Шәрқий түркистан вәқпи муавин рәиси әсәр сака ханим түркийә парламент рәиси җәмил чечәк билән учрашти

Түркийә җумһурийити уйғурлар әң көп олтурақлашқан дөләтләрдин бири. Бу дөләттә уйғурларниң көплигән аммивий тәшкилат вә фондлири бар. Уйғурларниң аммивий тәшкилат вә фондлири уйғурлар тоғрисида хизмәт - паалийәт елип бариду.
Ихтияри мухбиримиз арслан
2012.01.27
eser-saka-xanim-305.png Сүрәттә шәрқий түркистан вәқпи муавин рәиси әсәр сака ханим түркийә парламент рәиси җәмил чечәк билән биллә
Photo: RFA

Бу тәшкилатлар бәзи вақитларда бу тәшкилатларниң рәһбәрлири уйғурларға вакалитән түркийә җумһурийитиниң минситир дәриҗилик әмәлдарлири билән бивастә учришип уйғурлар тоғрисида сөһбәт елип бариду.

1 - Айниң 26 - күни шәрқий түркситан вәхпиниң муавин рәиси әсәр сака ханим, түркийә - түркмәнистан достлуқ җәмийитиниң пәхри рәиси салаһиддин байсал әпәнди қатарлиқ икки кишидин тәркип тапқан бир һәйәт түркийә җумһурийити парламент рәиси җәмил чечәк әпәнди билән түркийә парламент бинасидики ишханисида учрашти. Бу учришишта шәрқий түркситан вәхпиниң муавин рәиси әсәр сака ханим, җәмил чечәк әпәндигә уйғурлар вә шәрқий түркситанниң тарихи вә нөвәттики вәзийитини аңлитиш билән биргә, шәрқий түркситан вәхпиниң түркийидә яшайдиған уйғурларниң мәдәнийәт вә өрп - адәтлирини сақлап қелиш мәқситидә һәр түрлүк йиғин - паалийәт уюштуруп келиватқанлиқини билдүрди.

Әсәр сака ханим түркийә парламент рәиси җемил чечәк әпәндигә уйғурлар тоғрисида йезилған, “шәрқий түркситан тарихй”, “5 - июл үрүмчи қирғинчилиқи” вә “уйғурларниң мәдәнийәт вә тамақлири” дегәнгә охшаш бир қанчә парчә китаб вә уйғурларниң чимән допписини һәдийә қилди.

Биз бу һәқтә техиму көп мәлуматқа еришиш үчүн шәрқий түркситан вәхпиниң муавин рәиси әсәр сака ханим билән сөһбәт елип бардуқ.

Әсәр сакаханим бу учришишниң мәқсити немә дегән соалимизға җаваб берип мундақ деди:

- Бу зиярәтниң мәқсити һөрмәтлик парламент рәисигә уйғурлар вә шәрқий түркситан тоғрисида мәлумат бериш вә уйғурларни хатирилитиш шундақла 2012 - йили түркийидә хитай мәдәнийәт йили дәп елан қилинғанлиқи үчүн уйғурларни унутмаслиққа вә уйғурларға көңүл бөлүшкә чақириш иди. Мәқсәт һасил болди, һәқиқәтән сәмимий бир учришиш болди, бу зиярәт наһайити әһмийәтлик бир зиярәт болди.

Әсәр сака ханим, бу зиярәт җәрянида парламент рәиси җәмил чечәктин уйғурлар тоғрисида бирәр тәләп яки илтимас сундимиңизму дегән соалимизға җаваә берип мундақ деди:

- Бивастә бир тәләп яки илтимас сунулмиди, әмма бизни қоллап - қуввәтлишини тәләп қилдим вә шәрқий түркситан вәхпиниң уйғур хәлқи үчүн елип барған хизмәт - паалийәтлири тоғрисида мәлумат бәрдим. Уйғур хәлқиниң чәтәлләрдә яшаватқан болсиму тарих вә мәдәнийәтлиригә игә болуп яшаватқан бир хәлқ икәнликини билдүрдум. Мән җәмил чечәк әпәндигә уйғур допписи вә китаб һәдийә қилдим. Җәмил чечәк әпәнди доппини қәйәрдин кәлтүргәнликимни сорди, мән - шәрқий түркситандин кәлтүргән уйғур допписи икәнликини билдүрдим вә бизни қоллап - қуввәтлишини тәләп қилдим. Бу җәрянда җәмил чечәк әпәнди уйғурларни яхши билидиғанлиқини, һәр заман уйғур хәлқиниң йенида икәнликини ипадилиди.

Әсәр сака ханим, сизчә, түркийә җумһурийитиниң рәһбәрлири мәйли министирлар болсун, мәйли парламент әзалири болсун, уйғурларға қандақ қарайду дегән соалимизға җаваб берип мундақ деди:

- Мениң һес қилишимчә, түркийә җумһурийитиниң рәһбәрлири шәрқий түркситан мәсилисигә җиддий қарайду. Икки дөләт мунасивәтлиридә шәрқий түркистанға ярдәм қилиш үчүн тиришиватиду, дәп қараймән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.