Fransiye qatarliq döletlerdiki Uyghurlar qurban héyt mezgilide ürümchidiki ghayiblar a'ile-tawabi'atlirigha pul yardem qildi

Shunga muhajirettiki Uyghur pa'aliyetchiliri bir tereptin ghayiblar mesilisini xelq'ara jama'etke bildürüsh üchün heriket qilsa, yene bir tereptin ghayiblar a'ile-tawabi'atliridin hal sorap, ularning derdige az bolsimu derman bolushqa tirishmaqta. Bu qétim qurban héyt harpisida, fransiye, gérmaniye we amérika qatarliq döletlerdiki bir türküm Uyghurlarning ghayiblar a'ile-tawabi'atlirigha pul ewetishi ene shu tirishchanliqlardin bir parchidur.

Biz bügün ghayiblar tawabi'atlirining ewetilgen pulni tapshurup alalighan yaki alalmighanliqini shundaqla ularning bu jeryanda bir awarichilikke yoluqqan-yoluqmighanliqini bilip béqish üchün bir qisim a'ililerge téléfon qilduq.

Ghayiblardin turghun obulqasimning ayali merhaba:
So'al: héytlar qandaqraq ötüwatidu?
Jawab: yaxshi ötüwatidu. Rehmet silerge!

So'al: azraq pul ewetilgen tapshurup alalidingizmu?
Jawab: aldim, aldim, 3000yüen tapshurup aldim.

So'al: silerge bu héyt mezgilide bir awarichilik bolmighandu?
Jawab: yaq bolmidi.

Ghayiblardin memtimin yasinning ayali meremnisa:

So'al: pulni tapshuruwapsiz anglisaq, pulni nedin alding dep sürüshte qilidighanlar bolmighandu?
Jawab: jimjitliq, undaq bolmidi?

So'al: dostliringlarning-teqdirdishinglarning ehwalida bir jiddiy özgirish yoqtu?
Jawab: roshen'gül bilen körüshtingizmu? uning siz bilen körüshküsi barti.

So'al....

Ghayiblardin abduréhim sidiqning ayali ayishe:

So'al: siz abduréhim sidiqning ayali ayishe bolamsiz?
Jawab: shundaq, men shu.

So'al: héytta sizge azraq pul ewetilgeniken, tapshurup alalidingizmu?
Jawab: aldim, 2250 yüen aldim. Yene busaremning pulinimu yetküzüp berdim, uningghimu 2250 yüen.

So'al: pulning sürüshtisi bolmighandu? nedin alding, nege berding deydighan?
Jawab: yaq bolmidi. Natonush bir adem téléfon qilip hal soridi, dölet sirtidin téléfon qiliwatimen dep.

Ghayiblardin memet baratning anisi sudixan:

So'al: qurban héytliq pulni tapshuruwalghininglar üchün awarichilik bolmighandu?
Jawab: azraq boldi. Saqchixanidin we shéchüdin (ahaliler komitétidin) kiriptiken, qanche pul keldi, kimdin keldi, dep. Kim ewetkinini bilmeymiz, ewetiptu, xudayim berdi dep alduq dep jawab berdim. Démisimu, bizni baqidighan balilirimizni yoqitiwetti, turmushta qiynalduq, shunga so'al-soraqlirigha bosh turmiduq.

Ghayiblardin muxter mexetning ayali tuqiz:
‏-Pulni tapshurup alduq, héchkim bir néme démidi. Qérindashlargha rehmet.

-Yaxshi boptu. Elwette silerning asasliq éhtiyajinglar bu emes, silerge kériki yoqalghan ademning uchuri. Silerge téximu köp sewr we gheyret tileymiz.

Igilishimizche, bu qétimqi qurban héyt harpisida fransiyidiki bezi Uyghur saxawetchiler, 920 dollar, gérmaniyidikiler 1500 dollar, washin'gitondikiler 700 dollar bolup, jem'iy 3000 dollardin artuq pul ewetken؛ bu ghayiblar a'ile tawabi'atliridin 10 kishige, kambodzhadin qayturulup qamaqqa höküm qilin'ghanlardin ikkisining a'ilisige؛ türmide yétiwatqan siyasiy mehbuslardin ikki nepirining a'ilisige yetküzüp bérilgen.

Bu igiligenlirimiz, qurban héyt mezgilide, muhajirettiki Uyghurlarning weten ichidiki mehbus, shéhit we ghayiblar a'ile-tawabi'atlirigha qilghan yardemlirining peqet birqanche misalidinla ibarettur.