Ghayiblar a'ile-tawabi'atining xitayning 18-qurultiyigha yetküzmekchi bolghan sözliri

Béyjingda xitayning 18-qurultiyigha qatnishiwatqan Uyghur aptonom rayoni wekiller ömiki bügün chüshtin kéyin ikkinchi qétimliq ayrim yighinini achqan.
Muxbirimiz shöhret hoshur
2012-11-08
Élxet
Pikir
Share
Print
Ghayiblardin imammemet élining anisi patigül ghulam.
Ghayiblardin imammemet élining anisi patigül ghulam.
RFA/Shohret Hoshur

Yighinda dilnur eziz isimlik wekil xitay emeldarliridin jow yungkanggha, Uyghur rayondiki her millet xelqining bext-sa'adet ichide yashawatqanliqini we merkizi hökümettin memnun ikenlikini bildürgen. Biz bügün ürümchidiki 5 ‏-iyuldin kéyin perzenti ghayib bolup ketken bir derdmen anini ziyaret qilghinimizda, u mezkur wekillerning rayondiki xelqqe wekillik qilalmaydighanliqini éytti we özining xitayning 18-qurultiyigha yetküzmekchi bolghan sözlirini bayan qildi.

Melum bolushiche, atalmish wekiller, bu yilmu xitay da'iriliri teyyarlap bergen matériyallar bilen yolgha chiqqan. Ular seperge chiqishning aldida jem'iyette héchqandaq tekshürüsh élip barmighan. Shunga ular bügün échilghan ikkinchi qétimliq yighinida rayondiki nöwettiki ré'al we jiddiy mesililer heqqide qilche toxtalmighan. Eksiche, rayondiki Uyghur xelqining xitay merkizi hökümitige qarita naraziliqini burmilap körsitip, xitay rehberlirige saxta salam yetküzgen. Igilishimizche, rayondiki nöwettiki eng jiddiy mesililerdin biri ghayiblar mesilisidur. Ghayiblarning sani hazirgha qeder toluq kimlikliri boyiche ispatlan'ghini 33 neper؛ hökümet saqchi bashliqlirining éghizidin ashkarilan'ghini 300 nechche neper؛ jem'iyette tarqalghan sözlerge we perezlerge asaslan'ghanda ghayiblarning sani mingdin töwen emes. Nöwette rayondiki xelq, bolupmu ghayiblarning a'ile-tawabi'atliri 18-qurultayda bu mesilining otturigha qoyulushini we ghayiblar heqqide éniq bir uchur bérilishini kütmekte.

Ghayiblardin imammemet élining anisi patigül ghulam, bügün bu munasiwet bilen ziyaritimizni qobul qilip, 18-qurultaygha yetküzmekchi bolghan sözlirini bayan qildi. U sözide, nöwette rayonda nurghun kishilerning, 5-iyuldin kéyin ghayib bolghan perzentliri we jörilirining iz-dérikini alalmay azab tartiwatqanliqini, özining bu xil kishilerdin az dégende 30 nepirini tonuydighanliqini, yerlik da'iriler we saqchilarning, bu a'ililerge ghayiblar heqqide melumat bermeyla qalmastin؛ yene iz-dérikini qilghanliqi üchün nazaret qiliniwatqanliqini, tehditke uchrawatqanliqini, hetta jazagha uchrawatqanliqini bayan qildi. U rayondiki bezi axbarat organlirining rayondiki xelqtin, 18-qurultaygha qarita teklip-pikirlirini sorighanliqini, ziyaret qilin'ghuchilarning bolsa, oqushtiki balisigha oqush pulini yétishtürelmesliki, istémal sewiyisige uyghun ma'ash alalmasliq qatarliq rayon'gha nisbeten addiy sanilidighan mesililerni otturigha qoyghanliqi, özlirige oxshash ziyankeshlikke we uwalchiliqqa uchrighan kishilerning ziyaret qilinmighanliqi, rayondiki asasliq we jiddiy mesililerning tilgha élinmighanliqi üstidin shikayet qildi.

Patigül ghulam, ghayiblar mesilisining rayondiki eng chong we jiddiy mesile ikenlikini bayan qilip mundaq dédi:
-Méning etrapimda balamning ehwalini bilidighan, köngül bölidighan yüzdin artuq adem bar, ularning men bilen uchrashsa birinchi bolup soraydighini: "Balangning xewirini hökümet berdimu?" men bilidighan shu 30 nechche kishiningmu az dégende 100din tonushi bar. Bu bügün shinjangning hemme yéride déyilidighan, sorilidighan gep. Qurultayda déyilishke tégishlik buningdinmu jiddiy, buningdimu chong ish barmidu?

Xitay prézidénti xu jintaw xitay 18-qurultiyida échilish nutqi sözlidi. 2012-Yili 8-noyabir, béyjing.
Xitay prézidénti xu jintaw xitay 18-qurultiyida échilish nutqi sözlidi. 2012-Yili 8-noyabir, béyjing. AFP

Patigül ghulam ghayiblar a'ile-tawabi'atlirining derd-elemlirini bayan qilip mundaq dédi:
-Bek sorulup kettuq, bek qiynilip kettuq؛ nurghun nareside balilar, dadiliridin ayrilip ketkechke, ach-yalingach yürüp ketti, oqushsiz qaldi. Biz balimizni tépip ber démiduq, balimizni jazalima démiduq, peqet ölük yaki tiriklikini dep ber déduq. Mushumu artuq telepmu? mushu gépimiz üchün solap qoyulduq, qamap qoyulduq. Gongsendangning adilliqi qéni?

Patigül ghulam eger ghayiblar mesilisi hel bolmisa, jem'iyette hökümetke qarita öch-adawetning téximu küchiyidighanliqini, rayonda muqimliqning emelge éshishining mumkin bolmaydighanliqini eskertip yene mundaq dédi:
-‏Men ikki balamgha "Eger men hayat waqtimda akanglarning iz-dérikini alalmay qalsaq, akanglarning intiqamini élinglar" dédim, eger imam balamning uchurini alalmay ölüp ketsem, shu sözlirimni wesiyet teriqiside qaldurup kétimen. Bundaq wesiyet qalduridighanlar bir patigül emes, bügün qan yighlawatqanlarning hemmisi shundaq deydu.

Patigül ghulam 4 kündin béri birer muxbirdin téléfon kélishini töt közi bilen kütkenlikini, shunga yuqiriqi sözlirini axbarat wasitisi arqiliq qurultaydikilerge yetküzüp qoyushimizni telep qildi.

Toluq bet