Petichi ayalning 18 yashliq nurul'islamning ölümi heqqide hazidar ana éghizidin anglighanliri

Eyni chaghda muxbirlirimiz bu heqte xitay saqchiliridin ehwal igiliginide, saqchilar yuqiriqi seweblerni inkar qilghan yaki so'alni jawabsiz qaldurghan idi. Muxbirimiz yéqinda, nurul'islamning a'ilisige ölüm petisige barghan yene bir derdmen ayalni ziyaret qildi. Petichi ayal nurul'islamning ölüm sewebi heqqide, hazidar anining éghizidin anglighanlirini bayan qildi. Ashkarilinishiche, xitay saqchiliri nurul'islamning türmidiki chéghida achliq élan qilghanliqini uning bir gunahi süpitide a'ilisige uqturghan. Nurul'islamning anisi pasha dawut, paji'edin xitay saqchilirini jawabkar tutup qarshiliq bildürgen.

5-Iyuldin kéyinki tutqunlar a'ile tawabi'atliri, balilirining iz-dérikini hökümettin alalmighandin kéyin, öz-ara alaqilishish we öz-ara yol sorash arqiliq bir-birining derdlirige yétishken. Bultur 18 yashliq nurul'islam türmide jan üzgende, 5-iyuldin kéyin ghayib bolghanlardin imammemet élining anisi patigül ghulam, nurul'islamning a'ilisige ölüm petisige bérip hal sorighan.

Hazidar ana pasha dawut, ölüm petisige kelgenlerge oghlining ölüm sewebini chüshendürgen. Uning chüshendürüshiche, xitay saqchiliri nurul'islam jan üzüshtin bir kün burun, uning anisi pasha dawutni doxturxanigha chaqirtqan. Oghlining bedinini körüp uning qiyin-qistaqqa uchrighanliqini bayqighan ana, xitay saqchilirigha isyan kötürgen؛ ularni wehshiylik bilen eyibligen. Saqchilar bolsa, nurul'islamning ajizane halitini türmide achliq élan qilghanliqi sewebidin dep chüshendürgen. Etisi saqchilar a'ilige nurul'islamning ölüm xewirini yetküzgen.

Ghezeplen'gen hem peryad chekken ana xitay saqchiliridin oghlining jesitini telep qilghan. Saqchilar jesetnimu bermigen. Hazidar ana oghlining jesitini öyige ekétishke qanche tirishqan bolsimu, amal bolmighan؛ axir saqchilarning nazaritide sheherdiki bir meschitte namizini chüshürgen. Nurul'islamning namizi chüshürülgendin kéyin, xitay saqchiliri méyitni hökümet tereptin belgilen'gen bir jaygha depne qildurmaqchi bolghan؛ emma hazidar anining qattiq qarshiliqi netijiside, uning yerlikini tallashni anining ixtiyarigha qaldurghan.

Melum bolushiche, nurul'islam, Uyghur aptonom rayonining sabiq soda nazariti naziri dawut qurbanning newrisi, u yene nöwette ürümchi sheherlik saqchi idariside mu'awin bashliq bolup wezipe ötewatqan qadir memetning qéyin hedisining oghli. Shundaq turuqluq, bu a'ilining siyasiy tarixi, nurul'islamning hayatigha képil bolalmighan, xitay hökümiti üchün, ötmüshte xizmet qilghan, hélihem xizmet ötewatqan bu a'ile, 18 yashliq perzentining jesitigimu ige bolalmighan. Heyran qalarliqi, bu paji'e gerche, nurul'islamning anisi pasha dawutning yürikini ezgen bolsimu, bu a'ilining gholluq ezasi qadir memetke tesir qilmighan. Qadir memet özining ürümchi sheherlik saqchi idarisidiki mu'awin bashliqliq mensipini qoghdash üchün, heqsizliqqa süküt qilghan, paji'ege köz yumghan.