Германийидики уйғурлар роза һейтни биллә өткүзди

Һәр йилқиға охшаш, мюнхенда бу йилқи һейт намизиму д у қ ниң йиғин залида өткүзүлди. Роза һейт намизиға мюнхендики 100гә йеқин уйғур әрлири вә яш-өсмүрләр қатнишиш билән биргә, норвегийә, шветсийә қатарлиқ әлләрдин кәлгән бир қисим меһманларму иштирак қилди. Намаздин илгири 1000 ойруға йеқин сәдиқә-питир йиғилди һәмдә зөрүр еһтияҗлиқ җайларға дәрһал йәткүзүш бәлгиләнди. Намаздин кейин, уйғур җамаити өз-ара сәмимий көрүшүп, бир-бириниң һейтини тәбрикләшти. Шәһәр мәркизидики уйғур ресторанлириға кирип, ресторан хоҗайинлири тәрипидин уюштурулған һәқсиз наштилиқларға еғиз тәгди.

RFA/Ekrem

Д у қ диний ишлар комитетиниң мудири, мюнхендики уйғур җамаитиниң имами болған турғун алавудун һаҗим зияритимизни қобул қилип, германийидики уйғурларниң бу йилқи рамзан ейиниң яхши өткәнликини һәмдә кәлгүсидә уйғур вәтинидә мушундақ әркин-азадилик ичидә һейт өткүзүшкә несип болушини тилиди.

Д у қ муавин рәиси әсқәрҗан әпәнди зияритимизни қобул қилғанда, германийидики уйғурларниң наһайити яхши бир адәткә игә икәнликини, бу яхши әнәнилириниң йәниму давамлишишиға болған тиләклирини билдүрүп өтти.

Шәһәр мәркизидики ресторанларда наштилиқлирини тамамлиған бир қисим уйғур җамаити топ-топ болуп, қанчилиған аптомобилларда шәһәр ичи вә сиртидики қериндашлириниң өйлиригә һейт пәтиси қилип, мусапирчилиқта яшаватқан қериндашлириға һейт кәйпияти һес қилдурди вә қериндашлиқ меһирлирини йәткүзүшти. Бу һейт пәтиси 30-авғуст күни бир күн давамлашти. Саһибханилар толиму хурсән болушти вә меһманларни зор иззәт-икрамлар билән күтти.
Һәммила аилидә һейтлиқ саңза вә татлиқ түрүмләр пишурулған болуп, гоя вәтәндики һейт мәнзирисини әслитәтти.