Gérmaniye parlamént wekillirining Uyghur diyari we tibettiki ziyariti axirlashti

Gérmaniye axbarat agéntliqining 20 - aprildiki xewirige asaslan'ghanda, gérmaniye parlaménti kishilik hoquq komitéti ezaliridin terkip tapqan wekillirining Uyghur diyari we tibettiki üch künlük ziyariti 4 - ayning 20 - küni axirlashqan.
Muxbirimiz ekrem
2009-04-21
Share
Merkel-dalay-tibet-305.jpg Gérmaniye bash ministiri angéla mérkél xanim dalay lama bilen birge.
AFP Photo

Bu, xitay terepning ötken yili 3 - ayda tibette topilang yüz bergendin buyan, tunji qétim chetel kishilik hoquq organliri xadimlirining tibetni ziyaret qilishigha ruxset bérishi bolup hésablinidiken shundaqla gérmaniye parlaménti kishilik hoquq kéngishi xadimlirining sherqiy türkistanda hökümet namidin resmi ziyaret élip bérishi bolup hésablinidiken.

Tibetni ziyaret qilghan wekiller ömiki düshenbe küni béyjingda muxbirlarni kütüwélish yighini ötküzüp üch künlük ziyaret ehwalidin melumat bergen bolup, bu ömekning mesuli haybach ependining bildürüshiche, tibettiki yerlik hökümet da'iriliri pütün küchi bilen ziyaretchilerge "tibette hemme ish normal" dégen tesiratni bérishke tirishqan.

Haybach ependi sözide yene, xitay da'irilirining tosalghusigha qarimay bezi nersilerni bilish pursitige érishkenlikini bayan qilip, tibette yolgha qoyulghan "wetenperwerlik terbiyisi herikiti" ge qarimaqqa hemmila rahib öz ixtiyari bilen qatnashqandek körün'genlikini, emeliyette, bir neper rahibning "biz mejburi qatnishiwatimiz" dep, mexpiyetlikni ashkarilap qoyghanliqini bildürgen.

Haybach ependi sözide, tibettiki bu üch künlük ziyaret jeryanida köp nersilerni bilish pursitige érishelmigenlikini, tibet türmilirini ziyaret qilishqa xitay da'irilirining ruxset qilmighanliqini bildürgen.

Gérmaniye dolqunliri radi'osining 20 - april küni gérmaniye axbarat agéntliqi melumatidin neqil élip bu xususta élan qilghan xewiride körsitishiche, gérmaniye parlaménti kishilik hoquq komitétining bir goruppa wekiller ömiki Uyghur élida tekshürüsh élip barghan bolup, xewerde omumi nopusi musulman bolghan Uyghurlarning mutleq köp qismining xitay zulmigha uchrawatqanliqi ilgiri sürülgen.

Uyghur élide élip bérilghan bu ziyaretning netijisi yaki xewiri téxi tilgha élinmighan bolup, bu heqte biz d u q xadimliridin bezi uchurlarni igileshke muyesser bolduq.

D u q bash katipi dolqun eysa ependim ziyaritimizni qobul qilip, gérmaniye parlaménti kishilik hoquq komitétining sherqiy türkistanda élip baridighan bu ziyaritidin özlirining burunla xewiri barliqini we wekiller ömiki sherqiy türkistan'gha bérishtin ilgiri, ularni Uyghur xelqining kishilik heq - hoquqlirining depsende qilinishigha a'it matériyallar bilen teminligenlikini tilgha aldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet