Гүәнтанамодики 4 нәпәр уйғурниң әркинликкә чиқиши уйғурларни һаяҗанға салди

Сәйшәнбә күни гүәнтанамода туруватқан 17 нәпәр уйғурни арал дөләт палавниң қобул қилмақчи болғанлиқ хәвири, 7 йилдин буян гүәнтанамо түрмисидә турушқа мәҗбур болуватқан гунаһсиз уйғурларниң тәқдиригә көңүл болүватқан җамаәтни бир мәһәл һаяҗанға салған иди.
Мухбиримиз гүлчеһрә
2009.06.11
Guantanamo-uyghurlar-erkinlikke-chiqti-305 2009 - Йили 12 - февралдиики гүәнтанамо уйғурлири үчүн елеп берилған намйиштин бир көрүнүш.
AFP Photo

Бу хәвәрдин кейинла бүгүн йәнә, уларниң төт нәпириниң азад қилинип гүәнтанамодин палавға әмәс, бәлки бермудаға рәсмий йөткилип барғанлиқ учури тарқитилди, гүәнтанамодики уйғурларниң тәқдиридә йүз бериватқан бу драматик өзгиришләр гүәнтанамодики 17 нәпәр уйғурниң тәқдиригә көңүл бөлүп келиватқан уйғурларда қандақ мурәккәп һесларни қозғимақта ?

Гүәнтанамодики уйғурларни америкиға йәни америка уйғур бирләшмиси җайлашқан вашингитон д с, йәни уйғурлар бир қәдәр зич олтурақлашқан верҗиния штатиға орунлаштуруш үчүн, уйғур миллий рәһбири рабийә қадир вә башқа уйғурлар изчил тиришчанлиқ көрситип кәлгән иди, гүәнтанамодики уйғурларниң төт нәпириниң америка әмәс, бәлки бермудаға орунлаштурушиға нисбәтән рабийә қадир ханимниң пикрини елиш үчүн униң вашингитондики уйғур кишилик һоқуқ вә демократийә фондиниң ишханисиға телефон қилдуқ.

Йәттә йилдин буян гүәнтанамодики америка һәрбий түрмисидә тутуп турулуватқан 17 нәпәр уйғурдин абдулла абдуқадир, хелил мамут, абликим турахун вә салаһидин абләһәтләр 10 - июн кечә әркинликкә чиқип, 11 - июн сәһәр атлантик окяндики әнгилийә һамилиқидики бермуда арилиниң туприқиға дәссиди.

Биз бу төт нәпәр уйғурниң әркинликкә чиқиш җәряни һәм уларниң һазирқи әһвалини игиләш үчүн йиллардин буян гүәнтанамодики уйғурларниң адвокатлириға тәрҗиман болуп келиватқан рошән аббас ханимниң хусусй янфониға телефон улидуқ.

Буниңдин үч йил илгири гүәнтанамодин бәш нәпәр уйғурниң қоюп берилип албанийигә орунлаштурулғанлиқи худди бүгүнкигә охшашла уйғурларда һәм дуня мәтбуатида зор долқун қозғиған иди, бүгүнки күндә албанийидики бу уйғурларниң өз сәбдашлириниңму әркинликкә чиққанлиқини аңлиғандин кейинки тәсиратлирини елиш үчүн албанийидә туруватқан абабәкри қасим билән алақилаштуқ.

Йәттә йил илгири америкиниң афғанистанда талибан күчлиригә қарита елип барған уруши давамида 22 нәпәр уйғур хата пәйттә, хата җайда туруп қалғанлиқи үчүнла, террор гумандарлири қатарида пакистан қисимлири тәрипидин тутулуп америка әскәрлиригә өткүзүп берилгәндин башлап, гүәнтанамо һәрбий түрмисигә қамалған, гәрчә төт йил илгири бу уйғурларниң һәммиси америка сотида гунаһсиз дәп ақланған болсиму,бәш нәпириниң албанийигә панаһланғинидин башқа йәнә 17 нәпири һазирғичә гүәнтанамода турушқа мәҗбур иди.

Нөвәттә буларниң йәнә төт нәпириниң азад қилиниши уйғурларға зор тәсәллий һәм үмидләр бәрмәктә шундақла улар, қалған бигунаһ мәһбусқа айланған 13 нәпәр уйғурниң пат арида әркинликкә чиқишини төт көз билән күтмәктә.
 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.