5‏-Июлдин кейин из-дерәксиз ғайиб болғанлар аилә-тавабиатиниң кәчүрмишлири (3)

Хитай сақчилири ғайиблар аилә-тавабиатиға “террорчилар” билән сөзләшмәслик һәққидә тәнбиһ бәргән.
Мухбиримиз шөһрәт һошур
2012.08.01
Share on WhatsApp
Share on WhatsApp
Imammemetning-Anisi-patigul-ghulam-305.jpg Имаммәмәт аилисидикиләрниң 15-йили бурун чүшкән хатирә сүрити. Аниси патигүл ғулам арқидики рәтниң оңдин биринчиси. Оттуридикиси ғайиб болған оғли имаммәмәт ели (12 яш мәзгили)
RFA/Shohret Hoshur

Хитай сақчилири 27-июл күни 5-июлдин кейин ғайиб болғанлардин имаммәмәт елиниң аилисигә берип, имаммәмәтниң аниси патигүл ғуламға, радиомиз мухбири билән сөзләшмәслик һәққидә тәнбиһ бәргән. Сақчилар сөзидә радиомиз мухбирини қутратқулуқ қилғучи вә террорчи дәп тонуштурған. Патигүл ғулам сақчиларға “ундақта баламниң учурини бәр яки учурини беришкә вәдә бәр, мән көрүшүшни тохтитай” дәп шәрт қойған. Сақчилар бу аддий шәрткиму мақул дейәлмигән. Нәтиҗидә патигүлдин қаттиқ дәккисини йегән сақчилар, патигүлни өз тәрбийисигә көндүрәлмәй өйдин айрилған.

Төвәндә бу җәрянниң тәпсилатини аңлайсиләр. Бу программини мухбиримиз шөһрәт һошур тәйярлиди.

Мухбир: йеқиндин бери сизни аварә қилидиған иш болдиму?

Патигүл: 27-чесла, җүмә күни өйүмгә бәш сақчи кәлди, һәммиси уйғур ; арисида тәңритағ районлуқ гобав (дөләт аманлиқ сақчи әтрити)ниң вә сақчиханиниң башлиқлириму бар.

Мухбир: улар немә деди?

Патигүл: һелиқи адәм билән көрүшүватамсиз? деди, мән шундақ көрүшүватимән, давамлиқ сөзлишиватимиз дедим вә көрүшсәм немә бопту десәм, у адәм шинҗаңниң һәммә йеригә телефон қилип қутратқулуқ қилидиған адәм, у бөлгүчи, террорчи дегәндәк бирмунчә гәпләрни қилди. Мән уларға, әмисә баламниң учурини бәр яки учурини беришкә ениқ күнини бекитип вәдә бәр, мән сөзлишишни тохтитай дедим. Улар биз бундақ қилалмаймиз деди.

Мухбир: сизниң җавабиңиз немә болди?

Патигүл: рози -рамзанда, мәндәк балиси йоқап кәткән аниға мушу гәпни көтүрүп кәлгән әқлиңгә, виҗданиңға рәһмәт дәп тәнә қилдим. Бу гепимни аңлап иккиси орнидин қопуп чиқип кәтти. Мән қалған үчигә, уйғур сақчиларниң қолидин поқ кәлмигәндикин, қолидин һәр чоң иш келидиған хәнзу башлиқларни елип келишсәң болмамду, мән шуниңғила гепимни қилмаймәнму, дәп кайидим. Улар йәнә гепини тәкрарлап у (сиз көрүшүватқан )адәм, шинҗаңниң һәммә йеригә телефон қилип кишиләргә маддий ярдәм бериду, дөләтни ағдурушқа уруниду дегәндәк гәпләрни қилди. Мән, мән маддий ярдәм алмидим, маңа бу гәпни қилишма. Дөләтни оң қиливетәмду дүм қиливетәмду, униң биләнму чатиқим йоқ, мениң чатиқим баламниң учури, маңа баламниң җаваби керәк. Балам һәққидә я өлди, я тирик дәп җаваб бәр, мәнму кишиниң телефонини алмаймән, дедим.

Мухбир: хәққә маддий ярдәм қилидиған қандақ террорчикән у? дәп сорап бақмидиңизму?

Патигүл: ундақ соримаптимән. Дегиним, һоқуқуң болғандикин, ундақ террорчини тутуп келип җазалисаң болмамду? дедим, десәм, ундақ қилалмаймиз дәйду. Ундақ болса телефонумни кесиветиш, қолуңдин келидиғини шу, десәм ундақму қилмаймиз дәйду. Мән бир ресторанға көрпә тикип бериватқан идим, шу көрпини көтүрүп кирип уларниң алдиға аттим, мән баламни мушундақ йотқан -көрпә тикип беқип чоң қилған, оқутқан; мени бақидиған баламни тутуп кетип йәпкетиштиң. Балам уйғур болғанлиқи үчүн йоқап кәтти; һәрқайсиңму уйғур, мениң баламниң бешиға кәлгән күн, әтә сән хәқниңму бешиға кәп қалмисун, идарәңдин мениң қешимға әвәткәндә, 3 йилғичә балисиниң учурини берәлмидуқ, қайси йүзимиз билән баримиз дәп икки еғиз һәқ гәп қилишсаң болмамду дедим. Улар орнидин туруп өйдин чиқишқа алдириди, мән алдини тосуп мениң гепим техи түгимиди дедим: улар биз дәйдиғинимизни дәп болдуқ, вәзипимизни түгәттуқ дәп өйдин айрилди.

Мухбир: шундақ қилип, бу нөвәт көрүшсәң, җазалинисән дегән гәпни қилдиму?

Патигүл: яқ ундақ демиди, ахирида балиңиз һәққидила гәп қилиң, башқа гәпләрни қилмаң деди.

Мухбир: демисиму көрүшкәндин һазирға қәдәр балиңизниңла гепини қиливатимизғу?

Патигүл: шу. Хатирә қалдуруватқан биригә дедим, башлиқиңға дә, я мени террорчи билән сөзләшти дәп атсун, я баламниң учурини бәрсун. Баламниң учурини бәргән күни у адәм маңа йәнә телефон қилса, баламниң учурини бәрди, әмди маңа телефон қилма дәймән, йәнә телефон қилса, мән у кишиниму тиллаймән, дәп җаваб бәрдим.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.