Етиқад вә шәхсий мәнпәәт тоғрисида ривайәт

Етиқад адәм балисидики әң йимирилмәс күч болуп, етиқадлиқ адәмләрниң етиқадсиз адәмләргә қариғанда маддий вә мәниви җәһәтләрдин әлвәттә күчлүк болидиғанлиқи бир һәқиқәт.
Ихтиярий мухбиримиз өмәрҗан
2011-01-27
Share
tawfiq-al-hakim-305.jpg Мисирлиқ мәшһур язғучи тәвфиқ һеким (1898-йили 9-өктәбирдин 1987-йили 26-июлғичә)
ro.wikipedia.org

Мисирлиқ мәшһур язғучи тәвфиқ һеким "етиқад вә шәхсий мәнпәәт" дегән мақалисидә мундақ дәп язған:

"Бир топ муритлар бир түп дәрәхни муқәддәс роһ дәп билип, дәрәхкә чоқунуватқан икән. Бир заһит буниңдин хәвәр тепип қаттиқ ғәзәплинипту-дә, палтисини елип берип дәрәхни кесивәтмәкчи болуп, у дәрәхниң йениға келипту. Туюқсиз бир шәйтан пәйда болуп, униң йолини тосуп туруп, мундақ дәпту:
-Һәй, тохта! сән немә сәвәбтин бу дәрәхни кесивәтмәкчисән?
- Чүнки бу дәрәх кишиләрни аздуруватиду.
-Кишиләрни аздурса аздуривәрмәмду, улар алдинивәрсун!
-Ундақ болса қандақ болиду? мениң уларни йетәкләш мәсулийитим бар.
 -Сән кишиләрниң әркинликини тосувалма, улар немә қилғуси кәлсә, шуни қилсун.
-Улар һазир әркин әмәс, чүнки улар җин-шәйтанларниң әпсунлирини аңлаватиду.
-Ундақта сән уларға өзүңниң авазини аңлатмақчи охшимамсән?
-Мән уларға алланиң авазини аңлатмақчимән.
-Мән саңа бу дәрәхни һәргиз кәстүрмәймән!
-Мәнму бу дәрәхни кәсмигүчә болди қилмаймән.
Шуниң билән шәйтан заһитниң кекиртикидин апту, заһит шәйтанниң мүңгүзидин тутувапту. Улар қаттиқ елишип, ахири заһит шәйтанни йеңипту, униң үстигә минип олтуруп:
-Мән саңа өзүмни бир көрситип қоймайдиған болсам,-дәпту.
Шәйтан һасирап туруп:
-Мән сениң бунчилик күчлүк икәнликиңни һәргиз ойлимаптимән. Мени қоювәт. Немә қилимән десәң қиливәр,-дәпту.
Шуниң билән заһит шәйтанни қоюветипту. Бирақ қаттиқ елишип һерип кәткән заһитниң дәрәхни кәскүдәк маҗали қалмапту, шуңа қайтип кетип, арам елип әтиси кәсмәкчи болупту.
Әтиси у йәнә палтисини елип дәрәх кесиш үчүн меңипту. Шәйтан бирдинла униң арқисида пәйда болуп варқирапту:
-Бүгүнму дәрәх кәскили маңдиңму?
-Мән саңа бу дәрәхни кәсмәй қоймаймән демигәнмидим?
- Сән бүгүнму мени йеңәләймән дәп ойламсән?
- Мән саңа өзүмни бир көрситип қоймиғичә болди қилмаймән.
-Хош әмисә карамитиңни көрсәт.
Шәйтан заһитниң кекиртикидин апту, заһит йәнә шәйтанниң мүңгүзидин тутувапту. Йәнә бир пәс қаттиқ елишиштин кейин заһит шәйтанни йеңивапту. Шәйтанни астиға бесип туруп,:
-Һә, әмди сениң йәнә дәйдиған гепиң барму?-дәпту.
‏-Мән тән бәрдим. Сениң һәйран қалғудәк күчүң бар икән. Мени қоюп бәр. Сән мени немә қил десәң шуни қилимән,-дәпту шәйтан һарғин қияпәттә.
