Ghulja déhqanliri qar we yamghur apitide örülgen öylirini yasimaqta

Sürette bu yilning béshida ghuljida yüz bergen qar apitidin bir körünüsh

Igilishimizche, ghulja nahiyisining turpanyüzi, penjim, qash, xudiyar yüzi, Uyghur uch'on, yéngitam, samyüzi, sadiqyüzi qatarliq 20 din artuq yézilirida bu yil etiyazdiki qar arilash yamghurda, soqma tam qilip sélin'ghan öylerning texminen 70% i örülüp chüshken. Xish bilen sélin'ghan öylermu xéli éghir derijide zeximlen'gen. Nahiye teweside 100 minggha yéqin ahale apetke uchrighan, iqtisadiy ziyan 1 milyard yüendin éship ketken.

Nöwette öyliri örülüp ketken déhqanlar, yaz peslidin paydilinip bir tereptin déhqanchiliq qilip, bir tereptin öylirini yasashqa bashlighan. Biz ghulja nahiyisidiki déhqanlarning öylirining apettin kéyinki ehwalini igilesh üchün ghulja nahiyisidiki déhqanlargha téléfon qilduq.

Sadiqyüzi yézisidiki bir déhqanning bildürüshiche, bu yil qish hem etiyaz peslidiki qar hem yamghurda ularning yézisidiki eslidiki soqma tam qilip sélin'ghan öylerning texminen 70% i örülüp ketken.

Ghulja nahiyilik hökümetning tor bétide bu yil nahiyilik hökümet déhqanlarning örülüp ketken zexmilen'gen öylirini qayta yasash üchün, nahiyilik hökümet déhqanlargha iqtisadiy jehettin yardem bérip, nahiye teweside yer tewreshke hem yamghur apitige chidamliq öy sélish qurulushini bashlighanliqini heqqidiki xewerler bérilgen.

Emma, hökümetning déhqanlargha bergen bu yardimi déhqanlarning öylirini qayta sélish üchün serp qilghan chiqimidin xélila az bolup, nöwette qish hem etiyazdiki apette örülgen öylirini qayta yasash, déhqanlargha éghir iqtisadiy bésim élip kéliwatqanliqi melum bolmaqta.

Ziyaritimizni qobul qilghan déhqanlarning bildürüshiche, normal shara'itta xish bilen sélinidighan 3 éghizliq öy üchün 30 ming yüen xelq puli serp qilinidiken. Hazir nahiyilik hökümet déhqanlarning öylirini yasash üchün xish, sémont, polat tömür qatarliq qurulush matériyallirini yardem qilghan bolsimu, emma öyge kérek bolghan yaghach matériyalliri, ishik - dérize, ustilargha töleydighan pul qatarliqlar üchün, déhqanlar yenila taghdiki qoy - kalilirini sétishqa, bankidin qerz pul élishqa mejbur bolmaqta iken.

Apette örülüp chüshken öyini yéngilap séliwatqan bir déhqanning bildürüshiche, nahiyilik hökümet öylerni yéngilash üchün 3000 som xelq puli qimmitidiki qurulush matériyali yardem qilghan bolsimu, lékin qalghan chiqimlarni déhqanlar özliri kötürüshke mejbur bolghan.

Igilishimizche, nahiyilik hökümetning déhqanlarning öylirini yéngilash üchün bergen yardimi her qaysi yézilarda perqliq bolup, nahiye tewesidiki köpligen yézilarda déhqanlarning oy yéngilishi üchün qilin'ghan yardem 3000 yüendin 6000 yüen'giche xelq puli qimmitidiki qurulush matériyali bolghan. Emma turpanyüzi yézisidiki bir déhqanning bildürüshiche, ularning yézisida yéziliq hökümet déhqanlarning yer tewreshke chidamliq öy sélish qurulushi üchün, adettiki a'ililerge 18 ming yüen, namrat a'ililerge 30 ming etrapida qurulush matériyali hem melum miqdarda neq pul bergen.

Nöwette nahiye tewesidiki déhqanlar arisida bu xil perq heqqide ghulghula boluwatqan bolup, déhqanlar öy sélishqa bérilgen yardem pulidiki bu xil perqni, xitay mu'awin bash ministiri li kéchangning bu yil etiyazdiki turpanyüzi ziyaritige baghlap, buni hökümetning " köznek yézilarni perdazlash" siyasitining ipadisi dep qarimaqta iken.

Turpanyüzi yézisidin ziyaritimizni qobul qilghan bu déhqanning bildürüshiche, eyni chaghda xitay mu'awin bash ministiri li kéchang turpanyüzi yézisini ziyaret qilghinida, bu yézining ghulja tewesidiki muhim sayahet merkizi qilip belgilinishini hem turpanyüzi yézisidiki öylerni yéngilashqa nuqtiliq yardem bérishni éytqan iken.

Xitay weziyitini közetküchilerning qarishiche, xitayda yerlik da'irilerning shu jaydiki emeliy ehwallarni yuqirigha melum qilishta, mehsulatni ashurup doklat qilish, rayonning ehwalini pedazlap körsitish, yuqiri organlardin yaki chet'ellerdin kelgen ziyaretchilerge melum yéza, kent yaki melum bir a'ilini ülge qilip körsitish ehwali omumyüzlük mewjut bolup, ghulja nahiyiside turpanyüzi yézisidiki déhqanlarning öylirini yéngilashqa bérilgen iqtisadiy yardemning bashqa yézilardin perqliq halda köp bolushi, bu xil ehwalning bir tipik misali iken.

Yuqiridiki ulinishtin bu progirammining tepsilatini anglighaysiler.