Teyinlen'gen mu'awin re'is jappar hebibullaning ghayiblar heqqidiki teklipi: “Qéchip ketkenler qatarida bir terep qilayli”

Yighin'gha ghayiblar a'ile-tawabi'atlirini béyjingdin qayturup ekétish üchün ürümchidin kelgen erziyet xizmiti kadirliridin bashqa yene, shu mezgilde béyjingda yighin'gha qatnishiwatqan Uyghur aptonom rayonining teyinlen'gen mu'awin re'isi jappar hebibulla bilen Uyghur rayonining mu'awin partkom sékrétari xu'ang wéy qatnashqan. Ashkarilinishiche, yighinda jappar hebibulla, 5-iyuldin kéyin ghayib bolghanlarni “Qéchip ketkenler qatarida bir terep qilish” teklipini otturigha qoyghan. Bu teklip, ghayiblarning alliqachan dunya bilen widaliship bolghanliqidin dérek berse, yene bir tereptin da'irilerning a'ililer we jem'iyetni aldash üchün bash qaturuwatqanliqini ashkarilimaqta.

Derdmen ana patigül ghulam, yéqinda ürümchide kochida kétiwétip, ikki yilning aldida özini béyjingdin tutup kelgen yuqiri sotning bir erziyet kadirini körüp qalidu. Patigül xanim uning aldini tosup, eyni chaghda béyjingda bergen wedilirini yüzige salidu we balisining uchurini soraydu. Bu ishta özining charisizliqini bayan qilghan erziyet kadiri, eyni chaghda béyjingda bir muzakire yighini échilghanliqini, yighinda, aptonom rayonning mu'awin re'isi jappar hebibullaning, “Ghayiblarni qéchip ketkenler qatarida bir terep qilish” heqqide teklip sun'ghanliqini ashkarilaydu.

Melum bolushiche, bu teklip sékrétar xu'ang wéy teripidin ret qilin'ghan. Xu'ang wéy ghayiblarning eslide saqchilar teripidin tutulghanliqini, shunga bu mesilige awwal saqchi orunlirining jawab bérishi kéreklikini éytqan. Bizning burunqi igileshlirimizdin melum bolushiche, da'iriler, xoten qaraqashliq nebijan élining a'ilisige we qeshqer sheher ichidiki eysajan memetning a'ilisige perzentlirining chet'elge qéchip ketkenlik éhtimalliqini bildürgen؛ a'ililer bolsa puti -qoli kishenlen'gen kishilerning chet'elge qéchishining mumkinsizlikini éytip, da'irilerning sözini ret qilghan. Buninggha qarita qaraqash nahiyilik saqchi idarisining mu'awin bashliqi “Yuqiridikiler méning mushundaq jawab bérishimni éytti” dep eskertip, bu gepke öziningmu ishenmeydighanliqini ashkarilighan.

Uyghur aptonom rayonluq hökümetning torbétidin melum bolushiche, 1982-yili xitay kompartiyisige eza bolghan jappar hebibulla 2005-yildin bashlap, Uyghur aptonom rayonining mu'awin re'islik wezipisini ötimekte؛ u nöwette yene, aptonom rayonluq partkom siyasiy-qanun komitétiningmu mudiri. Melumki, u yuqiriqi teklipni bérish arqiliq xitay hakimiyiti keltürüp chiqarghan Uyghur tarixidiki chong bir paji'eni yoshurushqa eqliy jehettin hesse qoshmaqchi. Torbettiki tonushturushtin qarighanda, jimisarda tughulup ösken jappar hebibullaning xitay tilini yaxshi bilgendin bashqa, kesip, iqtidar yaki kishilik xaraktér jehettin alahide bir üstünlüki melum emes. Buningdin qarighanda, uning hazirqi mertiwisige yétish üchün, yuqiriqigha oxshash tekliplerni yeni Uyghur xelqining menpe'itige zit, emma xitay dölitining menpe'itige paydiliq tekliplerni köp qétimlap sun'ghanliqi texmin qilinmaqta.