Facebook Ниң муштириси көпийишигә әгишип әһмийитиму күчәймәктә

Харвард уневирситетиниң оқуғучиси Mark Zuckerberg тәрипидин тәсис қилинған аммиви алақә тор бекити Facebook, учур - алақә саһәсидә дәвир бөлгүнч мөҗизә яратқан ентернет тор бекәтлиридин бири.

7 Милярд нопуслуқ дуняда, 500 милйон муштиригә игә Facebook қолланғучилириниң һәр бириниң оттура һесаб билән 130 нәпәр дости бар болуп, улар һәр айда аз дегән 70 қетим учур алмаштуриду.

Булар ичидә син алғу лентилири вә аилә сүрәтлириму бар. Әгәр Face book ни бир дөләт дәп пәрәз қилсақ, у хитай вә һиндистандин кейин, дуняниң үчинчи чоң нопусиға игә бир дөләт һесаблинатти.

Facabook Игиси Mark мундақ дәйду " бу арқилиқ һәммә адәм бир - бири билән алақә орниталайдиған имканийәткә игә болди, кишиләр арисида наһайити чоң бир ортақлишиш мәйдани қурулди. Мәсилән, достлар ара һаят һәққидә сөһбәтлишиш, пикир алмаштуруш, сүрәт вә синалғуларни алмаштуруп көрүш, һәтта той - төкүн, өлүм - йетим, оқуш пүттүрүш мурасимлири қатарлиқлардин хәвәрдар болуштәк наһайити чоң бир ортақлишиш мәйдани шәкилләнди".

Санлиқ тәкшүрүшләрдин мәлум болушичә, Facebook қолланғучилар яшлар, бовай - момайлар, ширкәт дерикторлири вә сиясәтчиләрни өз ичигә алған һәр гуруппидики кишиләр болуп, әң тез көпийиватқан гуруппа болса 60 яштин юқирилар икән.

Вашингтондики Georgetown уневирситетиниң оқотқучиси Michael Nelson, дәсләп оқуғучилар арисида өз - ара алақә орнитиш мәқсити билән қурулған Facebook ниң бүгүн милйонлиған муштириға игә болуши, Facebook ниң ғайәт зор нәтиҗигә еришкәнликидин дерәк беридиғанлиқини билдүргән.

Facebook Та йәнә, ахирқи 15 айда һәр сикунтта сәккиз кишиниң йеңи һесаб номури ачқузуватқанлиқи билдүрүлмәктә.

Мана мушундақ дуняда мәшһур аммиви алақә тор бекити һесабланған facebook тор бекити хитайда чәкләнгән болуп, әлвәттә уйғурларму буниңдин мәһрум қалдурулған.

Хитайниң facebook ни чәкләштики мәқситини чүшәндүргән, америкидики кишилик һоқуқ паалийәтчиси турди ғоҗа әпәнди хитайниң пүтүн инсанлар қизиқиватқан бундақ бир тор бекитидә, хитайда йүз бериватқан вәқәләрниң, болупму сиясий вәзийәтниң кишиләр арисида наһайити тез сүрәттә тарқилип кетишиниң алдини елиштин ибарәт дәп көрсәтти.

Facebook Ниң үзлүксиз тәрәққи қилидиғанлиқи қияс қилинған болуп, мәзкүр тор бекитиниң сиясий паалийәтләрдә ойнайдиған ролиму үзлүксиз күчийидикән, 2008 - йили америка призиденти барак обама, президентлиқ сайлимида facebook ниң ролидин пайдилинип, иҗабий нәтиҗигә еришкән.

Омумән кишиләрниң дуняда йүз бериватқан чоң сиясий вәқәләрдин, facebook арқилиқ хәвәрдар болуватқанлиқи билдүрүлмәктә.

Турди ғоҗа әпәнди йәнә, хитай һөкүмитиниң контроллуқи астида facebook ни қоллиналмайватқан уйғурларниң орниға, әркин дуняда яшаватқан һәр бир уйғурниң facebook һесаб номури ечип, уни ялғуз шәхси иш - паалийити үчүн әмәс, һеч болмиғанда һәптидә бир қетим уйғурларға аит мақалә, рәсим вә көрүнүшләрни қоюш арқилиқ уйғурларниң һазирқи сиясий вәзийитини кишиләргә аңлитиш ролини җари қилдуруши керәкликини оттуриға қойди.

юқиридики улиништин бу прогирамминиң тәпсилатини аңлиғайсиләр.