Étiqad we shexsiy menpe'et toghrisida riwayet

Étiqad adem balisidiki eng yimirilmes küch bolup, étiqadliq ademlerning étiqadsiz ademlerge qarighanda maddiy we meniwi jehetlerdin elwette küchlük bolidighanliqi bir heqiqet.
Ixtiyariy muxbirimiz ömerjan
2011-01-27
Share
tawfiq-al-hakim-305.jpg Misirliq meshhur yazghuchi tewfiq hékim (1898-yili 9-öktebirdin 1987-yili 26-iyulghiche)
ro.wikipedia.org

Misirliq meshhur yazghuchi tewfiq hékim "Étiqad we shexsiy menpe'et" dégen maqaliside mundaq dep yazghan:

"Bir top muritlar bir tüp derexni muqeddes roh dep bilip, derexke choqunuwatqan iken. Bir zahit buningdin xewer tépip qattiq ghezepliniptu-de, paltisini élip bérip derexni késiwetmekchi bolup, u derexning yénigha kéliptu. Tuyuqsiz bir sheytan peyda bolup, uning yolini tosup turup, mundaq deptu:
-Hey, toxta! sen néme sewebtin bu derexni késiwetmekchisen?
- Chünki bu derex kishilerni azduruwatidu.
-Kishilerni azdursa azduriwermemdu, ular aldiniwersun!
-Undaq bolsa qandaq bolidu? méning ularni yéteklesh mes'uliyitim bar.
 -Sen kishilerning erkinlikini tosuwalma, ular néme qilghusi kelse, shuni qilsun.
-Ular hazir erkin emes, chünki ular jin-sheytanlarning epsunlirini anglawatidu.
-Undaqta sen ulargha özüngning awazini anglatmaqchi oxshimamsen?
-Men ulargha allaning awazini anglatmaqchimen.
-Men sanga bu derexni hergiz kestürmeymen!
-Menmu bu derexni kesmigüche boldi qilmaymen.
Shuning bilen sheytan zahitning kékirtikidin aptu, zahit sheytanning münggüzidin tutuwaptu. Ular qattiq éliship, axiri zahit sheytanni yéngiptu, uning üstige minip olturup:
-Men sanga özümni bir körsitip qoymaydighan bolsam,-deptu.
Sheytan hasirap turup:
-Men séning bunchilik küchlük ikenlikingni hergiz oylimaptimen. Méni qoyuwet. Néme qilimen déseng qiliwer,-deptu.
Shuning bilen zahit sheytanni qoyuwétiptu. Biraq qattiq éliship hérip ketken zahitning derexni kesküdek majali qalmaptu, shunga qaytip kétip, aram élip etisi kesmekchi boluptu.
Etisi u yene paltisini élip derex késish üchün méngiptu. Sheytan birdinla uning arqisida peyda bolup warqiraptu:
-Bügünmu derex keskili mangdingmu?
-Men sanga bu derexni kesmey qoymaymen démigenmidim?
- Sen bügünmu méni yéngeleymen dep oylamsen?
- Men sanga özümni bir körsitip qoymighiche boldi qilmaymen.
-Xosh emise karamitingni körset.
Sheytan zahitning kékirtikidin aptu, zahit yene sheytanning münggüzidin tutuwaptu. Yene bir pes qattiq élishishtin kéyin zahit sheytanni yéngiwaptu. Sheytanni astigha bésip turup,:
-He, emdi séning yene deydighan géping barmu?-deptu.
‏-Men ten berdim. Séning heyran qalghudek küchüng bar iken. Méni qoyup ber. Sen méni néme qil déseng shuni qilimen,-deptu sheytan harghin qiyapette.
Zahit uni qoyup bérip, kepisige qaytip kéliptu. Chünki u qattiq charchap ketkechke bir kéche qimirlimay yétiptu. Etisi zahit yene paltisi élip derexni keskili méngiptu. Bu qétimmu sheytan uning yolini tosup turup:
-Hey, sen téxiche niyitingdin yanmidingmu?-dep soraptu.
-Shundaq men bu balayi'apetni yiltizidin késip tashlimighuche boldi qilmaymen.
Sheytan bu ademni élishish bilen yéngelmeydighanliqigha közi yetkendin kéyin, étiqadliq ademlerni yéngishning charisi hiyle-mikirni oylap yétiptu. Shundaq qilip bu sheytan tolimu saxta, chirayliq tebessum bilen zahitqa yéqinliship kélip uninggha deptu:
-Méning bu derexni néme üchün keskili qoymighanliqimning sewebi séni asrash üchün idi. Sen buni chüshenmiding. Chünki sen bu derexni késiwetseng, bu derexke choqunidighanlar séni yaman körüp qalidu, sanga düshmen bolidu emesmu? némidep özüngge awarichilik tapisen? boldi qoy, bu derexni késish niyitingdin yan'ghin. Men sanga her küni ikki dinar pul bérey, shuni xejlep rahette yashighin,-deptu.
Zahit birdem oylan'ghandin kéyin shaqqide béshini kötürüp, sheytan'gha qarap: dégenliringge kim guwah bolidu?-dep soraptu.
-Men qesem qilip bérey, wedemdin yanmaymen.
-Bolidu emise, men séni sinap körey.
Dégendek shuningdin kéyin zahit her küni yastuqining tégidin ikki dinar alidiken. Bir ayghiche shundaq boluptu. Emma, bir küni etigini zahit qolini yastuq tégige tiqiptiken, dinar chiqmaptu. Chünki sheytan uning yastuqi astigha dinar qoymighan iken. Zahitning erwahi qiriq kez örleptu-de, ornidin des turup héliqi derexni késish üchün yene yolgha chiqiptu. Yolda sheytan uchrap qélip uningdin soraptu:
- Toxta, qayaqqa mangding yene?
- Derex keskili,-dep jawab bériptu zahit.
- Sheytan uni mesxire qilip qattiq külüp kétiptu we sanga béridighan dinarni toxtitip qoyghinim üchün derexni késimen demsen?
- Yaq, men bu gunah menbesini yiltizidin qomurup tashlap, kishilerning dilini iman nuri bilen yorutimen.
- Sen téxi kishilerning dilini yorutamsen? séning bu turqung bekmu külkilik bilindi, dep mesxire qiliptu sheytan.
Zahitning qattiq ghezipi örlep sheytan'gha étilip bérip sheytanning münggüzidin tutuwaptu. Yene qattiq élishiptu. Emma, bu qétim uzaq élishmayla sheytan zahitni yéngiwaptu. Zahitning üstige minip olturup:
-Hey, séning héliqi qudriting qéni-dep soraptu.
Meghlup bolghan zahit qattiq ghezep bilen:
Éyte sheytan, sen méni qandaq yengding-deptu.
-Sen étiqad üchün élishqiningda méni yenggenting, shexsiy menpe'et üchün élishqiningda men séni yengdim, deptu sheytan."

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet