5-Iyuldin kéyin iz-déreksiz ghayib bolghanlar (24)

Dukanda bir tereptin terlep-tepchirep ishlep, bir tereptin xéridar chaqiridighan ottura yashliq hünerwenning bestimu körünmes boldi؛ yoldin ötken-kechkenler dukanning bu jimjit menzirisini her küni körüshke qadir, emma bu dukanning igisini bir xanim we bir qizning 3 yildin béri izdewatqanliqidek échinishliq menzirini körüshke qadir emes. Biz bügün mana mushu menzirini diqqitinglargha sunimiz.

RFA/Sshohret Hoshur

Dukandarning ismi abduréhim qadir؛ 1965‏-yili qeshqerde tughulghan؛ u, 2006-yili ayali we bir qizini élip tirikchilik üchün qeshqerdin ürümchige kelgen we dostlirining yölishi bilen beytulla meschitining yénidiki ene shu dukanni ijarige élip ish bashlighan. Qeleychilik dukini gerche uni köp bir bayliqqa ige qiliwételmisimu, uni öy ijarisini tölesh we 3 janliq a'ilisining kündilik chiqimini qamdashqa yarighan. Mana mushunchilik bir maddiy imkanlar bilen özlirini bextlik sanap, shükri-qana'et ichide yashawatqan bu a'ile, 2009-yili 6-iyul küni seherde xitay saqchiliri öylirige basturup kirip, abduréhim qadirni sapma kesh we asma mayka bilen öyidin achiqip ketkendin buyan, eslige qaytalmighan. Nöwette bu a'ilidiki dada ghayib, ana yoldishini izdep sersan؛ qiz öyde oqushsiz.

Melum bolushiche, 5-iyul weqesi seweblik tutup kétilgen abduréhim qadir, 5-iyul weqesining qozghilishigha seweb bolghan shawgüen weqesidin xewersiz؛ u 5-iyul weqesining asasliq sewebi bolghan rayondiki milliy ziddiyet we zalimane siyasetler üstidimu hésab-kitab qilip baqqan emes. U 5-iyul küni weqe yüz bergende, bir palaketchilikke yoluqushtin saqlinish üchün, dukinini taqap öyige qaytip kirgen؛ emma palaketchilik uni öyigiche qoghlap barghan we yépishqan؛ buninggha peqet uning Uyghurgha xas chirayi we Uyghurche sözlishila seweb bolghan.