Заһит уни қоюп берип, кәписигә қайтип келипту. Чүнки у қаттиқ чарчап кәткәчкә бир кечә қимирлимай йетипту. Әтиси заһит йәнә палтиси елип дәрәхни кәскили меңипту. Бу қетимму шәйтан униң йолини тосуп туруп:
-Һәй, сән техичә нийитиңдин янмидиңму?-дәп сорапту.
-Шундақ мән бу балайиапәтни йилтизидин кесип ташлимиғучә болди қилмаймән.
Шәйтан бу адәмни елишиш билән йеңәлмәйдиғанлиқиға көзи йәткәндин кейин, етиқадлиқ адәмләрни йеңишниң чариси һийлә-микирни ойлап йетипту. Шундақ қилип бу шәйтан толиму сахта, чирайлиқ тәбәссум билән заһитқа йеқинлишип келип униңға дәпту:
-Мениң бу дәрәхни немә үчүн кәскили қоймиғанлиқимниң сәвәби сени асраш үчүн иди. Сән буни чүшәнмидиң. Чүнки сән бу дәрәхни кесивәтсәң, бу дәрәхкә чоқунидиғанлар сени яман көрүп қалиду, саңа дүшмән болиду әмәсму? немидәп өзүңгә аваричилик таписән? болди қой, бу дәрәхни кесиш нийитиңдин янғин. Мән саңа һәр күни икки динар пул берәй, шуни хәҗләп раһәттә яшиғин,-дәпту.
Заһит бирдәм ойланғандин кейин шаққидә бешини көтүрүп, шәйтанға қарап: дегәнлириңгә ким гуваһ болиду?-дәп сорапту.
-Мән қәсәм қилип берәй, вәдәмдин янмаймән.
-Болиду әмисә, мән сени синап көрәй.
Дегәндәк шуниңдин кейин заһит һәр күни ястуқиниң тегидин икки динар алидикән. Бир айғичә шундақ болупту. Әмма, бир күни әтигини заһит қолини ястуқ тегигә тиқиптикән, динар чиқмапту. Чүнки шәйтан униң ястуқи астиға динар қоймиған икән. Заһитниң әрваһи қириқ кәз өрләпту-дә, орнидин дәс туруп һелиқи дәрәхни кесиш үчүн йәнә йолға чиқипту. Йолда шәйтан учрап қелип униңдин сорапту:
- Тохта, қаяққа маңдиң йәнә?
- Дәрәх кәскили,-дәп җаваб берипту заһит.
- Шәйтан уни мәсхирә қилип қаттиқ күлүп кетипту вә саңа беридиған динарни тохтитип қойғиним үчүн дәрәхни кесимән дәмсән?
- яқ, мән бу гунаһ мәнбәсини йилтизидин қомуруп ташлап, кишиләрниң дилини иман нури билән йорутимән.
- Сән техи кишиләрниң дилини йорутамсән? сениң бу турқуң бәкму күлкилик билинди, дәп мәсхирә қилипту шәйтан.
Заһитниң қаттиқ ғәзипи өрләп шәйтанға етилип берип шәйтанниң мүңгүзидин тутувапту. Йәнә қаттиқ елишипту. Әмма, бу қетим узақ елишмайла шәйтан заһитни йеңивапту. Заһитниң үстигә минип олтуруп:
-Һәй, сениң һелиқи қудритиң қени-дәп сорапту.
Мәғлуп болған заһит қаттиқ ғәзәп билән:
Ейтә шәйтан, сән мени қандақ йәңдиң-дәпту.
-Сән етиқад үчүн елишқиниңда мени йәңгәнтиң, шәхсий мәнпәәт үчүн елишқиниңда мән сени йәңдим, дәпту шәйтан."

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт