Gérmaniyidiki Uyghurlar xitay jasuslirining hujum nishanigha aylanmaqta

Gérmaniye asasiy qanunni qoghdash idarisi xitay jasuslirining gérmaniyidiki pa'aliyetliri toghrisidiki doklatni élan qilghandin kéyin, gérmaniyidiki gézit-zhurnallarda bu heqte mulahize we munaziriler qanat yaydi. Frankfurt mejmu'e gézitining 18-iyuldiki mulahiziside doklattin neqil élinip, eynen halda “Öktichi diniy éqim bolghan falünggungchilardin sirt, öz wetinining musteqilliqini qolgha élish üchün heriket qiliwatqan Uyghur we tibet teshkilatliri xitay jasuslirining axbarat igilesh nishanigha aylan'ghan, hetta ular xitay jasuslirining tehditlirigimu duch kelgen” déyilgen idi.

Gérmaniye dolqunliri radi'osining bu xusustiki yéngi xewerliride, gérmaniye asasiy qanunni qoghdash idarisining doklatta otturigha qoyghanliri eskertilish bilen birge, 2011-yili myunxén shehiride Uyghurlargha qarshi xitay üchün xizmet qilghan üch neper Uyghur, bir neper xitay jasusining sotqa tartilghanliqi, Uyghur siyasiy pa'aliyetchiliri we teshkilatlirining hazir xitay jasusliri teripidin téximu qattiq teqib astigha élin'ghanliqi tekitlen'gen.

D u q mu'awin re'isi ümid agahi we ijra'iye komitéti re'isi dolqun eysa ependiler mezkur doklat munasiwiti bilen ziyaritimizni qobul qilip, doklatta otturigha qoyulghan mesililer hem d u q ning xitay jasuslirining pa'aliyetlirige qarshi tedbirliri toghrisidiki so'allirimizgha jawab berdi.

Gérmaniye asasiy qanunni qoghdash idarisi élan qilghan doklatta yene, gérmaniyide yashawatqan xitay dölet tewelikige ige 79 ming kishining xitay jasuslirining uchur igilesh nishanigha aylan'ghanliqi, xitay jasuslirining gérmaniyining iqtisadiy uchurliri, siyasiy pilanliri, herbiy hazirliqliridin tartip turmush buyumlirighiche bolghan axbaratlarni égiliwatqanliqi körsitilgen.