Gérmaniyidiki Uyghurlar roza héytni bille ötküzdi

30 Künlük ramzanni axirlashturghan gérmaniyidiki Uyghurlar 30-awghust küni roza héyt namizini d u q zalida birge oqudi we a'ililer ara héyt petisi qiliship, qérindashliq méhrini yetküzüshti.
Ixtiyariy muxbirimiz ekrem
2011.08.31
germaniye-roza-heyt1-305.jpg Gérmaniyidiki Uyghurlar roza héyt namizini d u q zalida otidi we héytliq pa'aliyet élip bardi. 2011-Yili 30-awghust.
RFA/Ekrem

Her yilqigha oxshash, myunxénda bu yilqi héyt namizimu d u q ning yighin zalida ötküzüldi. Roza héyt namizigha myunxéndiki 100ge yéqin Uyghur erliri we yash-ösmürler qatnishish bilen birge, norwégiye, shwétsiye qatarliq ellerdin kelgen bir qisim méhmanlarmu ishtirak qildi. Namazdin ilgiri 1000 oyrugha yéqin sediqe-pitir yighildi hemde zörür éhtiyajliq jaylargha derhal yetküzüsh belgilendi. Namazdin kéyin, Uyghur jama'iti öz-ara semimiy körüshüp, bir-birining héytini tebrikleshti. Sheher merkizidiki Uyghur réstoranlirigha kirip, réstoran xojayinliri teripidin uyushturulghan heqsiz nashtiliqlargha éghiz tegdi.

germaniye-roza-heyt2-385.jpg
Gérmaniyidiki Uyghurlar a'ililer ara héyt petisi qiliship, qérindashliq méhrini yetküzüshti. 2011-Yili 30-awghust.
RFA/Ekrem

D u q diniy ishlar komitétining mudiri, myunxéndiki Uyghur jama'itining imami bolghan turghun alawudun hajim ziyaritimizni qobul qilip, gérmaniyidiki Uyghurlarning bu yilqi ramzan éyining yaxshi ötkenlikini hemde kelgüside Uyghur wetinide mushundaq erkin-azadilik ichide héyt ötküzüshke nésip bolushini tilidi.

D u q mu'awin re'isi esqerjan ependi ziyaritimizni qobul qilghanda, gérmaniyidiki Uyghurlarning nahayiti yaxshi bir adetke ige ikenlikini, bu yaxshi en'enilirining yenimu dawamlishishigha bolghan tileklirini bildürüp ötti.

Sheher merkizidiki réstoranlarda nashtiliqlirini tamamlighan bir qisim Uyghur jama'iti top-top bolup, qanchilighan aptomobillarda sheher ichi we sirtidiki qérindashlirining öylirige héyt petisi qilip, musapirchiliqta yashawatqan qérindashlirigha héyt keypiyati hés qildurdi we qérindashliq méhirlirini yetküzüshti. Bu héyt petisi 30-awghust küni bir kün dawamlashti. Sahibxanilar tolimu xursen bolushti we méhmanlarni zor izzet-ikramlar bilen kütti.
Hemmila a'ilide héytliq sangza we tatliq türümler pishurulghan bolup, goya wetendiki héyt menzirisini eslitetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.