Güentanamodiki 4 neper Uyghurning erkinlikke chiqishi Uyghurlarni hayajan'gha saldi

2009 - Yili 12 - féwraldiiki güentanamo uyghurliri üchün élép bérilghan namyishtin bir körünüsh.

Bu xewerdin kéyinla bügün yene, ularning töt nepirining azad qilinip güentanamodin palawgha emes, belki bérmudagha resmiy yötkilip barghanliq uchuri tarqitildi, güentanamodiki Uyghurlarning teqdiride yüz bériwatqan bu dramatik özgirishler güentanamodiki 17 neper Uyghurning teqdirige köngül bölüp kéliwatqan Uyghurlarda qandaq murekkep héslarni qozghimaqta ?

Güentanamodiki Uyghurlarni amérikigha yeni amérika Uyghur birleshmisi jaylashqan washin'giton d s, yeni Uyghurlar bir qeder zich olturaqlashqan wérjiniya shtatigha orunlashturush üchün, Uyghur milliy rehbiri rabiye qadir we bashqa Uyghurlar izchil tirishchanliq körsitip kelgen idi, güentanamodiki Uyghurlarning töt nepirining amérika emes, belki bérmudagha orunlashturushigha nisbeten rabiye qadir xanimning pikrini élish üchün uning washin'gitondiki Uyghur kishilik hoquq we démokratiye fondining ishxanisigha téléfon qilduq.

Yette yildin buyan güentanamodiki amérika herbiy türmiside tutup turuluwatqan 17 neper Uyghurdin abdulla abduqadir, xélil mamut, ablikim turaxun we salahidin ablehetler 10 - iyun kéche erkinlikke chiqip, 11 - iyun seher atlantik okyandiki en'giliye hamiliqidiki bérmuda arilining tupriqigha dessidi.

Biz bu töt neper Uyghurning erkinlikke chiqish jeryani hem ularning hazirqi ehwalini igilesh üchün yillardin buyan güentanamodiki Uyghurlarning adwokatlirigha terjiman bolup kéliwatqan roshen abbas xanimning xususy yanfonigha téléfon uliduq.

Buningdin üch yil ilgiri güentanamodin besh neper Uyghurning qoyup bérilip albaniyige orunlashturulghanliqi xuddi bügünkige oxshashla Uyghurlarda hem dunya metbu'atida zor dolqun qozghighan idi, bügünki künde albaniyidiki bu Uyghurlarning öz sebdashliriningmu erkinlikke chiqqanliqini anglighandin kéyinki tesiratlirini élish üchün albaniyide turuwatqan ababekri qasim bilen alaqilashtuq.

Yette yil ilgiri amérikining afghanistanda taliban küchlirige qarita élip barghan urushi dawamida 22 neper Uyghur xata peytte, xata jayda turup qalghanliqi üchünla, térror gumandarliri qatarida pakistan qisimliri teripidin tutulup amérika eskerlirige ötküzüp bérilgendin bashlap, güentanamo herbiy türmisige qamalghan, gerche töt yil ilgiri bu Uyghurlarning hemmisi amérika sotida gunahsiz dep aqlan'ghan bolsimu,besh nepirining albaniyige panahlan'ghinidin bashqa yene 17 nepiri hazirghiche güentanamoda turushqa mejbur idi.

Nöwette bularning yene töt nepirining azad qilinishi Uyghurlargha zor teselliy hem ümidler bermekte shundaqla ular, qalghan bigunah mehbusqa aylan'ghan 13 neper Uyghurning pat arida erkinlikke chiqishini töt köz bilen kütmekte.