Merhum eysa yüsüp aliptékinning wapat bolghanliqining 16‏-yili munasiwiti bilen xatirilesh murasimi ötküzüldi

Sherqiy türkistan wexpining uyushturushi bilen 1995‏-yili 12‏-ayning 17‏-küni wapat bolghan sherqiy türkistan dawasining bayraqdarliridin biri merhum eysa yüsüp aliptékinni xatirilesh murasimi ötküzüldi.
Ixtiyariy muxbirimiz arslan
2011.12.19
Erkin-Alptekin-305.jpg Merhum eysa yüsüp aliptékinning wapat bolghanliqining 16‏-yili munasiwiti erkin aliptékin ependi söz qildi. 2011-Yili 18-dékabir.
RFA/Arslan

2011‏-Yili 12‏-ayning 18‏-küni istanbulning zeytinburnu rayonidiki oqutquchilar merkizining yighin zalida ötküzülgen bu murasimgha, merhum eysa yüsüp aliptékinning a'ile-baliliri, oghli erkin aliptékin ependi we bashqilar hemde dunya Uyghur qurultiyining idare hey'et rehberliri, sherqiy türkistan wexpining idare hey'et rehberliri, sherqiy türkistan ma'arip we hemkarliq jem'iyiti, sherqiy türkistan medeniyet we hemkarliq jem'iyiti, sherqiy türkistan yashlar jem'iyiti, sherqiy türkistan méhri shepqet jem'iyiti qatarliq türkiyidiki sherqiy türkistan ammiwi teshkilatlarning mes'ulliri we idare hey'et rehberliri qatnashti.

yighin-zali-385.jpg
Merhum eysa yüsüp aliptékinning wapat bolghanliqining 16‏-yilliqini xatirilesh murasimi körünüshi. 2011-Yili 18-dékabir, türkiye.
RFA/Arslan

Bu murasimgha yene türk edebiyat wexpining re'isi serwet qapaqli, türkiye sabiq parlamént ezasi merhum eysa yüsüpning yéqin dosti rasim jinsli qatarliq muhim shexsler qatnashti. Murasimgha yene istanbulda yashaydighan Uyghur, qazaqlardin bolup köp sanda kishi qatnashti.

Murasim qur'an kerim tilawet qilish, shehidlerge hörmet bildürüp bir minutluq sükütte turush we istiqlal marshi oqush bilen bashlandi. Murasimgha sherqiy türkistan wexpining re'isi ilghar aliptékin ependi riyasetchilik qildi. Murasimda aldi bilen, merhum eysa yüsüp aliptékinning yéqin dosti rasim jinsli ependi söz qilip, merhum eysa yüsüp aliptékinning hayat-ish izliridin bir qisim xatire-eslimilirini anglatti.

Murasimda doktor ömerqul, “Milliy küresh lidéri eysa yüsüp aliptékin we uning élip barghan siyasitining bügünki tesiri” dégen témida, doktor abdulhemit awshar, “Eysa yüsüp aliptékinning türk siyasiy jem'iyitige körsetken tesiri” dégen témida, proféssor doktor alimjan inayet, “Eysa yüsüp aliptékinning nenjingdiki pa'aliyetliri” dégen témida, doktor erkin ekrem, “Aliy muxtariyet 1945-yildin kéyin eysa yüsüp aliptékin we uning sepdashlirining pa'aliyetliri” dégen témida söz qildi.

Bu murasimda yene erkin aliptékin ependi, dunya Uyghur qurultiyining mu'awin re'isliridin esqerjan we siyit tumtürk, yazghuchi gülchin chandarli'oghli hem yazghuchi serwet qapaqli qatarliq shexsler söz qilip, eysa yüsüp aliptékinning hayat ishlirini xatirilep ötti.

Yighinda söz qilghan mutexessislerning sözlirige asaslan'ghanda, merhum eysa yüsüp aliptékin 1901‏-yili qeshqer yéngisarda dunyagha kelgen we sherqiy türkistanda oxshimighan mekteplerde oqughan, xitay tilini yaxshi ögen'gen. Oqush püttürgendin kéyin memuriy kadir bolup oxshimighan sahelerde xizmet qilghan. 1926‏-Yili xitayning endijandiki konsulxanida katip bolup ishligen.

1936‏-Yili gomindang hökümitining parlamént ezasi bolup saylan'ghan we nenjinggha bérip xizmet qilghan. “Chin türkistan awazi”, “Xantengri”, “Altay”, “Erk” dégen namlarda gézit-zhurnal neshr qilip sherqiy türkistanning muxtariyet hoquqini kéngeytish yolida xizmet ishligen.

Merhum eysa yüsüp aliptékin 1949‏-yili xitay kommunist hakimiyiti Uyghur élini ishghal qilghanda, hindistan tewelikidiki keshmirge hijret qilghan. 1954‏-Yili türkiyige kelgen. Türkiyige kelgendin kéyin tunji qétim sherqiy türkistan köchmenler jem'iyitini qurghan. “Sherqiy türkistan awazi” namliq zhurnal neshr qilip, sherqiy türkistan dawasini dunyagha anglitishni kücheytken.

Merhum 1995‏-yili 12‏-ayning 17‏-küni istanbulda wapat bolghan.

Biz yighin axirida dunya Uyghur qurultiyining mu'awin re'isliridin, esqerjan we siyit tumtürk ependiler bilen eysa yüsüp aliptékin ependi toghrisida söhbet élip barduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.