmanning bildürüshiche, süriyining birla idlib shehiride süriye armiyisidin ayrilip xelq terepke ötken eskerlerdin 100ge yéqin adem oqqa tutulghan bolup, ulardin 80 kishi neq meydanda ölgen. Qalghanliri éghir derijide yarilan'ghan. Yene süriyining kefr uweyd shehiride süriye saqchiliri meschitke kiriwalghan 60 ademni öltürüp tashlighan we meschitning imamining jesitini meschitning ishikige ésip qoyghan.”

Süriyilik namayishchilar istiqlal bayriqini qadidi

Maqalide yene mundaq dep yézilghan: “Süriye paytexti demeshq shehiridiki namayishchilar süriyining tarixiy qel'esining üstige yamiship chiqip, istiqlal bayriqini tiklesh arqiliq esed hakimiyitige özlirining qet'iy teslim bolmaydighanliqini we choqum ghelibe qilidighanliqini bildürüp qoyghan boldi. Emma, bashqa sheherlerdiki namayishchilar bunchilik teleylik bolalmighan. Ular süriye saqchiliri teripidin öltürülgen qurbanlirining namazlirini chüshürüshkimu küchi yetmigen. Bezi rayonlarda méyit namizigha hazir bolghanlarmu oqqa tutulghan.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.