Ghayip zakir memetning iz - dériki üchün uning ata - anisidin qan élindi

5 - Iyuldin kéyin iz - déreksiz ghayip bolghanlar heqqide xitay hökümiti hazirgha resmiy yosunda jawab bermey kelgen. Da'iriler bezi chaghlarda ghayiplar a'ile - tawabatigha ghayiplarning türmidin qachqanliqi yaki chet'elge qéchip ketkenlikini bildürse, köp hallarda a'ililerge kütüp turushni éytqan.
Muxbirimiz shöhret hoshur
2012.11.30
zakir-memet-aile-305.png Zakir memetning a'ilisidikilerning süriti
Photo: RFA


Melum bolushiche, ötken hepte xitay qanun organliri, ghayiplardin zakir memetning qeshqer yéngisheherdiki ata - anisidin qan alghan؛ bu xitay qanun organlirining ghayiplar heqqide tekshürüsh élip bériwatqanliqining tunji közge körünerlik bir ipadisi hésablinidu. Ghayiplar a'ile - tawabatliridin beziliri bu ehwaldin ümidlense, yene beziliri, ghayiplarning dunya bilen widaliship bolghanliqini texmin qilip endishige chüshmekte.

Töwende muxbirimiz shöhret hoshurning bu heqte teyyarlighan programmisini anglaysiler:

So'al: essalamu'eleykum, siz zakir memetning dadisi bolamsiz?

Jawab: shundaq men shu.

So'al: anglisaq, qanun orunliri yéqinda sizdin we zakirning apisidin qan aptu, bu toghrimu?

Jawab: shundaq 3 kün boldi, qan alghini kiriptiken, berduq.

So'al: qeyerdin keldi? toqquzaqtinmu yéngisheherdinmu?

Jawab: yéngisheherdin, bizning yéziliq saqchixanidin.

So'al: qan alidighan chaghda néme dep aldi?

Jawab: yuqiridin telep qildi, yuqirigha yollaymiz dédi.

So'al: zakirjanni izdesh bilen munasiwetlikmu dep sorap baqdinglarmu?

Jawab: shundaq munasiwetlik, men hazirmu saqchi idarisida, saqchilar zakirjanning yoqap kétish jeryanini sorap xatirilewatidu.

So'al: pat yéqinda jawab chiqidighan oxshimamdu?

Jawab: shundaq ümidte turuwatimiz.

Hörmetlik radi'o anglighuchilar, zakir memetning ata - anisidin qan élinishi, ghayiplar a'ile - tawabatliridin bezilirini ümidlendürse, yene beziliri ümidsizlendürmekte. Undaqta, qan élish ghayipning aman - ésenlikidin bisharetmu? yaki uning bu dunya bilen widaliship bolghanliqining bisharitimu? biz bu so'algha jawab tépish üchün, nöwette norwigiyide yashawatqan sabiq adwokat bextiyar ömerni ziyaret qilduq. U öz tejirbilirige yene jinayi ishlar délolirining tekshürülüsh tertiplirige asasen öz köz qarshlirini töwendikiche bayan qildi.

So'al: zakir memetning ata - anisidin qan éliniptu, sizche bu némidin dérek béridu? yene adette qanuniy tertip boyiche qan élish qandaq ehwallarda élinidu?

Jawab: qan adette salahiyetni békitish üchün élinidu. Shunga bu yaxshi bir ehwaldin bisharet emes.

So'al: saqchilarning zakir memettin qan alghinigha qarap, uni keskin halda hayat yaki mamat dep höküm chiqirish mumkinmu?

Jawab: keskin éytish mumkin emes, emma bu chüshiniksiz, sirliq bir qan élish.

So'al: siz bu qan élishni néme üchün dep texmin qilisiz?

Jawab: peqet a'ililerning éghizini tuwaqlash yaki xelq'ara jem'iyetlerge jawab teyyarlash üchün, sün'iy bir tekshürüsh jeryanini teyyarlawatqan bolushi mumkin.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.