Polat zawuti rehberliri ishchilarni sha'ire göher memetke egeshmeslikke agahlandurghan

Yéqinda polat zawut rehberliri herqaysi séxlarda mexsus yighin échip, göher memetning jem'iyette milletler ittipaqigha ziyanliq söz tarqitip yürüwatqanliqini uqturghan we uni her xil yétersizlikler bilen eyiblep, ishchilarni göher memet bilen pikirleshmeslik we uninggha egeshmeslikke agahlandurghan. Bügün radi'omiz ziyaritini qobul qilghan zawutning yene bir ishchisi, zawutning göher memet üstidiki eyibleshlirini ret qildi.

Uyghur pa'aliyetchilirining bildürüshiche, milliy kemsitish weqeliri, Uyghur éli ishghal qilin'ghandin buyanqi Uyghurlar hayati üchün yéngi ehwal emes. Milliy kemsitishke qarshi küreshmu Uyghurlar kündilik hayatining bir parchisi. Göher memet ene ashu milliy kemsitishke qarshi küreshte ashkara otturigha chiqqan, xeterge kökrek kérip, yolidin yanmighan, iradisi boshashmighan, shundaqla xitayning öz qanunlirini qoral qilip turup kürishini dawamlashturuwatqan Uyghur xanimliridin biri.

Xitay da'iriliri uning küresh yolidin héchqandaq bir qanuniy ajizliq tapalmighandin kéyin, uninggha yéqinda intizam jazasi bérip, bir ayliq ma'ashini toxtatqan. Uning amma arisida inawet tépiwatqinini körüp, uning jama'et ichidiki obrazighimu qest qilishqa bashlighan. Ötken hepte zawut rehberliri herqaysi séxlarda mexsus yighin échip, bir tereptin göher memetning milletchilik qiliwatqanliqini tenqid qilsa, yene bir tereptin, uninggha eqliy we psixik jehettin betnam chaplap, ishchilarni uning bilen arilashmasliq, pikirleshmeslik we uninggha egeshmeslik heqqide agahlandurghan.

Emma igilishimizche, zawuttiki Uyghur ishchilarning mutleq köp qismi, zawutning teshwiqatlirigha ishenmigen we bu agahlandurushigha perwa qilmighan. Aldinqi küni ziyaritimizni qobul qilghan polat zawutning bir ishchisi, göher memetning kürishini toghra dep qaraydighanliqini we qollaydighanliqini bildürdi.

Göher memet özining herxil suyiqestlerge duch kélish éhtimalliqini xéli burunla texmin qilghanliqini, shunga da'irilerning türlük betnamlirigha perwa qilmaydighanliqini, shunga xizmettinmu waz kechmeydighanliqini, milliy kemsitishke qarshi kürishini toxtatmaydighanliqini, chünki bu yolda özini yalghuz dep qarimaydighanliqini bildürmekte.